Z wudaća: póndźela, 19 julija 2021

póndźela, 19 julija 2021 14:00

Policija (19.07.21)

Motorskej pokradnyli

Njebjelčicy. W běhu minjeneho štwórć lěta, dokładnje wot 22. apryla, su njeznaći na Jěžowskej dróze w Njebjelčicach dwě motorskej pokradnyli. Pytnyli su to wobydlerjo předwčerawšim. Po informacijach policije běchu so paduši do njezamknjeneje garaže zadobyli a z njeje mašinje sobu wzali. Jedna so wo Suzuki a wo Jawu. Wobě njeběštej přizjewjenej a njeměještej žane čisło. Hódnotu motorskeju trochuja wobsedźerjo na něhdźe 2 000 eurow. Kriminalna policija nětko za jězdźidłomaj pyta.

wozjewjene w: Policija
póndźela, 19 julija 2021 14:00

Wiki na zbožo do wody njepadnyli

Po sobotnych zliwkach w Hornjej Łužicy móžachu wčera w Rakecach tola hišće čaporowe wiki wotměć. Poskićachu tam móhłrjec wšo, štož čłowjek njetrjeba. Samo z Pólskeje bě wikowar přijěł a najwšelakoriše wudźěłki ze železa sobu přiwjezł. Sčasami běchu wiki wot wulkeje wody wohrožene. Pomocnicy wokoło wjesnjanosty Swena Nowotneho (CDU) pak je na kóncu zmóžnichu. Tež nowe spušćadło Čornicy pola Nižeje Wsy so jako spomóžne wopokaza. Jeničce někotre łuki a zahrodki běchu přepławjene. Kritiske bě połoženje wěstu chwilu pola Ćiska, hdźež su w nocy na njedźelu alarmowanski schodźenk 3 wuwołali. Foto: Feliks Haza

wozjewjene w: Łužica
póndźela, 19 julija 2021 14:00

Prawa gmejnskich radźićelow

W zwisku z komunalnym dźěłom w městach a gmejnach nastawaja zas a zaso prašenja, čehodla wobsteja wěste rjadowanja, kak je to a tamne zakonsce předpisane a štó ma poprawom kotre prawa. Na tajke a podobne prašenja wotmołwjamy w małej seriji. Naš ­awtor je bywši wjelelětny předsyda ­zarjadniskeho zwjazka Při Klóšterskej wodźe Alfons Ryćer. (7)

Gmejnska rada je čestnohamtske po­litiske zastupnistwo wobydlerstwa a hłowny organ komuny. Wona roz­sudźa wo wšěch naležnosćach gmejny, dalokož njejsu po zakonjach wěste nadawki wjesnjanosće přirjadowane. Hač su to hospodarski plan, personalne naležnosće, wobzamknjenje najwšela­korišich wustawkow, přistup k zamě­rowym abo zarjadniskim zwjazkam, pěstowarnja, šula, komunalne bydlenja a wjele dalšeho – wšitko maja gmejnscy radźićeljo na swojich zhromadźiznach wobjednać.

wozjewjene w: Łužica
póndźela, 19 julija 2021 14:00

Widźał, słyšał, napisał (19.07.21)

Awtor dźensa Tomaš Faska

Pisamy 19. julij, mjeztym woprawdźe hižo zaso­ 200. dźeń lěta, a to je datum­ z wosebitym wuznamom za najznaćiše a najwoblubowaniše kolesowarske wubědźowanje swěta. Wěnuju so tónraz Tour de France, kotrejež lětu­še wudaće skónči so wčera w Parisu z dobyćom wusahowaceho Słowjenca Ta­de­­ja Pogačara.

