Z wudaća: pjatk, 16 julija 2021

Pjatk 16.7. 19:30 Poetry-slam „Spreelevant“ w Budyskim Kamjentnym domje

  20:30 Předstajenje Budyskeho lětnjeho dźiwadła „Sherlock­ Holmes“ na dworje Budyskeho hrodu

Sobotu 17. a 18.7.   Srjedźoněmske wuměłskorjemjeslniske wiki při Nje­swačanskim hrodźe (stajnje wot 11 hodź.)

  14:00 2. hornjołužiski festiwal dźěćaceje hudźby „Swětowa hudźba za dźěći“ w Budyskim Kamjentnym domje

  15:00 Zahajenje Lěto župow Domowiny před radnicu we Wojerecach

  17:00 Předstajenje Budyskeho lětnjeho dźiwadła ­„Sherlock Holmes“ na dworje Budyskeho hrodu

  17:00 Swjedźeń zeznawanja towarstwa Kamjenjak w Miłočanskej skale „Při Krabatowym kamjenju“

  19:00 Nóc tysac swěčkow w přirodowej a wučbnej zahrodźe klóštra Marijineje hwězdy w Pančicach-Kukowje

  20:30 Předstajenje Budyskeho lětnjeho dźiwadła ­„Sherlock Holmes“ na dworje Budyskeho hrodu

Njedźelu 18.7. 8:30 Kemše z Božim wotkazanjom w Poršicach

  14:00 Ryćerske hry na Mortkowskej Jakubec twjerdźiznje

  14:30 Koncert ze Spěwnym consorciumom seniorow w Drježdźanach

  21:00 Filmowe nocy při Čornochołmčanskim Krabatowym młynje: „Der Spion“

Póńdźelu 19.7. 17:00 Wokrjesny sejmik Budyšin

Přihotuja koparski supercup

Sportowa jednotka Njebjelčicy budźe 25. julija w Njebjelčicach hosćićel 4. serbskeho supercupa – turněra ze štyrjomi koparskimi mustwami. Wot 14.30 hodź. přewjedu prěnje połfinale, wot 15.25 hodź. druhe. Hra wo třeće městno za­počnje so potom wokoło 16.25 hodź., finale něhdźe w 17.25 hodź. Kóždy duel je na 45 mjeńšin postajeny, kmótřistwo turněra přewozmje zapósłanc krajneho sejma Alojs Mikławšk (CDU). Wón chce tež wobaj­ semifinalej wulosować. Připrajili su SJ Chrósćicy, SJ Njebjelčicy, ST 1922 Radwor a Sokoł Ralbicy/Hórki. Naposledk mjenowany cyłk pokal zakituje.

6. captainscup w bičwolejbulu

Wolejbulisća Viktorije Worklecy přewjedu 31. julija a 1. awgusta wot 10 hodź. šesty bičwolejbulowy captains­cup. Hrać budu we Worklecach na nowymaj bič­wolejbulnišćomaj za sportowej halu. Nimo turněra na wyšim niwowje z hra­jerjemi sakskeje klasy změja tam lětsa tež turněr za wólnočasne mustwa. Dokładne wupisanje a přizjewjenske modality pod

Bičtura Satkule dale dźe

Jeli wot wupokazaneho spočatka po liniji dale, wučitaće powójnski spěw.

Hórki (JK/SN). Prjedy hač sej gmejnscy radźićeljo w Chrósćicach swój zasłuženy dowol popřeja, wobzamknychu woni na swojim wčerawšim posedźenju wjacore wažne naležnosće, kotrež maja přichodnje zwoprawdźić. Za wšelake twarske na­prawy su wjesnjanostu Marka Klimana (CDU) społnomócnili, ho­spodarsce najpřijomniše poskitki při­wzać a wotpowědnje rozsudźić. Tak ma wón podpisać honorarne zrěčenje za inženjerske planowanje přetwara Chróšćanskeje nawsy a areala při Cyrkwinskej horje. Za tele naročne předewzaće je gmejna tež próstwu wo spěchowanje zapodała a nadźija so wo přizwolenje. Wotpowědny program předwidźi spěchowanje we wobjimje 75 procentow. Swójski podźěl wozmje gmejna z pjenjez, kotrež je jako myto w lońšim wubědźowanju simul+ dobyła. Kajka ma Chróšćanska nawjes jónu wupadać, móžachu sej zajimcy na njedawnym zarjadowanju w „Jednoće“ wobhladać.

Słódne holanske jahodki su sej Horbankecy z Budyšina tele dny w lěsu při starej dróze z Dobrošic nimo Koslowa do směra ­na Ralbicy našćipali. Borbora Horbankowa rodź. Langec (nalěwo) je tule na samsnym městnje ze swojej maćerju hižo w 1960tych lětach jahodki šćipała, a mać je po tym w Budyšinje za přidatnu zasłužbu předawaše. Tónraz pomhaštaj jej při tymle sporym dźěle mandźelski Fritz a Adelheid Schneider. Foto: Feliks Haza

Starši so wudawkow w Njebjelčanskej pěstowarni dla naprašowali

Njebjelčicy (SN/MWj). Wjele wutrajnosće trjebachu čłonojo Njebjelčanskeje gmejnskeje rady na swojim wčerawšim posedźenju, jako steješe hospodarski plan 2021 w srjedźišću. Přećiwo njemu běchu někotři radźićeljo tójšto znapřećiwjenjow zapodali, kotrež so na najwšelakoriše pozicije wudawkow měrjachu. Kóžde jednotliwe prašenje wjesnjanosta Tomaš Čornak (CDU) wčera nadrobnje rozłoži.

