Z wudaća: póndźela, 10 meje 2021

póndźela, 10 meje 2021 14:00

Trěbna diskusija

Hodźij (mm/SN). Na swojej hłownej zhromadźiznje wuradźowachu sobotu zastupjerjo dwurěčnych ewangelskich wosadow wo swojim přichodnym dźěle. Prěni króć wotměchu lětne schadźo­wanje Serbskeho wosadneho zwjazka napra­wy hygieny wobkedźbujo w Hodźijskej cyrkwi. Na reformaciskim dnju, 31. oktobra 2020, bu tudyši farar Krystof Rummel do zastojnstwa Serbskeho superintendenta zapokazany. W swojej rozpra­wje wón wuzběhny, zo bě loni 20 serbskich bohosłužbow w Michałskej, Poršiskej a Hodźijskej wosadźe, wjacore dwurěčne kemše běchu w Bukecach, Rakecach, Malešecach, Slepom a Wojerecach. Koronapandemije dla dyrbjachu wšelake zarjadowanja wupadnyć, mjez druhim serbski ewangelski kónc tydźenja a swójbne pućowanje. Lětsa pak chcedźa jej přewjesć, a to nazymu. Dalšej srjedźodobnej projektaj stej rewizija serbskeho lekcionara a spěwnik za dźěći a młodostnych. Městopředsyda Mato Krygaŕ hódnoćeše diskusije minjenych měsacow wokoło wutworjenja nowych wosadnych strukturow jako trěbne a intensiwne.
wozjewjene w: Politika
póndźela, 10 meje 2021 14:00

Wulka hańba za Delnjołužičanow

FC Energija Choćebuz – SV Babelsberg 03 0:3 (0:1)

Zestawa domjacych: Stahl – F. Brügmann (81. Rahn), Böhmert, Borgmann, Koch, Erlbeck, Hasse (70. Stettin), Eisenhuth (61. Geisler), Hofmann, Kujović (46. Postelt), F. Brügmann

W połfinalu krajneho pokalneho koła Braniborskeje mějachu koparjo FC Energije Choćebuz wčera SV Babelsberg 03 za ho­sća. Byrnjež wobaj cyłkaj w samsnej klasy hrałoj, běštej wukonaj hosćićela a přećiwnika chětro rozdźělnej. Z njepřestajnym pressingom njeje hósć Choće­bužanam žanu šansu k swójskej hrě dał. Wosebje wulke starosće mějachu domjacy ze standardami. Prěnje wrota pad­nychu po preciznje třělenym róžku, kotryž Sven Reimann bjez mylenja do syće zhłójčkowa (10.). Jako Lukas Wilton wólny kop z kromy šěsnatki do směra na wrotarja Tonija Stahla třěli, skoči Jonas Böhmert njetrjebawši horje, a bul lećeše pod murju k 0:2 (66.) do čorneho. Wrota čisło tři běchu najrjeńše dnja. David Danko třěli kulowatu kožu z praweje strony ze zdalenosće 16 metrow na wrota, hdźež přizemi ta w dołhim kuće.

wozjewjene w: Sport
póndźela, 10 meje 2021 14:00

Borzdźidło ma dlěje płaćić

Mnichow (dpa/SN). Bayerski ministerski prezident Markus Söder (CSU) ma za móžne, zo zwjazkowe nuzowe borzdźi­dło koronawirusa dla po juniju dlěje płaćić da. „Bój přećiwo pandemiji na zakonskim zakładźe traje hač do 30. junija. Jenož,­ dokelž so zakoń skónči, njeje pandemija tola nimo“, rjekny Söder Mnichow­skim nowinarjam. Tež hdyž zdawa so třeća­ žołma pod kontrolu być, njesměli so slepić dać. „Hišće njejsmy dobyli.“

