Z wudaća: póndźela, 22 februara 2021

Drježdźany (dpa/SN). Dźěćace přebywanišća Sakskeje dóstanu tutón tydźeń darmotne spěšnotesty na koronawirus. Nošerjo přebywanišćow maja přistajenych jónu wob tydźeń wot kubłaneho personala testować dać, doniž njeje dosć kmanych sebjetestow k dispoziciji. To je kultusowe ministerstwo minjeny pjatk připowědźiło. „Z prawidłownymi testami chcemy infekcije bjez symptomow spó­znać a rjećazy infekcijow přetorhnyć, štož je wažny přinošk za škit personala, dźěći a staršich před infekcijemi“, zdźěli sakski kultusowy minister Christian Piwarz (CDU). Při testowanskich nastrojach njejedna so wo tuchwilu wjele diskutowane sebjetesty, kotrež njejsu hišće w dosahacej měrje k dispoziciji. Tuž chcedźa přichodne tydźenje z dotal znatymi testami přemosćić, minister rjekny. Za to ma kubłany personal sliny z nosa brać, a wuslědk ma w běhu 15 mjeńšin předležeć. Zwjazkowy minister za strowotnistwo Jens Spahn (CDU) bě přilubił, zo maja sebjetesty za kóždeho hišće w měrcu w dosahacej měrje předležeć.

W dźesać dalšich zwjazkowych krajach wotewru zakładne šule a pěstowarnje

Berlin (dpa/SN). Zwjazkowa ministerka za kubłanje Anja Karliczek wita, zo su nětko dalše zakładne šule we wjacorych zwjazkowych krajach wotewrjene. „Je derje, zo šule zaso z wučbu započinaja“, rjekny wona powěsćerni dpa. „Prezencnu wučbu njemóžeš z ničim narunać.“ Politikarka CDU namołwješe, ze wšitkimi móžnymi srědkami rozšěrjenju koronawirusa zadźěwać, zo móhli šulsku wučbu tež přichodne tydźenje dale wjesć. Najnowše wuwiće infekcijow žada sej najwjetšu kedźbnosć, Karliczek wu­zběhny, pokazujo zdobom na „strach rozpřestrěća wirusowych mutacijow. Tón ma so w šulskej wučbje wobkedźbować.“ Ministerka pak je sej wěsta, zo zwjazkowe kraje při rozsudźe nastupajo wote­wrjenje šulow na to dźiwaja.

Pokazka na gripu a wumjetowanje, zo wona dawno „tajke činjenje“ njewuskutkuje, bě (a je) na aktualnych naprawach hygieny dwělowacym „argument“, po nich so njeměć a přećiwo nim protestować. A naša „swoboda“ jim to tež zmóžnja. Přiwšěm fachowcy wospjet na to skedźbnjeja, zo njehodźi so „sezonalna epidemija“ tak bjeze wšeho z tuchwilnej pandemiju přirunować. Z gripu dźě mamy nazhonjenja, eksistuja šćěpiwa a – hinak hač kowid-19 nastupajo – medikamenty. Dokelž pak so wiry podobnje rozšěrjeja, wobkedźbujemy efekt, zo njejstej – kóc, drač a garbar – nahubnik a wobmjezowanje kontaktow podarmotnej. Nimo mjenowanych lěkarjow a zastojnikow wobkrućeja to tež medicinarjo dalšich łužiskich chorownjow. Šef nuzoweje přijimarnje Wojerowskeho klinikuma Cyril Hančik samo namjetuje, dźěl naprawow „tež po krizy“ wobkedźbować. A scyła: Njeje da zasadnje mudre so jenož potom na puć nastajić, je-li to woprawdźe trjeba? Bosćan Nawka

Marcel Brauman z Łuha piše:

Dźakuju so za zajimawy přinošk „ka­tastrofalne wuswědčenje“ (wudaće SN minjenu wutoru) wo stejišću LfULG w zwisku z pytanjom za składom atomowych wotpadkow w Němskej.

Předsyda Domowiny Dawid Statnik je před dźesać dnjemi na naprašowanje serbskeho rozhłosa MDR k tematice pisał, štož bu tež wozjewjene: „Łužica njeje jenož žiwjenski rum Serbow a wšitkich sobuwobydlerjow, ale tež region, kotryž je w hoberskej změnje. Za přichodne lěta a lětdźesatki budźe wažne, nowe wizije tworić a je z pomocu změny strukturow zmištrować. Mamy dosć sćěhow ze zańdźenosće wudobywanja brunicy, njemóžemy tohodla hišće přidatnje tule problemy ze zańdźenosće atomowych milinarnjow druhich regionow rozrisać a atomowe wotpadki přewzać. To by dospołnje wopačny signal za tworjenje žiwjenskeje kwality přichoda a nowych perspektiwow za serbsku rěč a kulturu był.“

