Z wudaća: póndźela, 10 meje 2021

póndźela, 10 meje 2021 14:00

Krótkopowěsće (10.05.21)

Farar Clemens Hrjehor zemrěł

Kamjenc. Wčera nawječor je w Kamjenskej chorowni maltezow swj. Jana serbski měšnik Clemens Hrjehor zemrěł. 1953 rodźeny Hrjehor bě z kapłanom w Chrósćicach a Radworju, hdźež sta so 1984 z fararjom. 1997 wróći so do ród­neje Chróšćanskeje wosady jako farar. Zdobom skutkowaše jako Budyski dekan. W lětomaj 1999 a 2000 bě wón předsyda rady Załožby za serbski lud. Wot 2015 hač do me­je 2020 wukonješe farar Hrjehor w Kamjenicy nadawki propsta.

Incidenca dale wokoło 200

Budyšin. W Budyskim wokrjesu su minje­ny pjatk a sobotu wo 188 natyk­njenjach z koronawirusom rozprawjeli. Techniskich dźěłow dla wčera žanoho wozjewjenja njebě, kaž z krajnoradneho zarjada rěka. Tydźenska incidenca po RKI wučinja tu dźensa 211,8. Ličba inficěrowanych je so w Zhorjelskim wokrjesu wčera wo 29 powjetšiła. Tamniša incidenca po RKI je dźensa 193,1.

Herbst načolny kandidat

wozjewjene w: Krótkopowěsće
Tale wječorna idylka w Lejnjanskim přistawje płachtakow lědma něšto wo tym přeradźa, zo bě tamniši jězor runja wšej łuži­skej jězorinje wčera, prěnju lěćnu njedźelu lěta, požadany wulětny cil. Skaterojo, kolesowarjo a pućowarjo běchu po puću, na wo­dźe samej žana přewulka aktiwita njebě. Mnohe čołmy dźě dyrbja hakle do wody. Foto: Gernot Menzel

wozjewjene w: Łužica
póndźela, 10 meje 2021 14:00

Nowej městnje za Domowinu

Budyšin (SN/JaW). Katrin Suchec-Dźisławkowa je nowa referentka za nalež­nosće kubłanja a spěchowanja dorosta Domowiny. To su čłonojo Zwjazkoweho předsydstwa Domowiny minjeny pjatk w Budyšinje a online na swojim poslednim posedźenju do nowowólbow gre­mi­ja 12. junija w njezjawnym dźělu rozsudźili. Wo tym informuje nowinski rěčnik Marcel Brauman w zdźělence.

wozjewjene w: Towarstwa
póndźela, 10 meje 2021 14:00

Zhubjene wobroty trašace

Korony dla so połoženje we wuchodosakskim rjemjesle dale přiwótřa

Drježdźany (SN/at). Wuslědki swojeho spočatk apryla přewjedźeneho druheho wosebiteho naprašowanja korony dla ma Drježdźanska rjemjeslniska komora za alarmowace. Tam je ze 84 procentami jasna wjetšina woprašanych předewzaćow podała, zo wojuja z hospodarskimi sćěhami krizy. 53 procentow wšitkich zawodow rozprawja wo wupadach wobrota jako sćěhu pandemije. Kaž rjemjeslniska komora zwěsći, je to wjace hač dwójce telko firmow kaž hišće spočatk januara w prěnim wosebitym korona-naprašowa­nju. Prěni raz su nětko tež mnohe zawody z wobłukow elektro a metal (58 proc.), drjewo (45 proc.) kaž tohorunja twar a wu­twar (34 proc.) spad wobrota přizjewili, kaž bě na njedawnej nowinarskej konferency rjemjeslniskeje komory zhonić.

wozjewjene w: Hospodarstwo
póndźela, 10 meje 2021 14:00

Geografojo so wirtuelnje zešli

Dźěłowe koło „Wjesne rumy“ Němskeje towaršnosće za geografiju a Johanna Heinricha Thünenowy institut stej swoje 22. lětne zetkanje wirtuelnje w Budyšinje wuhotowałoj. Hosćićel bě Serb­ski institut. Zdobom wotměštej 8. dźěłarničku za wědomostny dorost.

wozjewjene w: Kultura
póndźela, 10 meje 2021 14:00

Wostanje „dale při wěcy“

Kulow (SN/JaW). Kulowski měšćanosta budźe tež dale Markus Posch (CDU). Wón ma tuž přichodne sydom lět dźěławosć w měsće a jemu přisłušnych tež serbskich wsach nadal nawjedować a wostanje tuž cyle po swojim wólbnym hesle „dale při wěcy“.

