Z wudaća: srjeda, 14 apryla 2021

Wysoka incidenca dale traje

Budyšin. Wo dalšich jědnaće smjertnych padach w zwisku z koronawirusom je Budyski wokrjes wčera informował, nimo toho bě 16 nowonatyknjenjow. RKI zdźěli dźensa rano za minjene sydom dnjow 232,5 infekcijow na 100 000 wobydlerjow. 134 infekcijow a šěsć zemrětych zwěsćichu hač do wčerawšeho w Zhorjelskim wokrjesu. Tam wučinja aktualna incidenca po RKI 189,1.

Kandidatow nominowali

Lipsk. Jury za Myto Lipšćanskich knižnych wikow je mjena 16 kandidatow za wuznamjenjenje wozjewiło. Za beletriju su to Iris Hanika („Echos Kammern“), Judith Hermann („Daheim“), Friederike Mayröcker („da ich morgens und moosgrün. Ans Fenster trete“), Helga Schubert („Vom Aufstehen: Ein Leben in Geschichten“) a Christian Kracht („Eurotrash“). Přepodać chcedźa myto 28. meje.

Wjace studijnych městnow

Chłódnych temperaturow dla so dźěła na polach přiwšěm trochu dlija

Haslow/Chrósćicy/Radwor (SN/BŠe). Byrnjež nalěćo było, je za ratarjow tele dny trochu přezyma, zo móhli so porjadnje gratu přimać. Pilnje podźěłali lětsa přiwšěm hižo su, wšako je nalětni wusyw nimale zakónčeny.

Znajmjeńša na polach wokoło Haslowa tomu tak je, kotrež Matthias Rebiš z ratarskeje towaršnosće Při Čornicy wobhospodarja. „Mak, wows, hroch a žonop smy mjeztym wusyli“, wón rozprawja. Spadkow je so minjene měsacy dosć našło, tak zo móža so rostliny poprawom derje wuwić. Tež loni nazymu wusyte nětko schadźeja. Krutu zymu su rostliny tohorunja přetrali, tak zo njeje na polach žanych škodow. „Wšitko dotal jara derje wupada, hačrunjež je w delnich worštach pódy hišće deficit wody. Liču z tym, zo budźe so to potom w lěću zaso wuskutkować“, ratar wuswětla.

Berlin/Budyšin (SN). Spjelnić nadawki, kotrež wurostuja z Europskeje charty wo regionalnych a mjeńšinowych rěčach steješe póndźelu a wčera w srjedźišću internetneje „implementěrowanskeje konferency“ zwjazkoweho ministerstwa za nutřkowne naležnosće (BMI). Tam poda ministerstwo 7. rozprawu wo spjelnjenju nadawkow. Domowina jako zastupnica Serbow je w „mjenje serbskeho ludu pisomne stejišćo zapodała a w nim wosebje na potrjeby na polu kubłanja skedźbniła“, informuje nowinski rěčnik Domowiny Marcel Brauman.

Tuchwilu staraja so w Błohaščanskej zwěrjatowni wo poměrnje mało kóčkow, psow, nuklow a wozdobnych ptakow. Přičina je pandemije dla wulke naprašowanje za domjacymi zwěrjatami. Pjenjezy wšak přiwšěm wyše nimaja. Nawopak: Zwěrjaca pensija, kotraž najwjetši dźěl dochodow zaruča, wokomiknje wulce prašana njeje. Tež dary njestajnych wopytowarjow tele dny skerje snadnje dochadźeja. Dohromady nałožuja něhdźe 205 000 eurow wob lěto, zo bychu na přikład skótnych lěkarjow, picu a mzdu sobudźěłaćerjow zapłaćili. Štóž chce instituciju podpěrać, ma k tomu mjez druhim přez nakup na platformje gooding.de přiležnosć. Foto: SN/Hanka Šěnec

Drježdźany/Kamjenc (SN). Skerje pozitiwny wliw ma po zdaću koronapandemija na počesćenja we wobłuku Lessingoweho myta. Sakski kabinet je na swojim wčerawšim posedźenju nowu wersiju statuta Lessingoweho myta wobzamknył, po kotrymž hodźa so město dotal dweju nětko tři Spěchowanske Lessingowe myta spožčić.

„Z tejle změnu móžemy runje w lěće 2021 hladajo na koronakrizu třoch wuměłcow wuznamjenić a jich zdobom podpěrać“, rjekny statna ministerka za kulturu a turizm Barbara Klepsch (CDU). Kaž wona wuzběhny, změje kuratorij tak wěstu fleksibelnosć. Wšako „mjez kreatiwnymi a jónkrótnje namjetowanymi wuzwolić woprawdźe lochko njeje“. Kuratorijej je po nowym statuće zdobom přewostajene, zo za spěchowanske myta předwidźane 15 000 eurow po swojej ­woli na lawreatow rozdźěli. Hłowne myto je z 20 000 eurami dotěrowane.

Spožčić tři spěchowanske myta město dweju bě kuratorij na posedźenju k pomjenowanju lawreatow Lessingoweho myta namjetował, kaž z přisłušneho ­ministerstwa rěka.

