Z wudaća: wutora, 06 apryla 2021

wutora, 06 apryla 2021 14:00

Mrětwa tónkróć agresiwniša

Podstupim (dpa/SN). Ptača mrětwa je minjene měsacy w Němskej wjace škody zawinowała hač poslednja tajka w lětomaj 2016 a 2017. Wirus je tónkróć jasnje agresiwniši, štož plahowarjow pjerizny chětro starosći. Po cyłym Zwjazku dyrbjachu dotal něhdźe 1,8 milionow zwěrjatow zarězać, tehdy běchu tomu cyłkownje 1,2 milionaj. Šćěpjenje přećiwo wirusej aktualnje dowolene njeje, dokelž eksistuje přewjele typow. Tuž njeje tež wobšěrny škit přećiwo mrětwje móžny.

Šćěpja nětko tež w praksach

Berlin (dpa/SN). W Němskej zahaji so druhi schodźenk šćěpjenskeje kampanje přećiwo koronawirusej. Nětko smědźa tež domjacy lěkarjo ludźi šćěpić. Po cyłej Němskej steji w prěnim tydźenju za to 940 000 dozow k dispoziciji, štož woznamjenja 26 dozow na jednu praksu. Cyłkownje 35 000 lěkarskich praksow po cyłej Němskej so w druhim schodźenku sobu wobdźěli. Centralne přeprošenja za pacientow pak žane rozdźělene njebudu. Terminy praksy sami rjaduja.

Zahaja modelowy projekt

wozjewjene w: Politika
wutora, 06 apryla 2021 14:00

Za jutrowničku dźakowni

Wotrow (SN/MWj). Rańše wobjěchanje polow wjedźeše Wotrowskich jěcharjow lětsa do Kanec. Připołdnju wujěcha 81 křižerjow do Njebjelčic, před lětomaj bě jich 114. Mjez pjeć nowačkami bě kapłan dr. Jens Buliš. Dale mějachu pjeć slěbornych jubilarow. W Njebjelčicach drje so křižerjo na statoki podachu, přestawka pak bě tójšto krótša. Na dompuću w Serbskich Pazlicach jěchaše procesion runjewon a wjes trójce njewobjěcha. Kónčny nyšpor doma bě porno tomu cyle tradicionalny. Małe njezbožo sta so sobotu, jako při wujěchanju nowačk z konja padny.

wozjewjene w: Lokalka
Wojacy w Indoneskej pomhaja wobydlerjam z pomocu traktora dróhu přeprěčić. Wjacore katastrofy, kotrež su sylne zliwki ­minjene dny na wuchodźe kraja zawinili, tysacy ludźi potrjechja. Tójšto wobydlerjow je hišće zhubjenych. Mjeztym přizjewja oficialne zarjady 130 smjertnych woporow. Foto: picture alliance

wozjewjene w: Politika

Halena Jancyna njeje nowe wobličo w Budyskim krajnoradnym zarjedźe. Loni w oktobrje je wona tam wažne zastojnstwo wokrjesneho zarjadnistwa jako społnomócnjena za naležnosće našeho ludu nastupiła. Axel Arlt je z njej porěčał.

Njejsće so wo wupisane městno społnomócnjeneje za serbske naležnosće požadała. Kotre argumenty su Was přeswědčili zastojnstwo nastupić?

H. Jancyna: Dźěłam mjeztym šěsć lět we wokrjesnym zarjadnistwje, dotal na wšelakich městnach, čehoždla móžach swoje znajomosće wo dźěławosći zarjada a wo funkcionaliće polěpšić. Za městno społnomócnjeneje mějach wšitke trěbne kwalifikacije. A ći, kotřiž mje narěčachu, su mi přicpěli, zo wužadanja zmištruju. Wulka zamołwitosć, swójske agěrowanje a fachowe wotrjady přesahowace dźěło mje wabja. Móžu nětko časćišo swoju maćeršćinu nałožować, ju a serbske naležnosće šěrić.

Kak sće so zadźěłała, što bě Wam jako ­nazhonitej sobudźěłaćerce nowe?

wozjewjene w: Lokalka
wutora, 06 apryla 2021 14:00

Koordinowane – znajmjeńša!

Njeje prěni raz w stawiznach, zo Serbja swoje mocy w mjezsobnej zwadźe broja. Jako jedyn lud ze samsnymi problemami a kmanosćemi mamy wliw na zhromadny wosud, bóle dyžli hdy do toho. Njespušćmy přiležnosć, zo Serbski sejm jedna zhromadnje z Domowinu, znajmjeńša na koordinowane wašnje!

wozjewjene w: Diskusija
wutora, 06 apryla 2021 14:00

Wjesne tafle tež delnjoněmske

Schwerin (SN). Gmejny w Mecklenburgsko-Předpomorskej maja wotnětka składnosć, přidatnje k swojemu mjenu tež wotpowědne delnjoněmske mjeno na wjesnej tafli připrawić. Tamniše ministerstwo za infrastrukturu je wotpowědny wukaz přidatnu taflu nastupajo wšitkim wokrjesam a bjezwokrjesnym městam připó­słało. „W krajnej wustawje je zakótwjene delnjoserbšćinu spěchować. Tale rěč pak je dale a bóle pisomna a nic wjace ertna. Zo by ju we wědomju předewšěm młodych ludźi zaso bóle zadomił, je kraj ­wšelake naprawy zahajił“, wobchadny minister Christian Pegel (SPD) nowe rja­dowanje wopodstatnja. Krajny sejm bě knježerstwo kraja loni namołwjał pru­wować, hač je připrawjenje přidatneho mjena na wjesnych taflach prawnisce móžne. „Tomu smy wotpowědowali“, Christian Pegel potwjerdźa. Gmejny móža nětko próstwu wo přidatnu taflu na wobchadnym zarjedźe zapodać.

