Z wudaća: póndźela, 19 julija 2021

póndźela, 19 julija 2021 14:00

Jendźelska naprawy zběhnyła

London (dpa/SN). Najebać přiběrace ličby koronainfekcijow su wot dźensnišeho w Jendźelskej nimale wšitke wobmjezowanja koronawirusa dla zběhnjene. Tak njetrjebaja ludźo w nutřkownych rumnosćach dale nahubniki wužiwać a wěstotny wotstawk dodźeržeć. Fachowcy warnuja, zo móhło so połoženje najebać wysoku kwotu šćěpjenja přiwótřić. Hižo nětko registruja wšědnje wjace hač 50 000 nowych infekcijow z koronawirusom, nimale telko kaž na wjeršku pandemije spočatk lěta.

FDP: Kónc wuwzaćneho stawa

Berlin (dpa/SN). FDP němske knježerstwo namołwja, „epidemiske połoženje narodneho rozměra“ na rjadowane wašnje skónčić. Prawniski zakład rjadowanjow koronawirusa dla, kaž su to šćěpjenje a testy, so 30. septembra skónči. Epidemiske połoženje „njeje hižo kmany srědk w boju přećiwo pandemiji“, rjekny parlamentariski jednaćel frakcije FDP w zwjazkowym sejmje Marco Buschmann. Nětko je načasu so wot wuwzaćneho do prawnisce normalneho stawa wróćić.

Zepěranišćo EU wobtřěleli

wozjewjene w: Politika
póndźela, 19 julija 2021 14:00

Maturanća wučerjow wysoko porazyli

Prěnja koparska hra mjez pedagogami a maturantami Serbskeho gymnazija Budyšin (SGB) wotmě so 1. junija 1994. Wučerjo podležachu šulerjam tehdy 2:5. Tež we 28. duelu lětsa bě młódša gene­racija z 8:1 wuspěšna.

Dźeń po wolejbulowej hrě mjez wuče­rjemi a maturantami SGB (SN wo tym rozprawjachu) slědowaše koparska hra. Bě to mjeztym 28. tajki dwubój. Dwanatkarjo běchu dotal dwaceći króć dobyli. Pjatk, 9. julija, je dalši triumf k tomu přišoł. Hodźinu do sportoweho duela so w Budyšinje dešćowaše, a tak přepołožichu koparsku partiju do sportoweje hale Serbskeho šulskeho a zetkawanskeho centruma. Tartanowa podłoha wonka bě po dešćiku ekstremnje hładka a strach zranjenja tuž jara wulki.

Po tym zo bě jědnatkar Jakub Škoda hru zahwizdał, njetraješe ani minutu, a fanowy blok dwanatkarjow prěni raz juskaše. Mócna třělwa Róžeńčana Kiliana Hrjehorja z centralneje pozicije dźěše do del­njeho kuta wučerskich wrotow. Wrotar a nawoda gymnazija René Wjacławk bě bul přepozdźe widźał.

wozjewjene w: Sport
Sylne zliwki su sobotu popołdnju tež Łužicu trjechili. We Wjazońcy je rěčka Wjazońca (Wesenitz) wjacore ležownosće zapławiła. Čłonojo wohnjoweje wobory a Techniskeho pomocneho skutka běchu cyły čas zasadźeni, zo bychu potrjechenym pomhali a ležownosće před wodu škitali. Zdźěla stejachu delnje poschody domow při rěce pod wodu. Foto: Christian Essler

wozjewjene w: Politika
póndźela, 19 julija 2021 14:00

Strowota bamža so polěpša

Rom (B/SN). Tydźeń po operaciji bamž Franciskus wěriwym pokazuje, kak hodźi so ćělne a dušine ćerpjenje znjesć. Tak je so 11. julija samo z 10. poschoda Gemelli-kliniki paćer Jandźelknjeza z wěriwymi modlił. Na kóncu prědowanja dźakowaše so zjawnje za wuběrne dźěło lěkarjow a dalšeho medicinskeho personala. Z cyłeho swěta dochadźeja postrowy a přeća bórzomneho wustrowjenja k swjatemu wótcej do kliniki. Na kóncu wurjadneho posedźenja Stajneje rady biskopskeje konferency minjeny tydźeń w Romje dorozumichu so zastupjerjo z Franciskusom wo dalšim postupowanju a wupřachu jemu bórzomny nawrót do Vatikana.

Njerozprawja jeno wo katolikach

wozjewjene w: Cyrkej a swět

We wobłuku maturitneje swjatočnosće su šulerkam a šulerjam Serbskeho gymnazija Budyšin (SGB) na hłownym jewišću Budyskeho Němsko-Serbskeho ludoweho dźiwadła předwčerawšim kónčne wuswědčenja přepodali. Přizamknył je so hač do rańšich zerjow trajacy abiturny bal w Chróšćanskej wjacezaměrowej hali „Jednota“.

wozjewjene w: Kubłanje
póndźela, 19 julija 2021 14:00

„Lěto župow“ zahajene

Z jich wutworjenjom so Domowina hižo 1921 na puć regionalizacije podała

Wojerecy (SN/at). Na skerje mjenje znaty jubilej złožujo je so Domowina na puć regionalizacije a decentralizacije podała. We wobłuku swjatočnosće na swětłowym dworje Wojerowskeje radnicy spominaštej serbski třěšny zwjazk a město nad Čornym Halštrowom předwčera­wšim na wutworjenje Domowinskich župow­ 24. julija 1921. Zarjadowanje bě před radnicu na torhošću planowane, zliwki sobotu popołdnju pak tomu zadźěwachu. Po słowach Wojerowskeho wyšeho měšćanosty Torstena Rubana-Zeha (SPD) pak běchu w nutřkownym dworje „ni­male na historiskim městnje“, na kotrymž běchu štyri Domowinske župy­ wu­tworili. Wjeršk swjatočnosće bě wot­kryće tafle na lěwym boku rad­nicy, dopominaceje ze sadu „W tutym domje załožichu 24.07.2021 župy Domowiny, Zwjazka Łužiskich Serbow“ w serbskej a němskej rěči na datum, kotryž mjenuja dźensa započatk regionalizacije.

