Silver Spring (dpa/SN). Zarjad USA za dohladowanje lěkow je zasadźenju šćěpiwa pře koronu němskeje firmy Biontech a jeje ameriskeho partnera Pfizer za dźěći a młodostnych w starobje dwanaće do 15 lět přizwolił. Spočatk apryla běštej Biontech-Pfizer wotpowědnu próstwu zapodałoj. Nawodnica zarjada Janet Woodcock rěčeše wo „wažnej kročeli“ w boju přećiwo pandemiji. Wona staršim přilubi, zo je zarjad šćěpiwo kruće a dokładnje na zakładźe wšitkich předležacych datow pruwował.
Kanada bě hižo jako jedyn z prěnich krajow swěta dowoliła šćěpiwo za dwanaće- do 15lětnych wužiwać. W Europje wočakuja dowolnosć spočatk abo srjedź junija.
Berlin (dpa/SN). Hladajo na woteběracu ličbu koronainfekcijow a z njej zwjazanu incidencu žada sej Zwjazk wikowarjow Němskeje (HDE) spěšne znowawotewrjenje wšitkich wobchodow. Njeje žaneje přičiny wjace za dalše wobmjezowanja abo zawrjenja w drobnowikowanju, rjekny hłowny jednaćel HDE Stefan Genth minjeny pjatk w Berlinje.
HDE na to skedźbnja, zo wojuje tójšto wikowarjow wo přežiwjenje. Při naprašowanju zwjazka kónc apryla běštej dwě třećinje wikowarjow z drastu swójske połoženje jako eksistencu wohrožace posudźowałoj. „Cyłkownje móhło so koronakrizy dla hač do 120 000 wobchodow zhubić. Hač do 250 000 dźěłowych městnow by so zničiło a cyłe nutřkowne města móhli wohrožene być.
Drježdźany/Frankfurt n. M. (dpa/SN). Komuny Sakskeje su dotal po přepytowanju pjenježnje njewočakowano derje přez koronakrizu přišli. Jich zadołženje je loni porno lětu 2019 wo 10,8 procentow na 574 eurow na wobydlerja woteběrało, kaž z wčera wozjewjeneje komunalneje rozprawy statneje spěchowanskeje banki KfW wuchadźa. Zadołženje je tuž jasnje mjeńše hač cyłozwjazkowy přerězk, wučinjacy 1 722 eurow na wobydlerja.
Po informacijach KfW starosća so komuny přiwšěm wo dołhodobne wuskutki. Na wšě 85 procentow po wšej Němskej woprašanych komunow liči lětsa a snano hišće dlěje z woteběracymi dochodami koronakrizy dla. 52 proc. komunow boji so wjetšich wudawkow. Fachowcy banki wočakuja, zo dyrbja komuny swoje inwesticije do šulow, dróhow, škita klimy a digitalizacije pomjeńšić, štož budźe na škodu infrastruktury. W krizowym lěće 2020 běchu z masiwnej pomocu ze stron Zwjazka a krajow – předewšěm ze zarunanjom wupadnjenych dochodow z přemysłoweho dawka – tomu zadźěwali, zo so komuny do hoberskeho deficita dóstanu. Wone mějachu tuž samo snadny plus.
Marja Michałkowa z Lichanja pisa:
Knjez dr. Měrćin Wałda w swojim nastawku w SN z 5. meje k wuprajenjam na forumje Konrada Adenaueroweje załožby twjerdźi, zo „sej Serbja swoje połoženje rjane barbja“. Něhdy je zwjazkowy kancler Konrad Adenauer zwěsćił: „My smy wšitcy pod jednym njebjom žiwi, kóždy z nas pak ma hinaši horicont.“ Zo su Serbja surowe časy dožiwili, tež ja wěm. Zo pak wjetšina našeje towaršnosće dobru zhromadnosć mjez Serbami a Němcami pěstuje, je fakt.
Knjez Wałda so tež myli, hdyž twjerdźi, zo rozprawy wo połoženju serbskeho ludu jenož němske knježerstwo pisa. Domowina jako připóznata rěčnica Serbow, dalše serbske gremije a institucije wězo sobu na rozprawach dźěłaja.
Najebać koronapandemiju so w Čornochołmčanskim Krabatowym młynje stajnje něšto stawa. Najnowša nowosć je tam nětko wočinjeny regionalny wobchod.
Čorny Chołmc (SiR/SN). Wóń čerstwych całtow do nosa stupa. Na předawanskim blidźe su twarožk, samočinjena zelowa butra, čerstwy lany wolij, mloko, kołbasa w škleńcach a měd z wjele lubosću přihotowane. Poskitk regionalnych wudźěłkow w Čornochołmčanskim Krabatowym młynje je nowy. Minjeny štwórtk je tam regionalny wobchod prěni raz wočinił. Wopytowarjo nadeńdu jón najprjedy raz w dotal njewužiwanym dźělu burskeje stwy. Koronowa pandemija je so wo to postarała, zo móžachu ideju, z kotrejž so hižo dlěje noša, spěšnišo zwoprawdźić. „W chwatku normalneho wšědneho dnja je za nowe předewzaća mało chwile. To su hinaše wěcy wažniše. W nanuzowanej přestawce pak móžachmy tónle projekt zwoprawdźić“, rozłožuje jednaćel Krabatoweho młyna Tobias Čižik. Při tym móžachu so znowa na wjelelětnych partnerow spušćeć, kaž stej to na přikład Ermerec pjekarnja z Njedźichowa a Domanic ratarski zawod z Hózka.