Z wudaća: srjeda, 17 februara 2021

Pos do Němskeje twochnył

Wulki Šunow. Čěska mějićelka psa prošeše policiju w Němskej wo pomoc. Jeje pos bě přez mjezu twochnył. Postajenjow korony dla njemóžeše žona sama za nim pytać. Z pomocu GPS-sćelaka posrědkowaše zastojnikam poziciju psa Edyja. We Waltersdorfje jeho widźachu a za nim wołachu. Wočiwidnje z wulkim wjeselom jim Edy do awta skoči. Při bawdźe Krakonoša psa jeho mějićelce přepodachu.

Budyšin. Serbski institut a Sakska krajna a uniwersitna biblioteka wuhotujetej jutře a zajutřišim 24hodźinske wubědźowanje „Sakska at Work – Digitalna industrijna kultura“. Wobdźělnicy maja historiske rukopisy na wašnje transkribować, zo su mašiny kmane je čitać. Krótkodobne přizjewjenje je na stronje slubdd.de/sachsenatwork móžne.

Wojerecy (SN). Wojerowska biblioteka Brigitty Reimann je koronapandemije dla dale zawrjena, swojich čitarjow pak nochce zhubić. Tak su tam čas wužiwali namakać poskitki, kotrež móža zajimcy přiwšěm wužiwać. Wobłuk digitalnych poskitkow je nětko rozšěrjeny. Za wšěch tych, kotřiž chcedźa nowu rěč nawuknyć abo hižo wobstejace znajomosće cuzeje rěče rozšěrić, maja tam wosebitosć. To płaći za němčinu jako cuzu rěč, za jendźelšćinu, španišćinu, francošćinu a italšćinu na wšitkich rěčnych schodźenkach.

Z nowej, bjezpłatnej eLearning platformu LinguaTV móža wšitcy přizjewjeni wužiwarjo biblioteki z pomocu widejow so z cuzej rěču zaběrać. Za to njetrjebaja do biblioteki přińć. Poskitk wužiwać hodźi so wot doma. Kursy su zestajene z widejow, zwučowanjow, wuknjenskich hrow a treninga za wokable.

Radwor (SN/MkWj). Radworska gmejna chce so na twarskim projekće wjesneje dróhi K 7283 w Boranecach wobdźělić a tamniše busowe zastanišćo ponowić. To su gmejnscy radźićeljo na swojim posedźenju wutoru tydźenja jednohłósnje wobzamknyli. W Boranecach přewjeduja we wobłuku tak mjenowaneje zhromadneje naprawy wobšěrne twarske dźěła. Próstwu wo spěchowanske srědki je gmejna zapodała. Wobstejacu drjewjanu čakarnju chcedźa na hinaše wašnje wu­žiwać.

Energetisce wobnowić chcedźa wjesny dom zhromadźenstwow w Chelnje (Dorf­gemeinschaftshaus), bywšu gratownju wohnjoweje wobory. Srědki za zatwar nowych woknow a durjow we wobjimje 90 procentow přinošuja z fondsa za strukturne wuwiće bywšich brunicowych kónčin.

Wjesnjanostka Madeleine Rentsch radźićelow a hosći wo tym informowaše, zo nastupi nowy domownik šule a wjacezaměroweje hale „Slavia“, Stefan Paška z Radworja, dnja 1. apryla swoje zastojnstwo. Jeho běchu z cyłkownje 26 poža­darjow wuzwolili.

Što Wolfganga Krausa z Wulkich Ždźarow z europskim ekumeniskim towarstwom Penuel zwjazuje

Kruta wěra maćerje bě Wolfgangej Krausej přeco zepěra w žiwjenju. „Bóh tón Knjez, na njeho ženje njezabudź. Njemóžeš ženje hłubšo padnyć hač do Božeje ruki. Wón budźe tebje přeco słyšeć a lubować“, powěda 68lětny architekt we Wulkich Ždźarach wo dobrej radźe swo­jeje maćerje z dźěćacych dnjow. Jako chorobna sotra w Hórniskej chorowni w Essenje widźeše wona w Druhej swětowej wójnje njewuprajomnu bědu. Při mnohich bombowych nadpadach bě samo přeco zaso zapaladła wot třěchi chorownje wotstronjała. Jeho nan bě kubłany muler a kolpingowy wandrowski. Pola Stalingrada bu jako wojak zajaty. „Pozdźišo dóńdźe do Armenskeje“, rozprawja Wolfgang Kraus, „w jatbje by nimale zmjerznył a zahłódnił. Při pospyće, sej běrny z lěhwoweho wohenja wzać, jeho sowjetscy wojacy lepichu. Jako jeho z třělbišćom storkachu, wupadny jemu mały Chry­stusowy křiž z kapsy, štož jemu po zdaću žiwjenje wuchowa.“ Hnujacy powěda Wolfgang Kraus wo swojich staršich.

Sportowa redakcija Serbskich Nowin je najskerje prawy čuch měła, jako wozjewi wona wčera wobraz čěskeje profijoweje biatletki Markéty Davidoveje, kotryž nasta na swětowych mišterstwach w słowjenskej Pokljuce. Jako běchu nowiny runje z ćišća, postara so Davidová mjenujcy wo dotal najwjetši triumf w swojej hišće młodej karjerje. W Jablonecu nad Nisou rodźena sportowča bě w cilu na indiwidualnej distancy 15 km prěnja, a to bjez zmylka na třělnišću. Swětowe mišterstwa su w Pokljuce hišće hač do 21. februara. Z wčerawšim indiwidualnym wurisanjom žonow na 15 kilometrow maja atletki a atleća połojcu wubědźowanjow za sobu. Nětko slěduje hišće šěsć z cyłkownje dwanaće. Najwuspěšniši narod je Norwegska z třomi złotymi medaljemi a dwěmaj bronzowymaj.

10 km, sprint, 12.02.2021, čoło tabulki

1. Martin Ponsiluoma (SWE) 24:41,1

2. Simon Desthieux (FRA) +11,2

3. Emilien Jacquelin (FRA) +12,9

4. Johannes Dale (NOR) +22,4

5. Johannes Thingnes Bø (NOR) +22,5

6. Quentin Fillon Maillet (FRA) +23,9

7. Sturla Holm Lægreid (NOR) +25,7

8. Sebastian Samuelsson (SWE) +26,7

7,5 km, sprint, žony, 13.02.2021

1. Tiril Eckhoff (NOR) 21:18,7

2. Anais Chevalier-Bouchet (FRA) +12,0

3. Hanna Sola (BLR) +14,4

4. Denise Herrmann (GER) +22,3