Z wudaća: wutora, 20 julija 2021

Pjenjezy mužej pokradnyłoj

Biskopicy. Za swětły dźeń staj njeznataj muž a žona w Biskopicach pjenjezy kradnyłoj. Minjeny pjatk připołdnju narěče­štaj wonaj muža na puću, hač móhł jimaj pjenjezy zaměnić. Jako wón swoju móšnju wućahny, nje­znataj za njej sahnyštaj. Na to drje so Biskopičan wotsali, pozdźišo pak pytny, zo w jeho móšni 180 eurow pobrachuje. Skućićelej staj po informacijach policije wočiwidnje z wu­kraja. Nětko pytaja swědkow, kotřiž su w tymle abo podobnych padach něšto wobkedźbowali.

Před šěsć lětdźesatkami prěnju mjezynarodnu wolejbulowu hru we wokrjesu přewjedli

Před 60 lětami běchu w Budyskim wo­­krjesu prěnju mjezynarodnu hru we wolejbulu přewjedli. Prezidij Němskeho wolejbuloweho sportoweho zwjazka mytowaše wuspěšne dźěło wuwića wolejbula we wokrjesu a wuhotowa mjezynarodnu partiju 31.10.1961 w Korzymje. Budyšin njeměješe w powójnskim času žanu wotpowědnu sportownju k dispoziciji, tak zo dojědźeštej sej narodnej mu­stwje tehdyšeje Němskeje demokratiskeje republiki (NDR) a Čěskosłowakskeje socialistiskeje republiki (ČSSR) do Korzymja. W 15.30 hodź. započa so w kopatej połnej hali partija mjez němskimi wo­lejbuli­sta­mi a b-wubranku susodneho kraja.

Sportowe towarstwo Lodowy sport Běła­ Woda pyta nowych hrajerjow za sezonu 2021/2022, a to za cyłkaj U 17 a U 23. Nadrobniše informacije a přizjewjenske modality podawaja zajimowanym lodohokejistam pod telefonowym čisłom 0 35 76 / 2 17 08 75 abo e-mejlnje pod . Na lód smědźa zajimcy 24. a 25. julija. SN

Sokoł Ralbicy/Hórki –

ST Ćisk 2:2 (1:0)

Za domjacych zasadźeni: Schöne – Bejmak, T. Bejma, Wałda, Rawš, Rachel, Šołta,­ Gloxyn, B. Bejma, Janca, Domaška, Nuk, Ćěsla, Kurjat, K. Matka, M. Matka, Šiman, Korjeńk

Njedźelu tydźenja přewjedźechu ko­parjo Sokoła Ralbicy/Hórki dopołdnja wot jědna­ćich testowu partiju přećiwo klasu wyše hrajacemu cyłkej ST Ćisk. Tón je w krajnej klasy zdobom kontrahent Chróšćanskeje SJ.

Po jara dołhim času smědźachu so sportowcy zaso do ćěłozwučowarnjow wróćić. Runje za dorost blidotenisa Vikto­rije Worklecy běše to njesćerpnje wočakowany wokomik. Po jeničce dwěmaj­ treningomaj čakaše hižo prěni turněr na blidotenisowy dorost, a to spartakiada Budyskeho wokrjesa.

Na mjenowane wubědźowanje poda­chu so štyri chowancy trenarki Jadwigi Rich­tero­weje a trenarja Marcela Rjelki. W hrajnej klasy młodostnych dyrbještaj Benjamin Grutka a Florian Mikławšk připó­znać, zo su ći tamni lěpje přez nanuzowanu přestawku přišli. Jeničce Benjamin je jednu hru za sebje rozsudźić móhł. Za dalše koło pak njedosahaše.

Wuspěšnišej běštaj Jan Šnabel a Matej Kober w klasy šulerjow B. Matej wubědźi sej w swojej skupinje po wulkim boju respek­tabelne třeće městno. Jan zawěsći sej samo druhe městno a zaćahny tak do štwórćfinala. Tam je kontrahentej z mustwa TTC Połčnicy z 2:3 snadnje podležał. Hižo to běše dobry wukon. Přińdźe pak hišće lěpje. W dwójce doby­štaj Šnabel a Kober bronzowu medalju. Z prawom móžeštaj so jara wjeselić.