Sydom mutacijow wobkrućenych
Budyšin. W Budyskim wokrjesu je dotal 54 podhladnych padow na mutaciju koronawirusa. Sydom króć je sekwencija genoma podhlad wobkrućiła, štyri razy britisku mutaciju wirusa, kaž krajnoradny zarjad zdźěli. Wčera zwěsćichu tam štyri nowonatyknjenja a incidencu 87,33. Wokrjes Zhorjelc rozprawješe wo dalšej infekciji, wo wosom smjertnych padach a wo incidency 72,81.
Wjace swobodnych městnow
Budyšin. We wuchodnej Sakskej bě w februaru 19 833 bjezdźěłnych, 125 wjace hač měsac do toho. Kaž Budyska agentura za dźěło dźensa informuje, je dźěłodawarski serwis dohromady 733 nowych dźěłowych městnow zwěsćił, 113 wjace hač w januaru. Postup pokazuje, zo předewzaćeljo tež w tymle wužadowacym času sobudźěłaćerjow přistajeja.
Wšěch wučerjow šćěpić
Hodźeli so k jutram škitne naprawy korony dla zmjechčić, abo měli kruty kurs, kaž sej jón někotři nawodni politikarjo žadaja, podlěšić? Za tym a što sej čitarjo SN k lětušim jutram přeja, smy so naprašowali.
Sigrun Nazdalina z Němcow: Nadźijam so wolóženja naprawow k jutram, zo bychu so swójbni w mjeńšim kruhu wopytać móhli. Nimam pak za spomóžne wšitke wobmjezowanja zběhnyć. To by incidenca spěšnje zaso stupała. Jara přeju sej křižerjow dožiwić, tež hdyž we wobmjezowanym ramiku. Hłowna wěc, zo poselstwo zrowastanjenja wozjewjeja. Jutry bjez křižerjow, to něšto pobrachuje.
Marek Wuško z Hamburga: Su-li škitne naprawy přećiwo koronawirusej trěbne, měli wone tež přez jutry wostać. Njerozumju, zo chcedźa ludźo na kóždy pad do wukraja na dowol jěć, hdyž mamy tajke problemy. Jutry bych rady do Łužicy přijěł. Toho so hišće nadźijam.
Kamjenc (UM/SN). Lessingowy muzej w Kamjencu hlada do wjele lubjaceho přichoda, a to hnydom dweju přičin dla. Sprěnja změje institucija po planowanym přeměstnjenju Kamjenskeje měšćanskeje biblioteki do šulskeho nowotwara na tamnišej Wuchodnej prěni raz w swojich stawiznach Lessingowy dom cyle za sebje. Zdruha steji muzej na lisćinje wot Zwjazka w zwisku ze strukturnej změnu spěchowanych institucijow. „Loni kónc decembra dósta město Kamjenc připrajenje społnomócnjeneje Zwjazka za kulturu a medije Moniki Grütters (CDU), zo chcedźa přetwar Lessingoweho muzeja z dohromady 1,25 milionami eurow ze zakonja wo sylnjenju strukturow we wuhlowych kónčinach podpěrać“, wjeseli so wyši měšćanosta Roland Dantz (njestronjan).
Budyšin (SN/BŠe). Poprawom je Budyski Center na Žitnych wikach koronapandemije dla zawrjeny, ale wčera wječor běchu tam wobchody a wukładne wokna čerwjene wobswětlene. Akcija, wotměwaca so w nakupowanišćach po cyłej Němskej, měrješe so na ministerskich prezidentow zwjazkowych krajow, kotřiž budu na swojej jutřišej konferency wospjet nastupajo wobmjezowanje swobodneho pohibowanja wuradźować. Wikowarjo skedźbnjachu tak na swoje ćežke, eksistencu wohrožace połoženje. Drobnowikowarjo měli bórze zaso swoje wobchody wotewrěć směć. „Z akciju chcemy jasnje na to pokazać, kak wikowarjo ćerpja. Mnozy so boja, zo dyrbja swój wobchod cyle zawrěć. Nimo toho je wjele dźěłowych městnow wohroženych. Z njeličomnych přepytowanjow wuchadźa, zo so jara mało ludźi při nakupowanju natyknje. Tež Roberta Kochowy institut ma infekciske riziko za snadne“, zwurazni wčera manager Budyskeho centera Christian Polkow. Poskitk click & collect nima wón za woprawdźitu alternatiwu. Wšako kóšty za personal a wobhospodarjenje wobchodow wostawaja a wobrot njenarunaja.