Strategije za inwentarizaciju lokalnych muzealnych zběrkow kulturneho herbstwa wuwiwać je zaměr dźělneho projekta dr. Roberta Lorenca we wobłuku předewzaća Serbskeho instituta „Hódnoćenje imaterielneho kulturneho namrěwstwa Delnjeje Łužicy w němsko-serbskim konteksće“. Wčera wotmě so prěnja z dweju zakónčaceju dźěłarničkow pod hesłom „Zběrać! A w přichodźe?“.

Choćebuz (SN/CoR). Kak činja to poprawom Wuchodni Frizojo? Wo inspiraciju 17 wobdźělnikow webinara, pochadźacych hłownje z muzealnych zarjadnišćow ze zwjazkarstwa Łužiski muzejowy kraj (ŁMK), je so wčera jednaćelka Muzejoweho zwjazka Wuchodna Friziska dr. Nina Hennig starała. Do toho je koordinator dźěłoweho kruha ŁMK Sven Vogt skrótka wuwiće zběrkow po towaršnostnym přewróće předstajił a dźensniše problemy mjenował: zo maja čestnohamtsce skutkowacy profesionalnje dźěłać, zo njeje jasne, po kotrych kriterijach ma so zběrać a zo digitalna inwentarizacija hišće wšudźe z wašnjom njeje.

Drježdźany (dpa/SN). Sakska postajenja koronawirusa dla a tak tež lockdown podlěša. Tuchwilne rjadowanja najprjedy raz dale hač do 9. meje płaća, kaž je ministerka za strowotnistwo Petra Köpping (SPD) wčera w Drježdźanach po posedźenju krajneho knježerstwa zdźěliła. Wočaknyć chcedźa tuž diskusiju mjez Zwjazkom a krajemi. Tuchwilne škitne postajenja koronawirusa dla bychu njedźelu, 18. apryla, wuběželi.

Zakaz kontraproduktiwny

Düsseldorf (dpa/SN). Slědźer na polu erozolow Gerhard Scheuch warnuje, ludźi ze zakazom, dom wopušćić, do nutřkownych rumnosćow nuzować. Tam je strach, so z koronawirusom natyknyć, wjele wjetši hač wonka. Z planowanym cyłoněmskim „nuzowym borzdźidłom“ zwjazany wukaz, dom mjez 21 a 5 hodź. njewopušćić, je z fachoweho wida kontraproduktiwny, rjekny Scheuch dźensa rano w rozhłosu WDR. Wodźacy slědźerjo na polu erozolow běchu so hižo minjene dny na zwjazkowe knježerstwo wobroćili a sej změnu kursa žadali.

Biden Putina zazwonił

Přiwisnicy hibanja prěkimyslerjow su wčera njedaloko Reichstaga přećiwo wobmjezowanjam koronawirusa dla protestowali. Samsny čas wotmě so w bliskim kanclerskim zarjedźe posedźenje zwjazkoweho knježerstwa, kotrež wuradźowaše wo dalšim přiwótřenju ­naprawow, mjez druhim wo wukazu, w nocy dom njewopušćić. Foto: pa/Jean MW/Geisler-Fotopress

Swětowy rekord w skakanju přez rynku nastajił je mały čorny ameriski cockerspaniel Gil w Hannoveru, kaž Němski institut rekordow wobkrući. Trenarka Jutta Gaßmann ma wotnětka wopismo z připóznatymi 43 skokami Gila w běhu 60 sekundow. Žadane bě znajmjeńša 20 skokow w nowowunamakanej disciplinje.

Žarowanskeje swjatočnosće za zemrě­teho britiskeho princa Philipa so zdalować, wo to prosy měšćanosta Windsora njedaloko Londona. Ludźo dyrbjeli hladajo na koronapandemiju na swoju strowotu a na strowotu druhich dźiwać, praji měšćanosta John Story. Nimo toho wón na to skedźbnja, zo wotměja so wšitke wobrjady, tež procesion, za murjemi ­hrodu a zo wopytowarjo ničo njewidźa. Žarowanska swjatočnosć za minjeny pjatk zemrěteho princa budźe sobotu.

Budyšin (SN). Financne połoženje Sakskeje steješe w srjedźišću wčerawšeho stajneho blida Budyskeho měšćanskeho zwjazka CDU, kotryž je so koronapandemije dla digitalnje wotměł. Jako hosća přeprosyli běchu sej zapósłanca CDU w Sakskim krajnym sejmje Marka Šimana. Tón wobdźělnikam rozłoži, zo spytaja zamołwići w Drježdźanach najebać koronakrizu solidny etat nastajić. Etat za lětsa wučinja 21,2 a za klětu 21,7 miliardow eurow. Dawkowych stratow koronakrizy dla dyrbi swobodny stat nowy kredit dweju miliardow eurow brać, Šiman rjekny. Na prěnim městnje wudawkow steji wobłuk kubłanja. Dalše ćežišći stej nutřkowna politika a spěchowanje hospodarstwa. Zo bychu wěstotu dale polěpšili, chcedźa ličbu policistow w Sakskej přichodne lěta na 15 000 powjetšić a tež wohnjowe wobory dale sylnić, wosebje škit před katastrofami nastupajo.