Z wudaća: póndźela, 07 junija 2021

póndźela, 07 junija 2021 14:00

Krótkopowěsće (07.06.21)

Wot srjedy dalše wolóženja

Budyšin. W Budyskim wokrjesu rozprawjachu wot pjatka hač do wčerawšeho wo 54 koronanatyknjenjach a pjeć smjertnych padach. Sydomdnjowska incidenca na 100 000 wobydlerjow po RKI je dźensa 36. Dokelž je hódnota znowa pod 50, budu wot srjedy dalše wolóženja. Wokrjes Zhorjelc informowaše wčera wo pjeć­ infekcijach. Incidenca tam sta­bilizuje so po RKI wot minjeneho pjatka pod 30, dźensa je wona 21,4.

Nowe jewišćo wobnowja

Podstupim/Zły Komorow. Dohromady 6,5 milionow eurow dóstanje Zło­­komorowske Nowe jewišćo za saněro­wanje a wutworjenje swojich dźěłarnjow. To zdźěli braniborske ministerstwo za wědomosć, slědźenje a kulturu minjeny pjatk w Podstupimje. Je to prěni komunalny projekt, kotryž su w Braniborskej po zwjazkowym zakonju wo sylnjenju strukturow wobkrućili.

Bydlenske mobile jara požadane

wozjewjene w: Krótkopowěsće
W Domanic ratarskim zawodźe wjesela so lětsa nad přewšo bohatymi žnjemi kórkow. Swoju we wulkej rostlinarni plahowanu a dalšu zeleninu w dworowym wobchodźe w Hózku, na dwojich wikach w Drježdźanach, w Kamjencu, Rakecach, Kulowje a we Wo­jerecach předawaja. Najebać swoju starobu Michał Domanja zeleninu rady za wiki přihotuje. Foto: SN/Hanka Šěnec

wozjewjene w: Hospodarstwo
póndźela, 07 junija 2021 14:00

„Tajki zjaw njemotiwuje“

Dr. Pětš Šurman nawjeduje nětko župu Delnja Łužica. Axel Arlt je so z nim wo prěnich myslach w nowym zastojn­stwje rozmołwjał.

Sće nazhonity w Domowinskim dźěle. Dosa­ha to za zastojnstwo župana?

dr. P. Šurman: Rozsudne za mnje bě, zo sym wjele dobrych myslow nastupajo swoju wosobu ze stron župneho předsydstwa dóstał. Wosebje słowa Haralda Koncaka su mje hnuli, kotryž rjekny: „Ty dyrbiš to činić, ty sy ta prawa wosoba, maš nazhonjenja.“ Tež přistajeni Domowiny w Choćebuzu běchu jednoho měnjenja, zo měł županstwo přewzać.

Woni wočakuja, zo budźeće mosty twarić.

dr. P. Šurman: Mam dobre zwiski do Budyšina. Sym zbožowny, zo mamy jako župa kooperaciske zrěčenje ze Zwjazkom Łužiskich Serbow. Tak móžemy wěste problemy po krótkim puću z Budyšinom rozjimać a rozrisać.

Što su Waše nazhonjenja nastupajo zwisk k centrali Domowiny w minjenych lětach?

wozjewjene w: Rozmołwa
póndźela, 07 junija 2021 14:00

Profil SLA ma so wótřić

Załožbowa rada lisćinu wobsahowych žadanjow wobzamknyła

Budyšin (SN/CoR). Tři temy je rada Załožby za serbski lud na swojim wusahowacym digitalnym zeńdźenju minjeny pjatk wobjednała: prěni raz ramikowe žadanja za přichodne skutkowanje Serbskeho ludoweho ansambla, wobsadźenje jeho wuměłskeho wjednistwa a přepytowanje dźiwadłoweje krajiny w kulturnym rumje Hornja Łužica-Delnja Šleska.

wozjewjene w: Kultura
póndźela, 07 junija 2021 14:00

Hódančka a žorty za prózdniny

Budyšin (SN). Kniha połna hódančkow a žortow za cyłu swójbu je w LND wušła a budźi zaso wěsće pola někohožkuli předwjeselo na prózdniny. Pod titulom „Hódaj a směj so!“ předleži wot Šćěpana Hanuša barbnje wuhotowana kniha za dźěći wot 7 lět. Wjac hač 200 šćipatych žorćikow je šefredaktor Płomjenja Pětr Šołta zezběrał, a Judith Wjenkec je sej zajima­we hódančka wumysliła. Křižowki wuhódać, rozdźěle we wobrazach a prawy puć w labyrinće namakać a dalše „worješki“ na młodych čitarjow čakaja.

