Z wudaća: wutora, 11 meje 2021

Slepjanska gmejna dyrbi swoje rezerwy načeć

Slepo (AK/SN). Slepjanska gmejna chce ze wšelakimi twarskimi předewzaćemi do přichoda inwestować. To je komornica Dana Piehl na njedawnym posedźenju gmejnskeje rady z widom na hospodarski plan 2021 zwurazniła. Nowotwar Slepjanskeje gratownje kaž tež dźěćaceho dnjoweho Witaj-přebywanišća „Milenka“ w Rownom, wutwar načasneje šěrokopasmoweje syće a centralne wotwodźowanje wopłóčkow su wulke naprawy. Při tym nadźija so gmejna spěchowanja sto procentow. Mjeńše naprawy su saněrować stare dwórnišćo a dwórnišćo w Slepom kaž tež stara šula w Mułkecach. Swójske srědki brać chcedźa z krajneje pawšale k sylnjenju wsow.

Spěchowanske srědki maja z programa „Witalne wjesne žra“ sakskeho minis­terstwa za wobswět a ratarstwo přińć. Hospodarski plan 2021 njebudźe wurunany. W zarjadniskim wobłuku etata změje gmejna Slepo po wšěm zdaću ­deficit 838 000 eurow, w inwesticiskim 521 000 eurow. Hospodarski plan 2021 njeje dotal wobzamknjeny.

Budyšin. Budyski twarski decernat so wjeseli, zo chcedźa Budyšenjo swoje domy­ na dnju pomnika zajimcam zaso wote­wrěć. Město so mjeztym 28 lět na akciji wobdźěla. Po lońšej přestawce budźe­ tónraz składnosć so wobdźělić. Cyłoněmski dźeń wotewrjeneho pom­nika wotměje so 12. septembra. Potom móža sej zajimcy městnosće wotkryć, kotrež zjawnosći hewak přistupne njejsu.

Tónkróć dowěrić

Budyšin. Minjeny čas běchu so husto wobšudnicy, kotřiž so jako zastupjerjo někajkeje firmy wudawachu, ludźom do by­dlenjow dóstali. Tuchwilu pak su w Budyšinje woprawdźe sobudźěłaćerjo Němskeje telekom po puću. Spóznajomni su woni na typiskej drasće předewzaća w barbach šěra/čorna a magenta. Woni móža so ze słužbnym wupokazom identifikować. Wobkedźbujo škitne postajenja woni zajimowanych wobydlerjow sprjewineho města po přeću poradźuja.

Budyšin (CS/SN). Čłonojo hłowneho wu­běr­ka Budyskeje měšćanskeje rady rěčachu na swojim zašłym posedźenju wo tym, kotru wariantu wobjězdki južnje města maja za najlěpšu, byrnjež dotal jasne njebyło, hač budźe wob­jězdka scyła twarjena. Tak to znajmjeńša wyši měšćanosta Alexander Ahrens (SPD) zwurazni. Wšako njeje to naležnosć města, ale Sakskeje. Ahrens namjetowaše tež hnydom južnu wariantu jako najspomóžnišu. Sewjerna je drje krótša, štož móhło so na kóšty wuskutkować, ma pak mnohe njelěpšiny. Tale čara by wjedła mjez Budyšinom a Hornjej Kinu po ležownosćach, kotrež słušeja do kónčiny přepławjenja. Nimo toho – na to běchu wobydlerjo hižo­ pokazali – by wuskutkowała dalše poćežowanja za Hornju Kinu wobchada a hary dla. Bychu-li sewjernu wariantu twarili, bychu někotre dróhi přichodnje do zamołwitosće města přešli a tak trajne přidatne kóšty zawinowali. Dale by běh dróhi logistiski centrum při nakładnym dwórnišću znjemóžnił. Centrum pak ma so stać zwjazowanska městnosć mjez dróhu a kolijemi, kajkaž by w Sakskej jónkrótna była.

