Z wudaća: pjatk, 23 julija 2021

1 zelenina

2 moment

3 woleny zastupnik

4 sam dźěłacy techniski aparat

5 něhdy nadoba w „dobrej stwě“

6 wódny ptak z dołhej šiju

Swojeho wjelelětneho nawodu Měrka Šmita su na Chróšćanskej zakładnej šuli „Jurij Chěžka“ na wuměnk rozžohnowali. Wot ­lěta 1992 steješe wón na čole kubłanišća a je w tym času wjace hač 500 nowačkow witał. Šulerki a šulerjo překwapichu jeho z małym programom. Za spomóžne skutkowanje dźakowachu so jemu wčera wjesnjanosta Marko Kliman (CDU), předsydka Serbskeho ­šulskeho towarstwa Katharina Jurkowa, zastupjerjo staršich a wučerjo. Foto: Feliks Haza

Ralbicy (JK/SN). Za zymsku słužbu w přichodnej zymje móže gmejna Ralbicy-Róžant nowy traktor zasadźić. Tón drje hakle w nowembrje dóstanu, ale budźe to skónčnje tajki, wo kotryž so gmejna hižo wot lěta 2014 prócuje. Na wčerawšim posedźenju delanskeje gmejnskeje rady je předsyda zarjadniskeho zwjazka Při Klóšterskej wodźe Měrko Domaška radźićelam hišće raz wuslědki přirunanja poskitkow předstajił. Zjawne wupisanje po cyłej Europje bě sej šěsć zajimcow wobhladało, ale dóšłoj staj jeničce dwaj konkretnej poskitkaj. Tomu tež dźěłowa skupina gmejnskeje rady, kotruž běchu za tónle zaměr wutworili, wotpomhać njemóžeše. Nětko pak je wšitko pod třěchu, tež hdyž maja wšelke nadrobnosće hišće zrjadować.

Stajnje wutoru móžeš sej w Budyskej Neumannec pjekarni na Cyhelskej „Naš łužiski chlěb“ kupić. Recept za njón wuwił je młody Paul Neumann we wobłuku swojeho mišterskeho wukubłanja. Za swoje pruwowanje spřihotowa wón Łužiske blido a zapřija do njeho Budyski wopon z chlěboweho ćěsta. Pšeńčnemu měšanemu chlěbej je pjekar kisałe kórki, kimjelčku, twaroh, lane symjo a lany wolij přidał. Chlěb, posypany z wowsnymi tružkami, ludźo rady kupuja, kaž pjekarnja zdźěli. Na internetnej stronje „Łužica słodźi“ je wudźěłk tohorunja zapisany. Tež serbskemu dźěłowemu kruhej měšćanskeje rady je Paul Neumann swój chlěb předstajił. Jako měšćanski ­radźićel frakcije AfD wón dźěłowemu kruhej wot lěta 2019 přisłuša. Foto: Carmen Schumann

Wojerowska měšćanska rada třeći wobydlerski etat wobzamkła

Wojerecy (AK/SN). Po lětomaj 2019 a 2020 ma město Wojerecy znowa woby­dlerski etat. Jednohłósnje je měšćanska rady na minjenym wuradźowanju prioritnu lisćinu za žro města a pjeć měšćanskich dźělow wobzamkła. Za etat dóšło bě 160 namjetow, kotrež je wodźenska skupina po katalogu kriterijow hódnoćiła. Hač do spočatka junija je cyłkownje 1 021 Wojerowčanow a Wojerowčankow wo namjetach wothłosowało, štož je jasnje mjenje hač loni, hdyž bě 2 409 ludźi wo naprawach rozsudźiło.

Dowol wobšudnistwo był

Bukecy. Při pytanju za dowolowym městnom nad Baltiskim morjom je porik z Bukec 500 eurow zhubił, dokelž ­běše wobšudnikam dowěrjał. Bukečanaj stajištaj nawěšk pola eBayja do interneta. Na to dóstaštaj wjacore poskitki – a rozsudźištaj so za wopačny, kaž so pozdźišo wukopa. Přepokazaštaj dźělnu sumu 500 eurow, na čož hižo žadyn kontakt k poskićerjam njeměještaj. Policija w tym zwisku před tajkimi pozdatnymi poskitkami warnuje. Skućićeljo tuchwilu wulki zajim za dowol w Němskej znjewužiwaja.

