Z wudaća: štwórtk, 18 februara 2021

Serbskich kubłanskich temow je tójšto, z kotrymiž so tež sakska Rada za serbske naležnosće zaměrnje zaběra. Nastupajo serbsku wučbu je so gremij za zesylnjenje modela 2plus wuprajił.

Budyšin (SN). Druhi raz lětsa su so čłonojo Rady za serbske naležnosće Sakskeje na swojim wčera­wšim posedźenju hłownje z kubłanskimi temami rozestajeli. Dale płaćiwych wobmjezowanjow koronapandemije dla woni znowa digitalnje wuradźowachu. Na zakładźe mnohich rozmołwow ze staršimi, wučerkami a wučerjemi, ze sakskim ministerstwom za kultus a dalšimi běchu w minjenych měsacach tójšto prašenjow a namjetow na wědomje brali. Wo tym informuje gremij w nowinskej zdźělence.

Drježdźany (dpa/SN). W Sakskej maja tele dny hišće 2 500 swobodnych šćěpjenskich terminow pře koronawirus. Problemy nastawaja při šćěpjenju ze serumom firmy Astrazeneca, kiž so za ludźi nad 65 lětami njehodźi a kotryž chcedźa tuž sobudźěłaćerjam strowotnistwa dać, kaž rěčnik Němskeho čerwjeneho křiža zdźěli. Tam pak najskerje njewědźa, zo maja hišće terminy za nich. Nimo toho šěrja so informacije, zo je šćěpiwo njespušćomne.

Wothłosowanje přetrał

Rom (dpa/SN). Nowy ministerski prezident Italskeje Mario Draghi je prěnje wothłosowanje wo dowěrje w parlamenće suwerenje přetrał. Wčera wječor hłosowaše 262 z přitomnych 304 zapósłancow za 73lětneho. Dźensa wječor slěduje wothłosowanje w druhej komorje parlamenta. Statny prezident Sergio Mattarella bě Draghija a jeho kabinet sobotu spřisahał. Po wustawje ma nowe knježerstwo w běhu dźesać dnjow w parlamenće prašenje dowěry stajić.

Wopominaja wopory

„Russian Desk“ spomóžnje za němsko-ruske hospodarske styki dźěła

Choćebuz (SN/at). Delnjołužiske přede­wzaća zajimuja so za hospodarske aktiwity w Ruskej. Za to maja wot lońšeho februara w Němsko-ruskej wonkownowikowanskej komorje (AHK) w Moskwje běrow za južnobraniborske hospodarstwo poboku. Běrow je wobstatk projekta „Russian Desk“, za kotryž móža w Choćebuskej Industrijnej a wikowanskej komorje (IHK) na naročne prěnje lěto skutkowanja zhladować.

Wo pozitiwnym faciće rěči projektowa koordinatorka IHK Natalija Ruda: „Naje­bać koronapandemiju smy 36 naprašowanjow němskich a ruskich předewzaćow wobdźěłali, w kotrychž je wo to šło kooperaciskich partnerow, dodawarjow a nowych rozšěrjenskich partnerow po­srědkować.“ Za knjeni Rudu su na přikład lobbyjowe dźěło a wobšěrne syće AHK, kotrež móža bjezpłatnje wužiwać, wulka podpěra. Kaž reprezentantka regiona južna Braniborska w Moskowskej wonkownowikowanskej komorje Marina Kalincjewa zwěsći, „naprašowanja přiběraja, runje tak poradźowanja nastupajo stejnišća“.

We wjacorych městach Španiskeje kaž tule w stolicy Madridźe su tysacy ludźi minjenu nóc znowa přećiwo zasudźenju hudźbnika Pabla Haséla protestowali. Při tym dóńdźe tež k zražkam z policiju. Sudnistwo je znateho rappera Haséla k dźewjeć ­měsacam jastwa zasudźiło, dokelž bě pječa monarchiju ranił a namóc wuchwalował. Foto: dpa/Manu Fernandez

Dźensa před 30 lětami, 18. małeho róžka 1991, je w sakskej statnej kencliji referat za naležnosće Serbow dźěłać započał. Referatny nawoda bě 1998 přezahe zemrěty dr. Simon Brězan. Jemu poboku bě wot měrca samsneho lěta Stanisław Brězan, kiž hač do přitomnosće zastojnstwo społnomócnjeneho za naležnosće Serbow – nětko w sakskim ministerstwje za wědomosć, kulturu a turizm – wukonja. Referat podsteješe spočatnje społno­mócnjenemu za zwjazkowe a europske naležnosće w statnej kencliji dr. Günterej Ermischej. Simon Brězan mjenowaše to w rozmołwje ze Serbskimi Nowinami kónc měrca 1991 „wonkownje dobre znamjo. Namakam wšudźe při wšěch problemach wulku přichilnosć nam Serbam napřećo. Nětko čakamy wšitcy – a za to tež dźěłamy – na skutki ze stron stata.“ Młody referat je na to zaměrnje přihotował zarjadowanje k wu­tworjenju Załožby za serbski lud wosom měsacow pozdźišo we Łazowskej cyrkwi.

