Z wudaća: srjeda, 31 měrca 2021

Incidenca trochu woteběrała

Budyšin. Wot jutřišeho płaći w Sakskej nowe škitne postajenje koronawirusa dla, přistupne pod . W Budyskim wo­krjesu rozprawjachu wčera wo sydom dalšich natyknjenjach, ličba smjertnych padow powjetši so wo dwaj na 801. RKI je dźensa incidencu 135,1 po­dał. W Zhorjelskim wokrjesu běchu wčera 103 nowoinfekcije, incidenca po RKI je tam dźensa 170,9.

Dźěłowe wiki zaso wožiwjeja

Budyšin. We wuchodnej Sakskej bě w měrcu 19 582 bjezdźěłnych, 251 mjenje hač měsac do toho. Kaž Budyska wotnožka agentury za dźěło dźensa informuje, je wjace wosobow swoju bjezdźěłnosć zakónčiło a nowe dźěło nastupiło. To zwisuje ze sezonalnym wožiwjenjom dźěłowych wikow. 4 731 socialneho zawěsćenja winowatostnych dźěłowych městnow je k dispoziciji.

Zwisk zasadnje polěpšić 

Křižerjo smědźa poselstwo wo zro­wa­sta­njenju Jězusa Chrystusa ­na konjach zaso wozjewjeć. Dźiwać pak maja ­we wšitkich procesionach na krute posta­jenja hygieny.

Budyšin (SN/JaW). W Hornjej Łužicy – w Budyskim kaž tež Zhorjelskim wokrjesu – mócne „haleluja“ křižerjow ­ lětsa ­zaso zaklinči. Wčera wječor rozsudźi to Budyski krajnoradny zarjad na wuradźowanju z hłownymi zamołwitymi jednotliwych procesionow. Kaž je prěni přirjadnik ­krajneho rady Udo Wićaz (CDU) ­po wuradźowanju w Budyskim krajnoradnym zarjedźe medijam zdźělił, bě zakład rozsuda, zo smědźa so křižerske procesiony wotměć, prawo wo swobodźe wěrywu­znaća. „Njeńdźe wo někajku show, njeńdźe wo wjeselo a turizm a tež nic wo tradiciju, štož hišće raz jasnje wuzběhnu. Dźe wo to zaručić zakładne prawa, kotrež su w artiklu 4 Zakładneho zakonja zapisane, mjenujcy swobodu wěrywuznaća, runje tak kaž so při demonstracijach mnozy na swobodu zhromadźowanja powołuja, a tajku dyrbimy w tymle času tež dowolić“, Wićaz rozłoži.

Wokrjes Budyšin chce wo dźělnym planowanju syće powołanskich šulow w Sakskej hišće raz jednać.

Wojerecy (KD/SN). Na minjenym wuradźowanju Budyskeho wokrjesneho sejmika we Wojerowskej Łužiskej hali je gremij noworjadowanje struktury powołanskich šulow w Sakskej rozjimał. Dotal njeje wokrjes naćiskej dźělneho planowanja šulskeje syće přihłosował.

Kaž prěni přirjadnik krajneho rady Udo Wićaz (CDU) rozłoži, chcychu wuwažene rozdźělenje powołanskošulskich poskitkow w bjezwokrjesnych městach a wo­krjesach docpěć. „To njeje so dotal poradźiło. Přewjele wučomnikow hišće w Drježdźanach, Lipsku a Kamjenicy wuknje. Tež wukubłanje na rěznika abo technikarja za mechatroniku w Budyskim powołanskošulskim centrumje (BSZ) bórze wjace móžne njebudźe. Tohorunja přichodne frizerki, kucharki a pjekarjo tam potom hižo wuknyć njemóža, byrnjež modernu techniku k dispoziciji měli“, rjekny Wićaz.

Njebjelčicy (SN). Serbski sejm Domowinje njepřistupi. To wuchadźa z lista předsydźe a Zwjazkowemu předsydstwu Domowiny, kaž zjednoćenstwo informowaše. Sejmarjo tam wopodstatnjeja, čehodla krok za nich do prašenja njepřińdźe. „Smy jasnje pokazali, zo njemóža ani diskusija wo přistupje ani rozdźělne měnjenja přičina być, nuznu a na fakty złožowacu so diskusiju k fatalnej situaciji serbskeho ludu w někotrych wažnych wobłukach dale přesuwać,“ rjekny starobna prezidentka Serbskeho sejma Edith Pjeńkowa. W swojim lisće přeproša Serbski sejm předsydstwo Domowiny na dalše rozmołwy bjez předwuměnjenjow.

Kónc wudobywanja brunicy we Łužicy a z nim zwisowaca strukturna změna tudyše komuny dźeń a bóle zaběratej. Wšako nadźijeja so na wjele milionow eurow.

