Z wudaća: srjeda, 09 junija 2021

Incidenca niska kaž hišće ženje

Budyšin. 13 nowych natyknjenjow z koronawirusom su wčera w Budyskim wokrjesu zwěsćili. Dale stej dwě wosobje zemrěłoj. Incidenca po informacijach Roberta Kochoweho instituta dale woteběra. Wottam zdźělichu za dźensa hódnotu 23, tak nisku kaž hišće ženje. Za Zhorjelski wokrjes podawa RKI hódnotu 12,3. Tam zwěsćichu wčera pjeć infekcijow, jednu z britiskej mutantu B.1.1.7.

Nora Schmid nowa intendantka

Drježdźany. Semperowa opera Drježdźany změje wot hrajneje doby 2024/25 nowu intendantku. 42lětna Nora Schmid naslěduje potom Petera Theilera, kotrehož zrěčenje w lěće 2024 wuběži. Z Berna pochadźaca hudźbna wědomostnica skutkowaše hižo w sezonje 2010/2011 na Sakskej statnej operje, a to jako šefdramaturgowka a wot 2012 přidatnje jako wosobinska asistentka intendantki.

Přećiwo drogowej kriminaliće

Truskalcowa sezona we Łužicy je zahajena. Chłóšće huby móža sej słódke płody na wjacorych polach pak w korbiku kupić pak same­ šćipać. W Kašecach poskića Christian Bock dohromady wosom družin truskalcow. Wot ranja napoł šesćich je tam žnjenscy pomocnicy do korbikow šćipaja. Andreas Purle (na foće) z Biskopic pak sej kóžde lěto sam swoje čerwjene płody w Kašecach šćipa. Tež Domani­cy z Hózka na polu w Sćijecach zaso truskalcy poskićeja. Jutře tam předawanišćo wotewru. Foto: SN/Hanka Šěnec

Drježdźany (SN/JaW). Eksterni fachowcy za geotechniku su prěnje wuslědki wo přičinach zesunjenja přibrjoha 11. měrca při Hórnikečanskim jězoru předpołožili. Kaž nowinski rěčnik Sakskeho wyšeho hórniskeho zarjada Freiberg prof. dr. Bernhard Cramer wčera w nowinskej infor­maciji zdźěli, je w posudku, kotryž su fachowcy hórniskemu zarjadej kaž tež Łužiskej a srjedźoněmskej towaršnosći hórnistwoweho zarjadnistwa (LMBV) pře­podali, rěč wo wjacorych přičinach, kotrež su k zesunjenju wjedli.

Mjez 36 próstwami Załožbje za serbski lud mnohe z nowymi idejemi

Budyšin (SN/CoR). „Wjeselimy so, zo je tójšto próstwow z nowymi wobsahami dóšło“, praji Nicole Zimmermannec, zamołwita za controlling kaž tež za regionalne projekty w Budyskim zarjedźe Załožby za serbski lud. Dohromady dóstachu 39 próstwow wo spěchowanje za druhe połlěto 2021, tři z toho su zapodawarjo wšelakich přičin dla mjeztym zaso cofnyli. Z tamnymi je so fachowa přirada za projektowe spěchowanje w meji zaběrała a za nje poručenja schwaliła.

Zdźěla su to prawidłownje zapodawane projekty – kaž na přikład probowe lěhwa chórow a ansamblow. Tež dźěłarnički maja so zaso wotměć, kaž na přikład zwjetša na dorost wusměrjacy so workshop za komponowanje Zwjazka serbskich wuměłcow (ZSW). Dobreho wothłosa dla na dźěłarničku za wušiwanje a wjazanje křižerskich seklow spočatk lěta poskića Spěchowanski kruh za serb­sku ludowu kulturu dalši wušiwanski kurs. Znowa spěchuje załožba tež serbskich wobdźělnikow na mjezyna­rodnej rězbarskej dźěłarničce Njebjelčanskeho towarstwa Kamjenjak.

Drježdźany (SN/bn). Sakske knježerstwo je nowe postajenje statneho ministerstwa za kultus wo wobmjezowanjach za pě­stowarnje a šule wobzamknyło. Wo­stawa-li „regionalna incidenca sydom dnjow za sobu stabilnje pod 35“, njeje škitny nahubnik w šulskich twarjenjach wjace obligatoriski, rěka we wčera wozjewjenej nowinarskej zdźělence ministerstwa. Nimo toho wukaz předpisuje, zo „wostawaja dźěćace dnjowe přebywanišća a šule regularnje přistupne, dołhož incidenca hódnotu 100 njepřekroči. Šulerski wobchad ke kubłanišćam je pod samsnymi wuměnjenjemi zaso móžny.“ Winowatosć, so dwójce wob tydźeń na koronawirus testować, pak njewotwisnje wot wuwića incidency dale wobsteji. Nowe­ postajenje bě trěbne, dokelž wukaz dotal za škitne naprawy zamołwiteho statneho ministerstwa za socialne a towaršnostnu zwjazanosć postupowanje na kubłanišćach hižo njerjaduje, a płaći wot 14. do 30. junija.