Budyšin. Pisane popołdnjo za serbske swójby wotměje so zajutřišim, njedźelu, w Sundowner-barje na zahrodźe Serbskeho ludoweho ansambla w Budyšinje. Započatk je w 15 hodź. Wšelakore serbskorěčne poskitki za dźěći su přihotowane, mjez druhim hry pod hołym njebjom, paslenje a překwapjenki. Zarjadowarjo, župa „Jan Arnošt Smoler“, zamołwity za Sundowner-baru Beno Brězan a partnerojo so nadźijeja, zo přińdźe prawje wjele swójbow z Budyšina a wokoliny.

Seniorojo škotuja

Chrósćicy. Přichodny škotowy turněr serbskich seniorow wotměje so wutoru, 27. julija, w 14 hodź. w Chróšćanskim Krawčikec hosćencu. Kaž organizator Měrćin Nowak zdźěli, planuja 14. septembra tradicionalny wulět škotowarjow, kiž powjedźe tónraz do Błótow. ­Zajimcy njech přizjewja so pola Alojsa Langi (tel. čo. 035792/ 50 126) abo pola Měrćina Nowaka (tel. čo. 03585/ 402 420.

Z busom do Krupki

Radwor. Na putnisku Božu mšu srjedu, 25. awgusta, w 10 hodź. w Krupce pojědźe zaso bus. Štóž chce sobu jěć, njech so w Šmitec wozydłownistwje w Radworju přizjewi (tel. čo. 035935/ 28 60).

Ze stawiznow 1221 załoženeho Budyskeho tachantstwa

Na najwyšim blaku Budyšina, 219 metrow nad mórskej hładźinu, pozběhuje so tachantska cyrkej swjateho Pětra, wot lěta 1980 konkatedrala Drježdźansko-Mišnjanskeho biskopstwa. Wot 1523 słuži wulki Boži dom dwěmaj konfesijomaj – třećinu wužiwa romsko-katolska wosada, dwě třećinje ewangelsko-lutherska. Najwjetše sakralne twarjenje Budyšina je najstarša a najwjetša simultana cyrkej Němskeje a najskerje cyłeje Europy.

Zhorjelska synagoga po zaměrnym ponowjenju znowa poswjećena

Studentka Origa Anaroni so dźiwa. Z empory slěduje wona z dalšimi komilitonami swjatočne znowawotewrjenje Zhorjelskeje synagogi. „To je wosebite posrědkowanje stawiznow. Synagoga skutkuje kaž original a awtentiska. Židowske žiwjenje móže so do Zhorjelca nawróćić“, měni młoda žona z Jerusalema połna nadźije. Wona chce so z rabinerku stać. „Studowachmy na Besht Yeshiva Torah-šuli Drježdźany“, wuswětla sobustudowacy Moshe Barnett. Zhorjelska synagoga studentow hłuboko jima. Wšako skutkuje wěrniwa a nimale nje­změnjena, kaž njeby reichskeje pogromoweje nocy 1938 ženje njebyło.

Prěni raz po wotewrjenju šulskeho twarjenja loni w septembrje su na nowej Wojerowskej Wyšej šuli prěnich absolwentow rozžohnowali. Mjez nimi su tež młodostni Produktiwneho wuknjenja (PL). Modelowy projekt je jónkrótny w regionje a zmóžnja wuknjacym po wosebitym puću z teoretiskimi a praktiskimi wobłukami šansu na hłownošulske wotzamknjenje. Z wučerjom PL Hansom Hauserom je so Silke Richter rozmołwjała.

Kajkej stej wuwučowanje a wuknjenje na nowej Wyšej šuli Wojerecy?