wozjewjene w: Towarstwa
póndźela, 19 julija 2021 14:00

Milbradt: Dźěl solidarity wróćić

Drježdźany (dpa/SN). Bywši ministerski prezident Sakskeje Georg Milbradt (CDU) wočakuje wot zwjazkoweho knježerstwa spěšnu pomoc za wot katastrofy wulkeje wody potrjechene zwjazkowe kraje. Zdobom wón wobydlerjow Sakskeje prosy potrjechenym ludźom pomhać.

„Zamołwići na zwjazkowej runinje dyrbjeli naprawy za potrjechenych wobydlerjow, jich gmejny a zwjazkowe kraje spěšnje wobzamknyć, runje tak, kaž sta so to před 19 lětami na naše dobro“, rjekny Milbradt Drježdźanskim nowinarjam. Sakska bě w lěće 2002, něšto tydźenjow do wólbow zwjazkoweho sejma, přez wulku wodu hoberske škody poćerpjeła. Zwjazk zestaja na to pomocny program wjacorych miliardow eurow.

Milbradt wobydlerjow Sakskeje zdobom namołwja nětko něšto teje solidarity wróćić, kotruž bě swobodny stat swój čas ze zapada Němskeje dóstał. Wottam běchu tehdy tysacy pomocnikow pósłali.

wozjewjene w: Politika
póndźela, 19 julija 2021 14:00

Swinje morjene

Neiße-Malxetal (dpa/SN). Po wudyrjenju afriskeje swinjaceje mrětwy w ratarskim bio-zawodźe na juhowuchodźe Braniborskeje su tam wšitke 200 swini morili. To je rěčnik braniborskeho ministerstwa za škit přetrjebarjow Dominik Lenz wčera zdźělił. W zawodźe Neiße-Malxetal we wokrjesu Sprjewja-Nysa bě ranca zahi­nyła. Zo bychu rozšěrjenju mrětwy zadźěwali, dyrbjachu nětko wšitke skoćata morić. Afriska swinjaca mrětwa bě z tymle a dalšimaj padomaj w Letschinje we wo­krjesu Märkisch-Oderland prěni króć w jednej němskej plahowarni swini wudyriła.

wozjewjene w: Politika
póndźela, 19 julija 2021 14:00

Wulke zliwki tež w Sakskej

Bad Schandau (dpa/SN). Masiwny dešć je w dźělach Sakskeje zapławjenja zawinował. W Sakskej Šwicy njeběchu wjacore wsy docpějomne. Wosebje potrjechene běchu Wjazońca, Bad Schandau, Reinhardtsdorf-Schöna a Gohrisch, kaž Budyski krajnoradny zarjad zdźěli. Železnisku čaru mjez Bad Schandauwom a čěskim Děčínom dyrbjachu zawrěć. „Situacija je napjata, ale wobknježomna“, rěka z nutřkowneho ministerstwa.

Po informacijach krajneho centruma za wulku wodu naměri při rěkomaj Kirnitzsch a Sebnitz w běhu 24 hodźin wjace hač sto litrow dešća. Na to su pegele rěkow spěšnje stupali. W Sakskej Šwicy běchu dróhi z błótom a kamjenjemi zanjerodźene. Při tym dóńdźe k zesuwanjam zemje. Regionalny wohnjowoborny zasadźenski centrum rěči wo wjace hač 250 zasadźenjach wohnjowych wobornikow sobotu hač do pózdnjeho wječora. Tež w druhich dźělach Sakskeje bě połoženje napjate, wosebje w mjeńšich rěkach. Tam dóńdźe k přepławjenym dróham a naběžanym pincam.

wozjewjene w: Politika
póndźela, 19 julija 2021 14:00

Kritizuja system warnowanja

Kontrowersna debata wo zahubnych zapławjenjach na zapadźe Němskeje

Berlin (dpa/SN). Po zahubnych zapławjenjach na zapadźe Němskeje z nimale 160 smjertnymi woporami wumjetuje FDP zwjazkowemu nutřkownemu ministrej Horstej Seehoferej (CSU) hladajo na sćěhi katastrofy wulke njedostatki nastupajo škit ludźi před katastrofami. „Dypkowne warnowanja wjedrarjow njejsu ani zamołwite instancy ani zjawnoprawniski rozhłós ludźom w dosahacej měrje dale posrědkowali, rjekny městopředsyda frakcije strony w zwjazkowym sejmje ­Michael Theurer powěsćerni dpa. „Skići so wobraz systemoweho zaprajenja, za kotrež je zwjazkowy nutřkowny minister Horst Seehofer wosobinsce zamołwity.“ Lěta dołho leža reformowe namjety FDP na blidźe, ale ničo so stało njeje. To płaći žiwjenja.

Tež strowotniski fachowc SPD Karl Lauterbach sej žada, konsekwency z nazhonjenjow katastrofy zapławjenja sćahnyć. Škit před katastrofami nastupajo je Němska runje tak špatnje přihotowana kaž pola škita před pandemijemi, rjekny Lauterbach Düsseldorfskim nowinarjam.

wozjewjene w: Politika

nawěšk

SERBSKE NOWINY podpěruja:

Novi Sad – kulturna stolica Europy

nowostki LND