Tak porokowachu radźićeljo mjez druhim wudawki gmejny za rězbarsku dźěłarničku, měnjo, zo měła wona tež tamne towarstwa spěchować. Nimo toho wěnowachu so wjacore zapodaća přećiwo planowanym wudawkam za komunalny twarski zawod, kotryž chcedźa přichodny čas rozšěrić a wjacore rumnosće přemysłownikam wotnajeć. Při jednotliwych wothłosowanjach wjetšina radźićelow znapřećiwjenja wotpokaza. Tak móžachu skónčnje cyłkowny hospodarski plan gmejny Njebjelčicy za lěto 2021 wobzamknyć.

Radwor (SN/MkWj). Z wjacorymi dobrymi powěsćemi móžeše Radworska wjesnjanostka Madeleine Rentsch předwčerawše posedźenje gmejnskeje rady zahajić. Tak wona radźićelam a hosćom zdźěli, zo je Załožba za serbski lud 5 100 eurow za ­ponowjenje Hronowskeho křiža přewostajiła, kotryž běchu njeznaći powalili a wobškodźili. Runje tak ju ­zwjesela, zo běchu tři zapodate projekty gmejny Radwor na idejowym wubě­dźowanju k polěpšenju turistiskeje in­frastruktury we Łužicy wuspěšne: Radworski katolski dźěćacy dom ze swojim projektom „Na slědach Alojsa Andrickeho“, projekt na bywšim Radworskim dwór­nišću na dobro inkluzije zbrašenych a přede­wzaće Radworskeho kupoweho zjednoćenstwa nastupajo twar noweje škitneje chaty.

Na statoku Hanza Njepile w Rownom knježi zaso žiwjenje. Wosebje aktiwni su pčołarjo a Čerwjeny křiž Běła Woda, kiž so wo dorost stara. W zetkanišću towarstwa Njepilic dwór witaše předsyda Manfred Nikel njedawno skupinu dźěći a młodostnych. Woni wobhladachu sej tam film wo pčołkach a wo hódnoće překasancow za čłowjeka a přirodu. Na to je jim předsyda Slepjanskeho towarstwa pčołarjow Jürgen ­Marusch na cyle praktiske wašnje dalšu wědu wo pčołkach posrědkował. Zarjadowanje přewjedźechu we wobłuku krajneho wubědźowanja Čerwjeneho křiža za młodostnych Sakskeje nastupajo wobswětoškit a socialne. Jako trajnu temu su sej škit pčołkow wuzwolili. Foto: Jost Schmidtchen

Kulow (AK/SN). Natwar a wjedźenje škričkowanskeho sćežora na komunalnej ležownosći w Mučowje blisko Hórnikečanskeho jězora je Kulowska měšćanska rada předwčerawšim z jednym napřećiwnym hłosom wobzamknyła, wobkrućejo tak swój rozsud z 8. julija 2020.

Přećiwo mjenowanemu rozsudej bě Mučowska wobydlerska iniciatiwa wobydlerski rozsud docpěła, kotryž su lětsa 9. meje přewjedli. Wjetšina wotedatych hłosow drje bě přećiwo sćežorej, wona pak njewotpowědowaše znajmjeńša štwórćinje wšěch wólbokmanych. Dokładnje bě to 24,99 procentow. Tež prawniski dohladowanski zarjad Budyskeho krajnoradneho zarjada měni, zo tónle wuslědk njedosaha, čehoždla je postupowanje města nětko ryzy prawnisce w porjadku, rjekny Kulowski měšćanosta Markus Posch (CDU).

Baćoń. Jehmlichowe pišćele w Baćońskej cyrkwi Jězusoweje wutroby, twarjene w lěće 1890, dyrbja ponowić, zo bychu je do přichoda zachowali. Hižo dlěje wosada za to pjenježne dary zběra. Zo móhli projekt prawje bórze zwoprawdźić, wuhotuja pišćelowy koncert, a wutoru, 20. julija, w 19 hodź. Hudźić budźe Klaus-Dieter Untch, Sedmihrodźan z Rumunskeje. Organist, kiž dwaj dnjej do toho w měšćanskej cyrkwi rudnohórskeho Frauensteina koncertuje, chce w Baćonju improwizacije, swójske kompozicije ­a twórby Johanna Sebastiana Bacha přednjesć.

Pokazaja wuměłske rjemjesło

Njeswačidło. Mjeztym šesty raz wotměja so jutře a njedźelu w parku Njeswačanskeho barokneho hrodu wuměłstwowe rjemjeslniske wiki. Tam předstaja so zhotowjerjo debjenkow a drasty, korbarjo, knihiwjazarjo, rězbarjo, florisća, hornčerjo a mnozy dalši. Rjemjeslnicy ­jeno swoje wudźěłki njeposkićeja, ale zdźěla tež pokazaja, kak wone nastawaja. Přistupne su wiki sobotu wot 11 do 18 hodź. a njedźelu wot 10 do 18 hodź. Za wiki a kulturny program zběraja zastup.