Z tym je Domowina swoju poziciju z lońšeje nazymy wobkrućiła, kotruž smy tehdom jako nowinsku zdźělenku šěrili. Medije, tež SN, su to na wědomje brali:

Słónčne wjedro z miłymi temperaturami je kónc tydźenja tež w Choćebuzu ludźi do přirody wabiło. Wulki bě nawal na tamniši zwěrjenc. Wopytowarjo pak běchu namołwjeni, wotstawk dźeržeć a nahubnik wužiwać. Dźakowne běchu přede­wšěm dźěći, zo móža zaso zwěrjata wobdźiwać. Zwěrjenc w Choćebuzu je wot 15. februara zaso přistupny. Zwěrjeće domy pak su dale zawrjene. Tež zjawne picowanja, wodźenja a dźěćace narodniny tam žane njepřewjeduja. Zastupne lisćiki předawaja zaso při kasy, zajimcy njetrjeba tuž hižo internetnje rezerwować. Gastronomiske zastaranje w formje přikuskow je zaručene, kaž z Choćebuza rěka. Foto: Michael Helbig

Na pastwje njedaloko Jitka pase so impozantnje skutkowace stadło howjadow. Po wšěm zdaću su wone zwučene, zo zajimcy ­stejo wostawaja a je fotografuja. Někotre su dosć wćipne a přińdu cyle blisko k płotej. Wosebje skutkowne su rohi kaž tež ­tuchwilu dosć tołsty kožuch, kotryž skoćata před zymu škita. Foto: SN/Hanka Šěnec

Grodkowske měšćanske zarjadnistwo a regionalni politikarjo zaběraja so tuchwilu intensiwnje z wobydlerskim domom w Grodku. Měšćanostka Christine Herntier (njestronjanka) na njedawnej nowinarskej konferency zwurazni, kak wažna naležnosć wobydlerjam města a dalšim je.

Grodk (JoS/SN). Andreas Bränzel (CDU), předsyda měšćanskeje rady, tohorunja wobkrući, zo wobsteji wulki zajim na tematice. „To pokazuje, zo so wobydlerjo z wuwićom swojeho města zaběraja. Čas diskusijow wo njerjanym blečku na torhošću je nimo“, wón wuzběhny, „smy so rozsudźili twarjenje saněrować, štož mamy za najbóle hospodarsne. To njejsu sej měšćanscy radźićeljo wumyslili, ale běše to dołhi proces z fachowym přewodom.“

Gmejna Njeswačidło chce so po terminjach měć a nadawki spjelnić

Njeswačidło (JK/SN). Njejsu to jeničce sakske komuny, ale wšitke po cyłej Němskej bědźa so z wotličenjom minjenych lět po nowym systemje dopik, někotre samo hišće ze zahajenskej bilancu k 1. januarej 2013, kotruž maja po zakonju nastajić. Tež Njeswačanski gmejnski zarjad je sej předewzał, swoje nadawki k postajenym terminam spjelnić a njelubowane financne rozprawy a bilancy sčasom předpołožić. Kónclětne wotličenje Njeswačanskeje gmejny za 2013 hakle w běhu 1. kwartala hotowe. Po tym zo su zahajensku bilancu dokónčili, steji na planje, kónclětne wotličenja wot lěta 2013 hač do 2019 zaměrnje zhotowić. To cyłu chwilu traje, wšako ma dokładne być a před krutym wóčkom oficialneho pruwowarja wobstać.

Něhdyši hotel „Husarenhof“ w Budyšinje je spotorhany. Dźěła nětko po dlěšej ­přestawce dale du. Ta bě posudka njetopyrjow dla trěbna. Bagry so mjeztym do zemje žeru, hdźež wurywaja twarsku dźěru za rozšěrjenje wobchoda. Foto: Carmen Schumann

Budyšin (CS/SN). Wšitke sydła na nowej žurli 3 Budyskeho kina su z foliju zakryte. Wot 2. nowembra je kino zawrjene. Jeho nawoda Andreas Schneider a jeho třo kruće přistajeni su w krótkodźěle. „Dźeržimy temperaturu na wšěch žurlach pola dźesać stopnjow, zo njebychu přejara wustudnyli“, wón rozłožuje, „tak tež sćěny plěsniwić njemóža. Andreas Schneider zaběra so nětko z dźěłami, kotrež su po zakónčenym saněrowanju a nowotwarje žurle 3 zbyli. Nimo toho ma na to dźiwać, zo płaći wšitke dochadźace zličbowanki. Spokojom wšak runje njeje, zo njemóže tuchwilu žanych wopytowarjow witać. „Nadźijam so, zo móžemy hnydom po jutrach zaso započeć filmy pokazować. Dorěčane je, zo wšitke kina po cyłej Němskej runočasnje dźěłać započnu. Andreas Schneider wjeseli so najnowši James-Bond-film a wě, zo tón hakle w oktobrje do němskich kinow přińdźe. Tež prjedy njesmědźa jón na Netflix abo druhich streaming-kanalach předstajić.