wozjewjene w: Kultura
póndźela, 07 junija 2021 14:00

Přihotuja livestream ze Slepoho

Domowinske sobustawstwo jednotliwcow, digitalnu formu zarjadowanjow a přichod z hłownym jednaćelom a jedna­ćelom na čole zarjada ma změna Domowinskich wustawkow přinjesć.

wozjewjene w: Towarstwa
póndźela, 07 junija 2021 14:00

Premjerje pod hołym njebjom

Po měsacy trajacej nanućenej přestawce je Němsko-Serbske ludowe dźiwadło sobotu lětsa prěni raz předstajenje z publikumom wuhotowało. Na wupředatej zahrodźe wulkeho domu dožiwi něhdźe 70 wopytowarjow premjeru krucha „Godow und ­Somorrha“. Hra Šćěpana Siegfrieda je druhi dźěl rjadu „Gedöns vonner Insel“ a wotbłyšćuje z dobrej porciju satiry aktualne towaršnostne połoženje. Předstajenje bě zdo­bom 250. premjera před 60 lětami załoženeho Budyskeho klankodźiwadła. Wčera slědowaše na samsnym, tohorunja wupředatym městnje premjerna insce­nacija krucha za dźěći „Kasper und das Wahrheitstuch“. Foto: SN/Hanka Šěnec

wozjewjene w: Kultura
póndźela, 07 junija 2021 14:00

Přepytowarjej Vatikana w Němskej

Köln (dpa/SN). Japoštołskaj wizitatoraj Andreas Arborelius ze Stockholma a Hans van den Hende z Rotterdama staj dźensa do Kölna dojěłoj, kaž rěčnica biskopstwa powěsćerni dpa wobkrući. Nowinarska konferenca njebě planowana. Biskopaj mataj w nadawku bamža Franciskusa „móžne misnjenja swojeje eminency, kardinala Woelkija“ přepytować a wotpowědnu rozprawu zdźěłać. Planowane su rozmołwy ze zastupjerjemi woporow splažneho znjewužiwanja.

Opozicija ze swójskej rozprawu

Berlin (dpa/SN). Zastupnicy opozicije w přepytowanskim wuběrku nastupajo jebanja w bywšim předewzaću Wirecard chcychu dźensa swoju rozprawu předstajić. Powšitkownje wočakowachu raznu kritiku nastupajo dźěło zwjazkoweho knježerstwa a předewšěm financneho ministra Olafa Scholza (SPD). Mnichowska firma Wirecard bě 2019 přiznała, zo njehodźi so 1,9 miliardow eurow z bilancow hižo namakać. Slědowaše insolwenca. Wuchadźeja z toho, zo bě firma wot lěta 2015 swoje bilancy masiwnje falšowała.

Lěkarjo: Přewjele njewočakować

wozjewjene w: Kraj a swět
Po dołhej přestawce koronapandemije dla turizm nad Baltiskim a Sewjernym morjom poněčim zaso wotuća. Kaž tule w schleswigsko-holsteinskim Scharbeutzu wužiwachu mnozy słónčne wjedro za wulět k morju. Přiwšěm njebě nawal tak wulki kaž ­wočakowany. Předewšěm na přibrjohach Mecklenburgsko-Předpomorskeje bě hišće wjele městna. Foto: dpa/Michael Probst

wozjewjene w: Kraj a swět
póndźela, 07 junija 2021 14:00

To a tamne (07.06.21)

Na nakładnym ćahu k Baltiskemu morju po puću była je 27lětna žona z Čěskeje. Swědcy běchu železnicu wo tym informowali, kotraž na to policiju alarmowaše. Zastojnicy ćah pola braniborskeho Hohenleipischa zadźeržachu a namakachu 27lětnu pod planu. Žona přizna, zo bě w Bad Schandauwje na ćah do Rostocka zalězła. Tam chcyše dźeń při morju wostać a so na samsne wašnje domoj podać. Nětko dyrbi wězo pokutu płaćić. Zwotkel bě wědźała, zo ćah do Rostocka jědźe, a hač tomu scyła tak bě, policija njezhoni.

Nócne wołanje dweju skalneju wiwkow (Steinkauz) je w posaarskim St. Ingberće zasadźenje policije zawiniło. Ludźo sej myslachu, zo reaguje alarmowa připrawa na paduchow, a wołachu policiju. Njebě pak wjace hač wołanje ptakow, štož klinčeše woprawdźe kaž zwuki alarmoweje připrawy, samo zastojnicy wobkrućichu.

wozjewjene w: To a tamne

Serbska debata

nowostki LND