Rěčny centrum WITAJ wobsteji mjeztym 20 lět. To je přičina, zaběrać so w rjedźe přinoškow z dźěławosću serbskeje institucije, kotraž je Domowinje přirjadowana. Milenka Rječcyna je so ze zamołwitej redaktorku časopisa Serbska šula (SŠ) Bianku Wjeńcynej z RCW rozmołwjała.

Su w lětach skutkowanja jeničkeho serbskorěčneho pedagogiskeho magacina łamki byli, a su hinaše wobsahi porno ­časej załoženja k tomu přišli?

Drježdźany (dpa/SN). Sakscy liberalni maja postupowanje nutřkowneho ministerstwa za wěstotne riziko w nadróžnym wobchadźe. Zo njesmědźa šoferojo z nahubnikom přidatnje słónčne nawoči wužiwać, Drježdźanskeho zapósłanca FDP Torstena Herbsta rozhorja. Nutřkowny mi­nister Roland Wöller (CDU) wobchadnej wěstoće skerje škodźi, wón rjekny. Winowatosć nahubnika w awće měli najspěšnišo zaso zběhnyć. Mnozy su na słónčne nawoči pokazani, hdyž jich słónco slepi, Herbst argumentuje. Ludźom słónčne nawoči w awće zakazać je nje­přicpějomne. Po najnowšich rjadowanjach dyrbja wšitcy w awće nahubnik wužiwać, hdyž cuza wosoba sobu jědźe. Nutřkowny minister ­Wöller bě wukazał, zo njesmědźa šoferojo w tym padźe ani słónčne nawoči ani čapku wužiwać.

Berlin (dpa/SN). Diety 709 zapósłancow zwjazkoweho sejma dyrbja po informacijach nowin lětsa 1. julija prěni króć scyła znižić. Přičina toho je loni wosłabjena konjunktura koronakrizy dla a z njej zwjazane woteběrace mzdy, kaž nowina Bild rozprawja. Po dotalnych wobličenjach Zwjazkoweho statistiskeho zarjada je tak mjenowany indeks nominalneje mzdy, na kotrymž so wuwiće dietow zapósłancow orientuje, w lěće 2020 wo 0,6 procentow woteběrał. Z toho wuchadźejo dyrbja zapósłancam tuchwilne diety 10 083,47 eurow brutto wo 60,50 eurow měsačnje znižić. Dotal běchu diety kóžde lěto přiběrali.

Brüssel (dpa/SN). Zakitowanscy ministrojo čłonskich krajow NATO wuradźowachu dźensa wo přichodźe wojerskeho zasadźenja w Afghanistanje. Kaž zwjazkowa zakitowanska ministerka Annegret Kramp-Karrenbauer (CDU) hižo do zahajenja konferency připowědźi, dźěše mjez druhim wo to, kak měli so mjezynarodni wojacy w kraju na přiběrace wohroženje ze stron talibanow nastajić. Tući běchu naposledk z „wulkej wójnu“ hrozyli, njedyrbjeli-li wšitcy wukrajni wojacy hač do 30. apryla Afghanistan wopušćić.

USA běchu talibanam w tak mjenowanym Dohaskim zrěčenju přilubili, zo wojacy hač do kónca apryla juhoaziski kraj wopušća. Za to běchu so talibanojo zawjazali, měrowe jednanja z knježerstwom w Kabulu zahajić a so dalšeje namocy wzdać. Jednanja z knježerstwom wostachu dotal bjez wuspěcha, tež na polu namocy njeje žanoho pozitiwneho wuwića. NATO chce tuž swojich wojakow dale w Afghanistanje wostajić. Němska je tam we wobłuku wukubłanskeje misije z 1 100 wojakami zastupjena.

Debatuja wo planowanych spěšnotestach na koronawirus wot měrca

Berlin (dpa/SN). Komuny a lěkarjo warnuja ludźi hladajo na wot zwjazkoweho knježerstwa připowědźene darmotne spěšnotesty na koronawirus před přewulkimi wočakowanjemi. Nichtó njesměł do toho wěrić, „zo budu wot 1. měrca wšudźe spěšnotesty we wulkej ličbje k dispoziciji“, rjekny hłowny jednaćel Zwjazka městow a gmejnow Němskeje, Gerd Landsberg Berlinskim nowinarjam.

Zahajene šćěpjenja su pokazali, zo je šćěpiwo organizować a rozdźělić „za miliony ludźi runočasnje mamutowy nadawk“, Gerd Landsberg potwjerdźi. Wón žada sej tuž „po schodźenkach postu­pować“. Hdyž njejsu spěšnotesty hišće w dosahacej ličbje k rukomaj, je jich zasadźenje w pěstowarnjach a šulach zmysłapołne. Zasadnje pak Landsberg připowědźenje zwjazkoweho knježerstwa wita, wot měrca wobydlerjam darmotne spěšnotesty poskićeć. „To je wažny signal nadźije nastupajo perspektiwy wotewrjenja šulam a pěstowarnjam kaž tež wobchodnikam, kulturnikam, hotelownikam a hosćencarjam.“