Bjez dowolnosće palili

Wulki Wjelkow. Na parkowanišću we Wulkim Wjelkowje su w nocy na póndźelu wjacori młodostni lěhwowy woheń zamiškrili. Po policajskich wustawkach města Budyšina pak to tak dowolene njeje. Jako tam policija krótko do połnocy přijědźe, dwě wosobje ćeknyštej, zastojnicy jednu z njeju po krótkim přesćěhanju dosahnychu. Kaž so při alkoholowym tesće wukopa, měješe młodostny 2,46 promilow alkohola w kreji. Policisća woheń zhašachu a přepodachu młodostneho jeho staršimaj.

Cyle spěšnje po dočasnym kóncu w 2. zwjazkowej lize lodohokeja (DEL 2) přewjedźechu hižo štwórćfinalne hry za postup do primarneje etaže lodo­hokeja. Łužiske liški z Běłeje Wody a Drjež­dźanske lawy maja hižo přestawku, wšako jeju sezona přewuspěšna njebě. Tež třeće mustwo ze Sakskeje, Lodowi piraća z Crimmitschauwa, je playoff-hry snadnje misnyło.

Wulki faworit na postup a zdobom lětuši mišter, mustwo Kassel Huskies, měješe w štwórćfinalu mało ćežow z Heilbronnskimi Sokołami. Tři hry přećiwo nim je cyle spěšnje dobył (6:4, 8:2, 9:6) a sej tak prěni tiket za połfinale zawěsćił. Tamne tři duele běchu snadniše. Cyłk Towerstars Ravensburg přesadźi so z 3:1 přećiwo Tölzskim lawam. Prěnju hru Towerstary hišće ze 3:6 přěhrachu, po tym běchu­ dwójce w podlěšenju wuspěšni (3:2 a 2:1). Wšo rozsudźaca hra bě tohorunja jara napjata a skónči so 5:4 na dobro Ravensburga.

Dynamo Drježdźany – Viktoria Köln 2:0 (2:0)

Zestawa domjacych: Broll – Kwadwo, Knipping, Ehlers, Stark, Ch. Löwe, Will (59. Stefaniak), Diawusie (46. Kreuzer), Königsdörffer (28. Vlachodimos), Mörschel (72. J. Löwe), Hosiner (46. Stor)

Tež hrajna doba w třećej koparskej lize Němskeje so pomału nachila. Kaž kóžde lěto znowa zas steja wosebje mustwa w pincy tabulki, ale tež načolne w fokusu přiwisnikow. Za Dynamo Drježdźany, načol­nika třećeje ligi, steješe minjenu sobo­tu na 36. hrajnym dnju domjaca partija přećiwo Viktoriji Köln na planje. Prjedawši Drježdźanski trenar Olaf Janßen ju tučasnje trenuje a nawjeduje. Tři dypki přećiwo Kölnjanam běchu hosći­ćeljo kruće zaplanowali, dokelž je bój wo postup přeco hišće jara wuski. Nimo Dynama Drježdźany wojuja wo krok etažu wyše hišće Hansa Rostock, TSV 1860 Mnichow a FC Ingolstadt.

Florian Baudisch bě so hakle spočatk sezony wot młodźiny A mužacemu mustwu Budissy Budyšin přidružił, byrnjež móhł hišće jednu hrajnu dobu w dorosće na polu stać. Dokelž pak za swoju starobu hižo jara suwerenje agěruje, jemu šeftrenar muži Tomaš Henčl dowoli, swoje zamóžnosće tež hižo tam pokazać.

W lěće 2008 započa Baudisch z aktiwnej kopańcu hnydom pola najwjetšeho towarstwa wokrjesneho města. Wobstajnje wukubłany w cyłej młodźinskej płoninje je wón derje bjez přetorhnjenja krok po kroku swoje kwality we wšelakorych koparskich wobłukach polěpšał. Te móže nětko tež w krajnej lize pokazać.