Braniborska chce plan za sylnjenje delnjo­serbšćiny aktualizować a dale wjesć. Nowe předsydstwo župy Delnja Łužica ze swojim županom Pětšom Šurma­nom na čole sej pomina, zo maja prócowanja wo rewitalizaciju delnjoserbšćiny w planje primat měć.

Dešno (HA/SN). W lěće 2016 bě knježerstwo Braniborskeje krajny plan za sylnjenje delnjoserbskeje rěče wobzamknyło. Dokelž su wšelake nadawki woneho plana mjeztym spjelnjene a žane dalše aktual­ne naležnosće w tym nastupanju njejsu, je Braniborski krajny sejm lětsa 25. měrca postajił, plan aktualizować a dale wjesć. To je dźěl wobšěrneho koncepta, z kotrymž chcedźa wšitke mjeńšinowe a regionalne rěče w kraju runje tak kaž rěč swojich pólskich susodow sylnišo a zaměrnišo spěchować. Tak chce Braniborska status wjacerěčnosće docpěć.

Skazane wučbnicy za nowe šulske lěto dodawaja poprawom kónc lětnich prózdnin. Někotre kubłanišća pak so hižo trochu prjedy wo knihi a dźěłowe materialije staraja. Wčera je sobudźěłaćer rozšěrjenskeho wotrjada Ludoweho nakładnistwa Domowina Domenico Gruhn knihikupči Elisabeth Sygusch serbske wučbnicy za 1. do 4. lětnik přepodał. Sygusch, kotraž šulam regiona knihi po wotpowědnym wupisanju wot lěta 1996 dowožuje, šaržu nětko po Łužicy rozdźěli. Mjez druhim dowjeze wona materialije do Budyskeje Serbskeje zakładneje šule a do Zakładneje šule w Nowej Wsy (Sprjewiny Doł). Foto: SN/Hanka Šěnec

Berlin (dpa/SN). Za předewzaća, kotrež su so w pandemiji do hospodarskich će­žow dóstali, je zwjazkowe knježerstwo dźensa zjednorjeny přistup k pjenjezam krótkodźěłacych z postajenjom znowa podlěšiło. Po nim stat tež po 30. juniju socialnozawěsćenske přinoški při krótkodźěle dospołnje zaruna. Wot oktobra wón jenož hišće połojcu přinoškow přewozmje, su-li firmy z krótkodźěłom hač do 30. septembra započeli. Za přizjewjenje krótkodźěła ma dale dosahać, hdyž je znajmjeńša dźesać procentow dźěławych potrjechene, nic kaž hewak třećina.

Unija chce kraj modernizować

Berlin (dpa/SN). Frakcija CDU/CSU w zwjazkowym sejmje chce Němsku jako konsekwencu z koronakrizy ze 40dypkowskim programom za statnu reformu modernizować. „Naš kraj ma so jednoriši, agilniši, digitalniši a krućiši w krizach stać“, rěka we wčerawšim 17stronskim wobzamknjenju frakcije unije. Mjez druhim „hodźało so telko statnych wukonow kaž móžno spěšnje a digitalnje zrjadować“.

Mjenje započatkarjow z wukraja

Zapřadkowe mole (Gespinstmotten) wobdawaja cyłe štomy a kerki. Tajke z běłym zamotkom móžemy ­tuchwilu zaso w přirodźe wobkedźbować. Často znate njeje, ­kotry překasanc je tajke zamotki tworił. Mnozy ludźo zaměnjeja tule družinu ze škódnym dubowym ­pućowanskim přadnikom (Eichenprozessionsspinner). Foto: pa

Drježdźany (dpa/SN). Sakska wotpohladuje z nowym škitnym postajenjom pře koronu, kotrež ma wot 14. junija płaćić, wolóženja po schodźenkach při małej ­ličbje natyknjenjow. Mjez druhim wotpadnje winowatosć testa w mnohich wobłukach, kaž to wčera strowotniska mi­nisterka Petra Köpping (SPD) po posedźenju kabineta připowědźi. Pod wuměnjenjom, zo je incidenca pjeć dnjow za sobu niša hač 35, płaća wolóženja dwaj dnjej po tym. Za nakupowanje, za wopyt hosćenca abo kupjele pod hołym njebjom njeje negatiwny test dale trěbny. Wu­wzaća su wiki a wulkozarjadowanja.

Nowe krajne postajenje płaći hač do 30. junija, potom tak mjenowane zwjazkowe nuzowe borzdźiło wuběži.