Z wudaća: póndźela, 10 meje 2021

póndźela, 10 meje 2021 14:00

Wotpokazuja słowa předsydy

Budyšin (SN). Z wótrej kritiku je so Bu­dyske wokrjesne předsydstwo Zelenych wot wuprajenja frakciskeho předsydy Zele­nych w Budyskim wokrjesnym sejmiku, Siegfrieda Kühna nastupajo zhromadne dźěło z AfD distancowało. No­wina Die Zeit bě Kühna ze słowami citowała: „Stanje so drje zrědka, tola hdyž AfD z mojeho wida rozumny namjet předpołoži, wězo swoju ruku zběhnu.“ Wokrjesne předsydstwo wuprajenja frakciskeho předsydy wotpokazuje a je přeswědčene, zo njeměło žanych zhromadnych namjetow, kooperacijow a přihłosowanjow k namjetam AfD być. Tale strona je po słowach wokrjesneho předsydstwa ludźi a demokratiju zacpěwaca z čłonami, kotřiž přisłušeja identitarnemu a prawicarskemu hibanju. Wokrjesne předsydstwo Siegfrieda Kühna namołwja, swoje wuprajenja zjawnje cofnyć.

wozjewjene w: Kraj a swět
póndźela, 10 meje 2021 14:00

Jubilej njewupadnył

Kajke běchu to rjane swjedźenje, kotrež su so minjene lěta w Kukowje při tamnišim pomniku wotměli. Syły ludźi su tam kóžde lěto spočatk meje ze wšěch kónčin přichadźeli a rjanu serbsku zabawu při mejemjetanju dožiwili. Za mnje najzajimawše stajnje bě, holcy a hólcy z wjesołymi wobličemi na swjedźenišćo kročachu a tam swoje reje zanjesechu. Wječorna zabawa wšak bě runjewon legendarna, runje tak kaž njedźelne rańše piwko z lóštnymi štučkami muzikantow a ze słódnym wobjedom. Zo to runje lětsa k 30. jubilejej tak móžno njebě, je wězo škoda. Ćim wjetši kompliment słuša młodźinskemu towarstwu Pančicy-Kukow, zo su na hinaše wašnje na róčnicu spominali a mejski nyšpor­ wuhotowali. Wulka ličba wjesnjanow drje je so při tym podobnje na spo­dobne swjedźenje zašłych lět dopominała kaž ja. A z wotpowědnymi formulacijemi je na kóncu přiwšěm hišće trochu mejemjetanskeje hudźby zaklinčało. Tak jubilej tola wupadnył njeje. Marian Wjeńka

wozjewjene w: Towarstwa
póndźela, 10 meje 2021 14:00

Drosten: W lěću wjele móžno

Berlin (dpa/SN). Wirologa Christian Dro­sten­ z Berlina je optimistiski hladajo na wuwiće koronapandemije w lěću. „Myslu sej, zo změjemy w juniju efekty, kotrež móžemy šćěpjenju připisać“, rje­kny direktor wirologije na Berlinskim uniwersitnym klinikumje Charité wčera wječor w telewiziji ZDF. „W lěću móže w Němskej cyle derje wupadać.“ Runje we wonkownych wobłukach drje budźe zaso tójšto­ móžno, rjekny Drosten prašany za do­wolom, wonkownej gastronomiju a grilowanjom z přećelemi. Zdobom wón warnowaše, zo njesměli ludźo potom hnydom do „totalneje euforije“ padnyć.

wozjewjene w: Kraj a swět
póndźela, 10 meje 2021 14:00

Scholz jako kandidat wobkrućeny

Berlin (dpa/SN). Škit klimy, dobre dźěło a sprawnosć steja w srjedźišću programa SPD k wólbam zwjazkoweho sejma: De­legaća digitalneho stronskeho zjězda su wólb­ny program socialdemokratow schwalili a Olafa Scholza ze 96,2 procentomaj jako kanclerskeho kandidata wobkrućili. Nawodnistwo strony bě jeho hižo loni w awgusće za kandidata namjeto­wało. Do wothłosowanja prošeše Scholz delegatow wo podpěru a skedźbni na swoje wobšěrne nazhonjenja jako bywši wyši měšćanosta a financny minister.

Z raznymi słowami na CDU a CSU bě generalny sekretar SPD Lars Klingbeil zjězd zahajił. „Unija, kotrejež wodźace mocy Karliczek, Altmaier a Scheuer rěkaja, tajka unija njesměła w knježerstwje być, rjekny Klingbeil hladajo na ministrow CDU a CSU. Cyłkownje 600 dele­gatow bě digitalnje přišaltowanych.