„Lubowacych“ žohnowali

Köln (dpa/SN). Po wšej Němskej su so dźensa „žohnowanske kemše za lubo­wacych“ w katolskej cyrkwi wotměli. Na nich­ chcychu tež homoseksualne poriki žohnować, byrnjež to Vatikan hakle njedawno wuraznje zakazał. Cyłkownje planowachu něhdźe sto Božich mšow, prěnje běchu hižo wčera. Akcija tajkeho rozměra je dotal jónkrótna. Předsyda Němskeje biskopskeje konferency Georg Bätzing iniciatiwu kritizuje: „Žohnowanske Bože słužby so jako instrument protesta njehodźa.“

Šćěpiwo za nad 60lětnych

wozjewjene w: Politika
póndźela, 10 meje 2021 14:00

Po šćežce Ćišinskeho po puću była

Sobotu, 1. meje, wužiwach rjane wjedro a składnosć, podać so z mandźelskim a lubej přećelku na nowu šćežku Ćišinskeho. Słyšała běch wo njej w Serbskim rozhłosu. Wulke překwapjenje: Při bu­sowym zastanišću w Kukowje a zdobom na prěnjej staciji tohole pućika zho­nichmy, zo móžemy jeničce z handyjom kročić po šćežce kotruž je wjele razow nam tak česćeny serbski basnik Jakub Bart-Ćišinski wužiwał.

Nowa taflička přeprosy nas ze „zaskenować a dožiwić!“, a dachmy sej to lubić! Rozsudźić dyrbjachmy so mjez štyrjomi wariantami: němsce, serbsce za dźěći, serbsce za młodostnych abo serbsce za dorosćenych. Poslednja sta so z našim wuběrnym přewodźerjom. Nic jenož, zo přeswědči nas wot wšeho spočatka rozmołwa mjez basnikom Jakubom Bartom a přijomnje wćipnej žónskej. Tale hra mjez krasnym sonarnym muskim a cunim žónskim hłosom wabi dokładnje posłuchać. We wuběrnej a zrozumliwej serbšćinje (paralelnje w dobrej němčinje) předstajataj wonaj městna w bliskej wokolinje, kotrež běchu wažne w žiwjenju a za skutkowanje Ćišinskeho.

wozjewjene w: Serbski powěstnik
Tójšto ludźi je wčera k sowjetskemu wopomnišću w Berlinskim Treptowym parku přišło, zo bychu so na swjatočnosći skład­nostnje 76. róčnicy kapitulacije hitlerskeje Němskeje wobdźělili. W ruskej stolicy Moskwje přewjedźechu w samsnym času wulku wojersku paradu. Wopomnjenske zarjadowanja wotměchu so tež w Kamjencu, Wojerecach a Budyšinje. Foto: dpa/Jörg Carstensen

wozjewjene w: Politika
póndźela, 10 meje 2021 14:00

Namóc a wjetša nuza hrozytej

Freiburg (B/SN). Cofnjenje wojerskich jednotkow NATO z Afghanistana hódnoći Caritas international jako bědu a nuzu za ludźi w kraju. „Z humanitarneho wida je přechwatany wotćah hotowa katastrofa“, praji Oliver Müller, nawoda pomocneho skutka. NATO bě krótkodobnje wobzamknyła, zo hižo 1. meje z wotćahom započina. Hač do septembra ma 10 000 wojakow Afghanistan wopušćić, mjez nimi něhdźe tysac němskich. „Wšitko, štož je so minjene lěta docpěło, je nětko wohrožene“, měni Oliver Müller. Hrozy wulki strach, zo dóńdźe k dalšej eskalaciji namocy a k hišće wjetšej nuzy w kraju. Ludźo su hižo nětko w nimale wšitkich wobłukach žiwjenja na pomoc wotwonka pokazani. W Afghanistanje su nimale wšitcy wobydlerjo muslimskeje wěry. Romsko-katolskich křesćanow tam talibanojo dale přesćěhuja.