Jako jenički kandidat za načolnistwo w Kulowskej radnicy nažnja 51lětny Posch wčera cyłkownje 94,31 procentow wšěch wotedatych hłosow, zdźěli Ku­lowske měšćanske zarjadnistwo. Tak nastupi swoju druhu wólbnu dobu w srjedźołužiskim městačku. Cyłkownje je hač do 18 hodź. 52,34 procentow wobydlerjow Kulowa – něhdźe 500 z nich bě z listom woliło – wólbne lokale, w kotrychž dźiwachu mjenje abo bóle kruće na hygienowe předpisy wo škiće před koronawirusom, wopytało a wo měšćanosće rozsudźiło. To je nimale 20 procentow mjenje hač před sydom lětami. Tehdy njebě žadyn z pjeć kandidatow w prěnim přechodźe trěbnu wjetšinu docpěł. Rozsudźiło bě hakle druhe wólbne koło mjez Beatu Hufnagel a Markusom Poschom, hdźež dósta wón 63 procentow.

wozjewjene w: Łužica
póndźela, 10 meje 2021 14:00

Trěbna diskusija

Hodźij (mm/SN). Na swojej hłownej zhromadźiznje wuradźowachu sobotu zastupjerjo dwurěčnych ewangelskich wosadow wo swojim přichodnym dźěle. Prěni króć wotměchu lětne schadźo­wanje Serbskeho wosadneho zwjazka napra­wy hygieny wobkedźbujo w Hodźijskej cyrkwi. Na reformaciskim dnju, 31. oktobra 2020, bu tudyši farar Krystof Rummel do zastojnstwa Serbskeho superintendenta zapokazany. W swojej rozpra­wje wón wuzběhny, zo bě loni 20 serbskich bohosłužbow w Michałskej, Poršiskej a Hodźijskej wosadźe, wjacore dwurěčne kemše běchu w Bukecach, Rakecach, Malešecach, Slepom a Wojerecach. Koronapandemije dla dyrbjachu wšelake zarjadowanja wupadnyć, mjez druhim serbski ewangelski kónc tydźenja a swójbne pućowanje. Lětsa pak chcedźa jej přewjesć, a to nazymu. Dalšej srjedźodobnej projektaj stej rewizija serbskeho lekcionara a spěwnik za dźěći a młodostnych. Městopředsyda Mato Krygaŕ hódnoćeše diskusije minjenych měsacow wokoło wutworjenja nowych wosadnych strukturow jako trěbne a intensiwne.
wozjewjene w: Kraj a swět
póndźela, 10 meje 2021 14:00

Borzdźidło ma dlěje płaćić

Mnichow (dpa/SN). Bayerski ministerski prezident Markus Söder (CSU) ma za móžne, zo zwjazkowe nuzowe borzdźi­dło koronawirusa dla po juniju dlěje płaćić da. „Bój přećiwo pandemiji na zakonskim zakładźe traje hač do 30. junija. Jenož,­ dokelž so zakoń skónči, njeje pandemija tola nimo“, rjekny Söder Mnichow­skim nowinarjam. Tež hdyž zdawa so třeća­ žołma pod kontrolu być, njesměli so slepić dać. „Hišće njejsmy dobyli.“

„Lubowacych“ žohnowali

Köln (dpa/SN). Po wšej Němskej su so dźensa „žohnowanske kemše za lubo­wacych“ w katolskej cyrkwi wotměli. Na nich­ chcychu tež homoseksualne poriki žohnować, byrnjež to Vatikan hakle njedawno wuraznje zakazał. Cyłkownje planowachu něhdźe sto Božich mšow, prěnje běchu hižo wčera. Akcija tajkeho rozměra je dotal jónkrótna. Předsyda Němskeje biskopskeje konferency Georg Bätzing iniciatiwu kritizuje: „Žohnowanske Bože słužby so jako instrument protesta njehodźa.“

Šćěpiwo za nad 60lětnych

wozjewjene w: Kraj a swět
Tójšto ludźi je wčera k sowjetskemu wopomnišću w Berlinskim Treptowym parku přišło, zo bychu so na swjatočnosći skład­nostnje 76. róčnicy kapitulacije hitlerskeje Němskeje wobdźělili. W ruskej stolicy Moskwje přewjedźechu w samsnym času wulku wojersku paradu. Wopomnjenske zarjadowanja wotměchu so tež w Kamjencu, Wojerecach a Budyšinje. Foto: dpa/Jörg Carstensen

wozjewjene w: Kraj a swět
póndźela, 10 meje 2021 14:00

To a tamne (10.05.21)

Zezerzawjena waflowa forma je na sewjerowuchodźe Braniborskeje zasadźenje fachowcow za wotstronjenje municije zbudźiła. 47lětny z wokoliny Berlina bě fachowcow alarmował. Muž bě na swojej njewobtwarjenej ležownosći w Mansfeldźe pola Putlitza 20 centimetrow hłu­bo­ko w zemi železny předmjet namakał, kiž wupadaše kaž kulojta mina. Specialisća zwěsćichu, zo jedna so jenož wo waflowu formu. Zadźerženje muža přiwšěm chwalachu, wšako móhła to tež mina być.

K wuswobodźenju kóčki wołali su wohnjowu woboru w Šwicarskej. Kocor Louis sedźeše šěsć metrow wysoko na haroškitnym wupaženju. Wobornicy w kantonje Nidwalden dyrbjachu dźěl sćěny wottwarić, zo móhli zatłusnjeneho ko­cora z pomocu wjerćiteho rěbla wuswobodźić. Z pomocu chipa móžachu wobsedźerku Louisa spěšnje zwěsćić.

wozjewjene w: To a tamne

Serbska debata

nowostki LND