Wojerecy (AK/SN). W zwisku ze strukturnej změnu chce město Wojerecy z wokolnymi komunami wušo hromadźe dźěłać. To podšmórny wyši měšćanosta Torsten Ruban-Zeh (SPD) na wčerawšim posedźenju měšćanskich radźićelow. „Industrijnišćo Čorna Pumpa je wobstatk Wojerec. Chcemy je hromadźe z gmejnami wuwiwać“, wón rjekny. Za to podpisa město Wojerecy wčera kooperaciske zrěčenje z Grodkom, z tamnišej saněrowanskej towaršnosću a z gmejnu Sprjewiny Doł.

Budyšin (SN). Informatiwne zetkanje čłonow zawodneje rady a zastupjerjow spartow Serbskeho ludoweho ansambla ze sobustawomaj předsydstwa Towaršnosće za spěchowanje SLA kónc zašłeho tydźenja bě „wažna kročel, změrować połoženje w ansamblu samym a w serbskej zjawnosći. Zaměr rozmołwy bě, pomhać tuchwilne konflikty rozrisać“, rjekny předsyda towaršnosće Sieghard Kozel. „Scyła nic a runje w času pandemije to serbskej kulturje njetyje, hdyž so we włosach mamy“, wón wuzběhny.

Nutrije so w Błótach dale rozmnožeja. Krótka, přiwšěm kruta zyma njeje ničo na tym změniła, zo prěnjotnje z Južneje Ameriki pochadźace hrymzaki so tule dźeń a bóle zadomjeja. W NDRskim času běchu je w regionje kožucha dla plahowali, tež recepty za jich mjaso plahowarjo w 1950tych lětach wozjewjachu. Moda pak kónc 20. lětstotka hižo žadyn zajim na nutrijach njeměješe. Z rozpušćenych plahowarnjow ćeknjene zwěrjata su so w někotrych kónčinach Němskeje mjeztym tak ­rozmnožili, zo maja je někotři za strašnu inwaziwnu družinu. Hižo 2016 su dwójce telko nutrijow zličili kaž dźesać lět do toho. Foto: Peter Becker

Drježdźany (dpa/SN). Skandal kradnjeneje municije pola sakskeje policije dla ma hišće do jutrow tema w krajnym sejmje być. Jutře planuja na žadanje koaliciskich frakcijow CDU, SPD a Zelenych wurjadne posedźenje nutřkowneho wuběrka, zdźěli powěsćernja dpa. Powěsć wo přepytowanjach statneho rěčnistwa přećiwo 17 zastojnikam wosebiteje jednotki krajneho kriminalneho zarjada je wčera wulki njeměr zbudźiła. Zastojnikam wumjetuja, zo běchu w nowembru 2018 znajmjeńša 7 000 patronow pokradnyli a z nimi priwatnje třěleć zwučowali.

Wo ruskim serumje rěčeli

Moskwa (dpa/SN). Zwjazkowa kanclerka Angela Merkel (CDU) a francoski prezident Emmaunel Macron staj z ruskim prezidentom Wladimirom Putinom wo móžnej kooperaciji na polu šćěpiwow rěčałoj. Europski zarjad za dohladowanje lěkow tuchwilu pruwuje, hač móhli koronaserum Sputnik V w EU zasadźić. Ruski farmakoncern R-Pharm chce šćěpiwo w bayerskim Illertissenje produkować.

Žadaja sej kruty lockdown

Słónčne wjedro a nalětnje temperatury njewabja ludźi tele dny jenož do přirody, ale tež do nutřkownych městow, kaž tule w Kölnje. Zamołwići su tuž runje we wulkoměstach škitne naprawy přećiwo koronawirusej wukazali, kaž winowatosć wužiwać ­nahubnik a dodźeržeć wěstotny wotstawk, štož wšak docyła tak jednore njeje. Foto: dpa/Christoph Hardt

Ze swojim žadanjom za jeničkim centom je Düsseldorfska agentura za dźěło zadźiwanje zbudźiła. Móličku sumu žada sej agentura wot Düsseldorfskeje maćerje, kotraž je dźělnje přistajena. Wona měješe agenturje 150,01 euro wróćić a bě to po 15 eurach wotpłaćiła. Zbytny cent chcyše agentura tež hišće měć, najebać kóšty za papjeru, porto a dźěło. „Tu je něšto křiwje běžało“, rěčnik zarjada přizna.

Swětłowy rjećaz z pismikami „SOS“ je starosćiweho wobydlerja w Bremerhavenje pohnuł policiju zawołać. Rjećaz na susodnym balkonje so wotpowědnje mjezynarodnemu škričkowemu signalej stajnje zaso zabłyskowaše, „trójce skrótka, trójce dlěje, trójce skrótka“, zastojnikaj na to zwěsćištaj. Wina na tym wšak běchu słabe baterije, kaž so spěšnje wukopa. Najebać to je policija mužej dźakowna: Snano by woprawdźe něchtó w nuzy był.