Boha hanić zakazane

wozjewjene w: Cyrkej a swět
póndźela, 10 meje 2021 14:00

Wotpokazuja słowa předsydy

Budyšin (SN). Z wótrej kritiku je so Bu­dyske wokrjesne předsydstwo Zelenych wot wuprajenja frakciskeho předsydy Zele­nych w Budyskim wokrjesnym sejmiku, Siegfrieda Kühna nastupajo zhromadne dźěło z AfD distancowało. No­wina Die Zeit bě Kühna ze słowami citowała: „Stanje so drje zrědka, tola hdyž AfD z mojeho wida rozumny namjet předpołoži, wězo swoju ruku zběhnu.“ Wokrjesne předsydstwo wuprajenja frakciskeho předsydy wotpokazuje a je přeswědčene, zo njeměło žanych zhromadnych namjetow, kooperacijow a přihłosowanjow k namjetam AfD być. Tale strona je po słowach wokrjesneho předsydstwa ludźi a demokratiju zacpěwaca z čłonami, kotřiž přisłušeja identitarnemu a prawicarskemu hibanju. Wokrjesne předsydstwo Siegfrieda Kühna namołwja, swoje wuprajenja zjawnje cofnyć.

wozjewjene w: Politika
póndźela, 10 meje 2021 14:00

Drosten: W lěću wjele móžno

Berlin (dpa/SN). Wirologa Christian Dro­sten­ z Berlina je optimistiski hladajo na wuwiće koronapandemije w lěću. „Myslu sej, zo změjemy w juniju efekty, kotrež móžemy šćěpjenju připisać“, rje­kny direktor wirologije na Berlinskim uniwersitnym klinikumje Charité wčera wječor w telewiziji ZDF. „W lěću móže w Němskej cyle derje wupadać.“ Runje we wonkownych wobłukach drje budźe zaso tójšto­ móžno, rjekny Drosten prašany za do­wolom, wonkownej gastronomiju a grilowanjom z přećelemi. Zdobom wón warnowaše, zo njesměli ludźo potom hnydom do „totalneje euforije“ padnyć.

wozjewjene w: Politika
póndźela, 10 meje 2021 14:00

Scholz jako kandidat wobkrućeny

Berlin (dpa/SN). Škit klimy, dobre dźěło a sprawnosć steja w srjedźišću programa SPD k wólbam zwjazkoweho sejma: De­legaća digitalneho stronskeho zjězda su wólb­ny program socialdemokratow schwalili a Olafa Scholza ze 96,2 procentomaj jako kanclerskeho kandidata wobkrućili. Nawodnistwo strony bě jeho hižo loni w awgusće za kandidata namjeto­wało. Do wothłosowanja prošeše Scholz delegatow wo podpěru a skedźbni na swoje wobšěrne nazhonjenja jako bywši wyši měšćanosta a financny minister.

Z raznymi słowami na CDU a CSU bě generalny sekretar SPD Lars Klingbeil zjězd zahajił. „Unija, kotrejež wodźace mocy Karliczek, Altmaier a Scheuer rěkaja, tajka unija njesměła w knježerstwje być, rjekny Klingbeil hladajo na ministrow CDU a CSU. Cyłkownje 600 dele­gatow bě digitalnje přišaltowanych.

Klingbeil wumjetowaše křesćanskimaj stronomaj aferu škitnych nahubnikow dla a brutalne rozestajenje wo móc. „Tale unija je na kóncu. Je tuž lěpje, zo wona hižo sobu njeknježi.“

wozjewjene w: Politika
póndźela, 10 meje 2021 14:00

Nawoda manko pomjenował

Serbski sejm wo serbskich aktiwitach w biosferowym rezerwaće zhonił

Stróža pola Hućiny (SN/at). 8. meja 1945 jako dźeń wuswobodźenja z fašizma bě wuchadźišćo, wožiwić wšo serbske žiwjenje po brunej dobje w Němskej. Na po­sedźenju Serbskeho sejma předwčera­wšim w Stróžanskim šulskim muzeju „Korla Awgust Kocor“ dopominaše Hajko Kozel na tehdyše pospyty serbsku kulturu wutupić a na to, što wuswobodźenje Serbam woznamjenja.

wozjewjene w: Politika

nawěšk

SERBSKE NOWINY podpěruja:

Novi Sad – kulturna stolica Europy

nowostki LND