wozjewjene w: Politika
wutora, 06 apryla 2021 14:00

Poselstwo budźi nadźiju

Münster (B/SN). „Hdyž je Chrystus smjerć předobył, budźe tež nam móžno bój přećiwo koronawirusej dobyć.“ Takle Münsterski biskop Felix Genn z pomocu jutrowneho widejoweho poselstwa wjetšu nadźiju budźi. „We wobłuku cyrkwje so wjele ludźi čestnohamtsce angažuje. Dźakuju so wšěm, kotřiž staraće so wo chorych, starych a wosamoćenych a pokojeće mrějacych“, praji Genn, kiž zdobom kubłarki a kubłarjow kaž tež wučerki a wučerjow do swojeho poselstwa zapřijima. Wosebity dźak wupraja wón swójbam kaž tež samostejacym za starosć wo swoje dźěći a hladanje potrěbnych swójbnych. Biskop wěriwych namołwja „njespušćić nadźiju, zo koronu přewinjemy“.

Rozprawja wšědnje wo bamžu

wozjewjene w: Cyrkej a swět
wutora, 06 apryla 2021 14:00

Abitura móžna?

Berlin (dpa/SN). Dźěłarnistwo za kubłanje a wědomosć GEW sej žada, zo měli lětsa koronapandemije dla abiturne pruwowanja wupadnyć. Prezidentka konferency kultusowych ministrow Britta Ernst (SPD) pak je skerje zdźeržliwa. „Wšitcy dźěłaja na wuměnjenjach, pruwowanja wěsće přewjesć. Nichtó njeměł młodostnych znjeměrnić“, wona wuzběhny. Tež němski zwjazk wučerjow je so přećiwo namjetej wuprajił. Hižo loni wšak bu dopokazane, zo bě rozsud prawy, abiturne pruwowanja přewjesć. Po informaciji powěsćernje dpa chcedźa kultusowi ministrojo krajow štwórtk wo połoženju wuradźować.

wozjewjene w: Politika
wutora, 06 apryla 2021 14:00

Laschet za přechodny třeći lockdown

Düsseldorf (dpa/SN). Z wida sewjerorynsko-westfalskeho ministerskeho prezidenta Armina Lascheta (CDU) je nuznje přechodny lockdown trěbny, kotryž měł dwaj do tři tydźenje trać. Hižo nětko je wotwidźeć, zo budźe w běhu krótkeho časa dwaceći, po tym třiceći, štyrceći ­procentow němskeje ludnosće šćěpjene, rjekny šef zwjazkoweje CDU dźensa rano w rańšim magacinje sćelaka ZDF. Wědomostnicy wšak radźa, zjawne žiwjenje redukować. Mjeztym pak je namjet Lascheta wulku skepsu zbudźił, wšako njeje Armin Laschet konkretne naprawy mjenował. Dale wupraji so wón za konferencu ministerskich prezidentow hišće tónle tydźeń. Poprawom je zeńdźenje 12. apryla předwidźane.

Tendenca nowych infekcijow je tuchwilu niska. Tole pak zwisuje z jutrownymi swjatymi dnjemi, hdźež je so mjenje ludźi testowało. Na intensiwnych ­stacijach pak je zaso wjace pacientow. Strowotniske zarjady w Němskej su ­Roberta Kochowemu institutej dźensa 6 885 nowych infekcijow přizjewili.

wozjewjene w: Politika
wutora, 06 apryla 2021 14:00

Dźak za disciplinu

Po lěće přestawki běchu woni zaso po puću – křižerjo. Bohu dźak, měnju znajmjeńša ja jako křižer. Wšako přinjesemy ludźom tež w času koronapandemije nadźiju a zdobom tróšt. Wěm tež, zo je hinašich měnjenjow. Přiwšěm pak móžemy dokumentować: Křižerjo su pod wobmjezowanjemi po puću byli a nimale kóždy je so po nich měł. Dźakuju so křižerjam, pomocnikam a pomocnicam za krutu disciplinu. Disciplinowani běchu zdobom přihladowarjo. Předewšěm pak dźakuju so hłownym kantoram, kiž su křižerske procesiony scyła zmóžnili. Tole sym tele dny časćišo tež wot domoródnych a hosći słyšał. Za tohorunja pozitiwne mam, zo su wšitcy křižerjo sprawnje sebjetest přewjedli a tež nahubnik wužiwali, hdyž na konju njesedźachu. Jutry 2021 běchu bjezmała wulkotne dožiwjenje solidarity a pomocy, kotruž su křižerjo nazhonili, kotrychž běchu dobrowólni w přestawkach wuběrnje zastarali. Wutrobny dźak tuž wšěm za prócu a disciplinu. Janek Wowčer

wozjewjene w: Politika

nawěšk

SERBSKE NOWINY podpěruja:

Novi Sad – kulturna stolica Europy

  • Pnačičanski procesion - Die Panschwitzer Prozession.
  • Kulowscy křižerjo - Die Witticheunauer Kreuzreiter.
  • Njebjelčanscy křižerjo – Die Nebelschützer Verkündigungsprozession.
  • Chróšćanski křižerski procesion - Die Crostwitzer Osterreiter.
  • Baćonscy křižerjo - Osterreiter in Storcha
  • Ralbičanscy křižerjo - Die Ralbitzer Osterprozession.
  • Baćonscy křižerjo - Osterreiter in Storcha

nowostki LND