Klingbeil wumjetowaše křesćanskimaj stronomaj aferu škitnych nahubnikow dla a brutalne rozestajenje wo móc. „Tale unija je na kóncu. Je tuž lěpje, zo wona hižo sobu njeknježi.“

wozjewjene w: Kraj a swět
póndźela, 10 meje 2021 14:00

Nawoda manko pomjenował

Serbski sejm wo serbskich aktiwitach w biosferowym rezerwaće zhonił

Stróža pola Hućiny (SN/at). 8. meja 1945 jako dźeń wuswobodźenja z fašizma bě wuchadźišćo, wožiwić wšo serbske žiwjenje po brunej dobje w Němskej. Na po­sedźenju Serbskeho sejma předwčera­wšim w Stróžanskim šulskim muzeju „Korla Awgust Kocor“ dopominaše Hajko Kozel na tehdyše pospyty serbsku kulturu wutupić a na to, što wuswobodźenje Serbam woznamjenja.

wozjewjene w: Kraj a swět
póndźela, 10 meje 2021 14:00

Nět knježi Heger

Bratislava (SŽ/K/SN). Po dwaj dnjej trajacej kontrowersnej diskusiji z přinoškami 40 rěčnikow wo programje knježerstwa je Narodna rada Słowakskeje na wurjadnym schadźowanju kabinetej noweho premiera Eduarda Hegera dowěru wuprajiła. Z přitomnych 144 zapósłancow je 88 nowej administraciji rjap skrućiło. Wona wobsteji zasadnje z dotalneje koalicije štyrjoch stronow a hibanjow, tuž z OL’aNO, SAS, Sme rodina a Za l’udi. Tež lisćina ministrow so wot dotalneje wulce njeroze­znawa. Najwuznamniše změna je, zo je něhdyši ministerski prezident Igor Matovič nětkole šef resorta za financy a prjedawši financy minister Heger premier.

wozjewjene w: Słowjanski wukraj
póndźela, 10 meje 2021 14:00

Zapósłane (10.05.21)

Farar Měrćin Deleńk z Chrósćic wupraja so k nastawkej dr. Měrćina Wałdy, wozjewjenym w SN z 5. meje „Kak sej Serbja swoje połoženje rjane barbja“:

wozjewjene w: Zapósłane
póndźela, 10 meje 2021 14:00

Tójšto wobchada na groblach było

Najrjeńše nalětnje wjedro je kónc tydźenja tójšto ludźi do Błótow wabiło. Na tam­nišich groblach knježeše hižo čiłe žiwjenje. Čołmiki a podłohi za stejace padlowa­nje dyrbjachu ludźo sami sobu přiwjezć, dokelž su wupožčowarnje koronapandemije dla hišće zawrjene. Tež skupinske jězby z wulkimi čołmami njejsu dotal hišće móžne­. Zamołwići so nadźijeja, zo budźe zwučeny błótowski turizm k swjatkam zaso­ móžny. Wšako ličba infekcijow a z njej zwjazana incidenca dale wotebě­ratej. Tež hosćencarjo su połni nadźije, zo smědźa potom zaso hosći posłužować, a byrnjež to najprjedy raz jenož pod hołym njebjom było. Foto: dpa/Patrick Pleul

wozjewjene w: Łužica
Chróšćanski farar Měrćin Deleńk swjećeše pjatk, 7. meje, w Róžeńće dźaknu Božu mšu wohnjowych wobornikow gmejnow zarjad­niskeho zwjazka Při Klóšterskej wodźe. Wón předstaji jim žiwjenje swjateho Floriana, patrona wobornikow. Pandemiskich předpisow dla zaćahnychu tónraz jeničce chorhojnicy štyrjoch woborow z banerami do cyrkwje. Hewak běštaj kóždeho chorhojnika stajnje dwaj dalšej wobornikaj přewodźałoj. Koronakrizy dla bě tež mjenje kameradow hač minjene lěta do Róžanta kemši přijěło. Wšitcy pak wobkedźbowachu předpisy a wužiwachu, kaž w cyrkwjach žadane, nahubnik. Foto: Rafael Ledźbor

wozjewjene w: Łužica
póndźela, 10 meje 2021 14:00

Jubilej trochu hinak zmóžnili

Pančicy-Kukow (SN/MWj). Nic k mejemjetanju jako wulkemu wjesnemu swje­dźe­njej, ale k nyšporej takrjec jako narunanje koronoweje pandemije dla zhromadźi so sobotu popołdnju tójšto wobydlerjow při Kukowskim pomniku za padłych swětoweju wójnow. Hudźbnje a słownje wuhotowałoj stej jón młodostni Šołćic a Šnajdrec swójby hromadźe z fararjom Tomaszom Dawidowskim. Na te wašnje spominachu na 30lětnu tradiciju mejemjetanja na tymle městnje. Do swojich modlitwow zapřijachu tohorunja wopory pandemije, ale runje tak dźakownosć za rjanu tradiciju mejemjetanja.

wozjewjene w: Towarstwa

Serbska debata

nowostki LND