póndźela, 19 julija 2021 14:00

Stadion budźe pře- a wutwarjeny

Krajna stolica Drježdźany dóstanje 770 000 eurow spěchowanskich srědkow z Eu­rop­­skeho fondsa za regionalne wuwiće (EFRE) po spěchowanskej směrnicy „Sporjadkowanje poćeženych płonin“, zo bychu kontaminowane twarske wotpadki w zwisku z pře- a wutwarom Heinza Steyeroweho stadiona fachowsce wotstronili. Měšćanosta za sport dr. Peter Lames dźakuje so Swobodnemu statej Sakskej za spěchowanje. Cyłkowne kóšty wučinjeja něhdźe 960 000 eurow. Zbytk zaruna město Drježdźany. Twarske dźěła započnu so w oktobrje 2021. Foto: Jürgen Männel

wozjewjene w: Sport
póndźela, 19 julija 2021 14:00

Haselbachtalski koparski camp

W prěnim prózdninskim tydźenju wot 26. do 29. julija přewjedźe Sportowe towar­stwo Haselbachtal w Bischheimje zaso­ koparski camp za holcy a hólcow w starobje šěsć do 16 lět.

Wot 9.30 do 16 hodź. poskića tam kóždy­ dźeń wotměnjawy trening, za kotryž móžachu prominentnych nazwu­čowa­rjow angažować. Připrajili su mjez druhim Tomaš Henčl (Budissa Budyšin, wyša liga), Frank Lippmann (něhdyši hrajer Dynama Drježdźany), Thomas Baron­ (trenar koparskeje młodźiny A FC Hornjeje Łužicy Neugersdorf) a Udo Schmuck (něhdyši hrajer a trenar Dynama Drježdźany). SN

wozjewjene w: Sport
póndźela, 19 julija 2021 14:00

Maturanća wučerjow wysoko porazyli

Prěnja koparska hra mjez pedagogami a maturantami Serbskeho gymnazija Budyšin (SGB) wotmě so 1. junija 1994. Wučerjo podležachu šulerjam tehdy 2:5. Tež we 28. duelu lětsa bě młódša gene­racija z 8:1 wuspěšna.

Dźeń po wolejbulowej hrě mjez wuče­rjemi a maturantami SGB (SN wo tym rozprawjachu) slědowaše koparska hra. Bě to mjeztym 28. tajki dwubój. Dwanatkarjo běchu dotal dwaceći króć dobyli. Pjatk, 9. julija, je dalši triumf k tomu přišoł. Hodźinu do sportoweho duela so w Budyšinje dešćowaše, a tak přepołožichu koparsku partiju do sportoweje hale Serbskeho šulskeho a zetkawanskeho centruma. Tartanowa podłoha wonka bě po dešćiku ekstremnje hładka a strach zranjenja tuž jara wulki.

Po tym zo bě jědnatkar Jakub Škoda hru zahwizdał, njetraješe ani minutu, a fanowy blok dwanatkarjow prěni raz juskaše. Mócna třělwa Róžeńčana Kiliana Hrjehorja z centralneje pozicije dźěše do del­njeho kuta wučerskich wrotow. Wrotar a nawoda gymnazija René Wjacławk bě bul přepozdźe widźał.

wozjewjene w: Sport
póndźela, 19 julija 2021 14:00

Strowota bamža so polěpša

Rom (B/SN). Tydźeń po operaciji bamž Franciskus wěriwym pokazuje, kak hodźi so ćělne a dušine ćerpjenje znjesć. Tak je so 11. julija samo z 10. poschoda Gemelli-kliniki paćer Jandźelknjeza z wěriwymi modlił. Na kóncu prědowanja dźakowaše so zjawnje za wuběrne dźěło lěkarjow a dalšeho medicinskeho personala. Z cyłeho swěta dochadźeja postrowy a přeća bórzomneho wustrowjenja k swjatemu wótcej do kliniki. Na kóncu wurjadneho posedźenja Stajneje rady biskopskeje konferency minjeny tydźeń w Romje dorozumichu so zastupjerjo z Franciskusom wo dalšim postupowanju a wupřachu jemu bórzomny nawrót do Vatikana.

Njerozprawja jeno wo katolikach

wozjewjene w: Cyrkej a swět

Serbska debata

nowostki LND