Hochoza (SN/bn). „Witam was na prěni a nadźijomnje zdobom posledni ryzy digitalny zapust. Poprawom měli samo wo ‚super-zapusće‘ rěčeć, wšako njeswjeći lětsa kóžda wjes za sebje, ale radujemy so wšitcy zhromadnje.“ Z tajkimi słowami zahaji hłowny organizator a moderator Tobias Unger minjenu sobotu nimale pjećhodźinski program, kotryž je něhdźe 1 300 zajimcow online sćěhowało. Dohromady 16 młodźinskich a póstniskich zjednoćenstwow bě za njón filmowe nahrawanja zapodało. Z „hoberskeho mnóstwa VHS-kasetow“ kaž tež nowšich digitalnych natočenjow zestaja Unger wjacore widejowe kolaže, kotrež swjedźenske ćahi, reje a spěwy na přikład we Wjerbnje, w Bórkowach a Drjenowje něhdy a dźensa pokazuja. Mjez filmowymi přinoškami staraštej so Hochožanska Zmijowa kapała z dujerskej hudźbu a Choćebuska partyband Neo ze šlagrami a mjezynarodnymi hitami wo prawu póstnisku naladu.
Drježdźany (dpa/SN). Hladajo na jutřiše wuradźowanje zwjazkoweje kanclerki Angele Merkel (CDU) z ministerskimi prezidentami zwjazkowych krajow wo dalšim postupowanju w koronakrizy žadataj sej sakski minister za regionalne wuwiće Thomas Schmidt a ministerka za kulturu Barbara Klepsch (wobaj CDU) jasnu perspektiwu wotewrjenja za wikowanje, kulturu, gastronomiju a turizm. Njeměli na statistiske ličby incidencow dźiwać, ale na woprawdźite riziko natyknjenja. Tak hodźało so žiwjenje zaso normalizować, w zdźělence rěka.
Gorbačowej gratulował
Berlin (dpa/SN). Zwjazkowy prezident Frank-Walter Steinmeier je bywšemu šefej Krjemla Michailej Gorbačowej k dźensnišim 90. narodninam gratulował, dźakujo so jemu za wurjadnu rólu při znowazjednoćenju Němskeje. „Waše zmužite skutkowanje za měr a swobodu w Němskej nihdy njezabudźemy“, w lisće zwjazkoweho prezidenta rěka. „Budźemy Wam za Waš skutk wěčnje dźakowni.“ Zdobom zwuraznja Steinmeier nadźiju, zo so němsko-ruske poćahi zaso polěpša.
Rozsud skorigowali
Wopity wodźer nakładneho awta je w Porynsko-Pfalcy na stražu awtodróhoweje policije přišoł, zo by sej tam swoju jězbnu dowolnosć zaso wotewzał. Tu su jemu zastojnicy dźeń do toho sćazali, po tym zo běchu jeho na parkowanišću z třomi promilemi lepili. Dokelž běše muž přeco hišće alkoholizowany, přewjedźechu dalši test, kiž wunjese znowa wjac hač promil. Kaž so wukopa, bě šofer ze swojim Lkw-jom z 30 kilometrow zdaleneho parkowanišća na stražu přijěł.
Wospjetneje nócneje hary dla dyrbi muž w Londonje wjace hač 3 000 eurow pokuty płaćić. To je sudnistwo wukazało. Muž bě swojim susodam lěta dołho z nócnym karaoke-spěwanjom a rjemjeslniskimi dźěłami spar rubił. Wjace hač 150 skóržbow so tak nakopi. Namołwy zarjadow a samo sudniski termin wón prosće ignorowaše.