Dohromady ma Florian, zasadźeny hłownje w ofensiwnym, srjedźnym polu, hižo w pjeć koparskich zetkanjach 195 mjeńšin hrajneho časa, a to mjez druhim tež w derbyju přećiwo KST 1990 Nowosólcej-Hrodkej. Tam su so jemu samo prěnje wrota na mužacej etaži poradźili, a zawěsće to jeničke njewostanu.

Statistika zasadźenjow Floriana Baudischa za jednotliwe cyłki

Budissa Budyšin 7 hrow/1 wrota

Statistika jeho zasadźenjow w jednotliwych koparskich klasach

krajna liga 5 hrow/1 wrota

Kopańca, tabulka třećeje ligi

1. Dynamo Drježdźany 36 56 : 29 69

2. Hansa Rostock 36 50 : 32 67

3. TSV 1860 Mnichow 36 66 : 30 65

4. FC Ingolstadt 04 36 48 : 38 65

5. 1. FC Saarbrücken 36 64 : 49 56

6. SV Wehen Wiesbaden 36 57 : 48 56

7. SC Verl 36 65 : 53 54

8. 1. FC Magdeburg 36 41 : 43 50

9. Viktoria Köln 36 48 : 55 49

10. Waldhof Mannheim 36 48 : 54 48

11. Türkgücü Mnichow 36 44 : 50 46

12. Halleski FC 36 46 : 58 46

13. FSV Zwickau 36 42 : 44 45

14. MSV Duisburg 36 50 : 60 43

15. 1. FC Kaiserslautern 36 43 : 48 41

16. SV Meppen 36 35 : 58 38

17. KFC Uerdingen 05 36 36 : 49 37

18. Bayern Mnichow II 36 45 : 55 36

19. VfB Lübeck 36 39 : 54 34

20. HZ Unterhaching 36 39 : 55 31

zbywacy program načolnych mustwow – 37. hrajny dźeń

15.05. 14:00  Dynamo Drježdźany –

Viktoria Köln

15.05. 14:00  HZ Unterhaching –

FC Hansa Rostock

15.05. 14:00  MSV Duisburg –

FC Ingolstadt

16.05. 14:00  TSV 1860 Mnichow –

FC Bayern Mnichow II

zbywacy program načolnych mustwow – 38. hrajny dźeń

22.05. 13:30  SV Wehen Wiesbaden –

Dynamo Drježdźany

22.05. 13:30  FC Hansa Rostock –

VfB Lübeck

22.05. 13:30 FC Ingolstadt –

TSV 1860 Mnichow

David Matik

Zhromadny dźěłowy plan za přichodne lěto staj sej trenar dorostoweje serbskeje koparskeje wubranki starobneje klasy D Tadej Cyž z Njebjelčic a starosta Serbskeho Sokoła z.t. Milan Funka na zetkanju z Clemensom Škodu, referentom Domowiny za kulturu, w Budyskim Serbskim domje dorěčałoj. Tadej Cyž rjekny: „Situacija je pan­demije dla dale wobćežna, dokelž hodźi so tučasnje špatnje planować. Ličimy pak z wolóženjemi wot třećeho kwartala. Hdyž bychmy lětsa někotre zhromadne zwučowanja přewjesć móhli, a k tomu jednu wuměnu z Drježdźanskim gymnazijom w septembrje a wobdźělenje na halowym koparskim turněrje, snano tež w Drježdźanach w zymje, bych ja wosobinsce spokojom był.“

Milan Funka přilubi při přewjedźenju akcijow pomoc Serbskeho Sokoła a dźakowaše so Cyžej za angažement: „Dorost je naš přichod a wjeselu so, zo mamy swěrnych serbskich trenarjow dorosta kaž Tadeja, kotřiž so nětko hižo wo za­kłady za přichod serbskeho sporta staraja.“ Marcel Brauman