Z wudaća: póndźela, 26 julija 2021

Potrjechene brunicowe regiony pjenjezy dotal hišće njedóstali

Drježdźany (dpa/SN). Před nimale lětom bu wobzamknjene wudobywanje brunicy zakónčić. Za to pak mějachu so dalše projekty w potrjechenych kónčinach etablěrować. Wšako je to wulke zapřimnjenje do hospodarstwa. Přilubjene miliony pak njejsu regiony dotal hišće dóstali. Sakski minister za regionalne wuwiće Thomas Schmidt (CDU) přirunuje strukturnu změnu w brunicowych kónčinach z marathonom. „Stejimy hišće cyle na spočatku“, rjekny wón němskej powěsćerni dpa. ­Nětko dźe wo to, zo so skónčnje prěnje projekty zwoprawdźa. Kónc junija je so Swobodny stat Sakska ze Zwjazkom na konkretne naprawy dojednał, mjeztym su regionalne přewodźace wuběrki komunalne projekty pomjenowali.

Před lětom běchu wočakowanja nastupajo nowu halowu kupjel w Kamjencu wulke. Wokrjesny sejmik bě so na postupowanje dojednał. Zarjadnistwo měješe dwě warianće předplanować, zo bychu tež kóšty za tajku kupjel na blidźe leželi, w kotrejž hodźeli so wubědźowanja pod wuměnjenjemi Němskeho zwjazka płuwarjow wotměwać. Byrnjež „wubědźowanska“ warianta po tuchwilnym ličenju jenož nimale dwaj milionaj eurow dróša była hač zakładnje wotmyslena, Budyski wo­krjes za tajke předewzaće prosće trěbne pjenjezy nima. Nětko je rěč wo tym, za tajku kupjel w Kamjencu, samo z wonkownym a nutřkownym wobłukom, spěchowanje ze srědkow strukturneje změny dóstać móc, hdyž Lessingowe město nošerstwo projekta přewozmje. Tak powabny kaž tónle wupuć k trěbnemu spěchowanju tež je, wostanje wón jenož druhe najlěpše rozrisanje. Wšako je ćežko, za nje we wot kónca jamow a milinarnjow direktnje potrjechenych kónčinach zrozumjenje nańć. Axel Arlt

London (dpa/SN). Młodźi dorosćeni su wot najnowšeje žołmy infekcijow z koronawirusom w Jendźelskej najbóle potrjecheni, kaž z ličbow strowotniskeho zarjada wuchadźa. Po tym wučinješe ličba nowych infekcijow na 100 000 ludźi w běhu tydźenja w tej starobnej skupinje nimale 1 155, najwjetša to zwěsćena ličba po wudyrjenju pandemije. Incidenca we Wulkej Britaniskej je tuchwilu 488.

Palma/Ibiza (dpa/SN). Nawodnica jednoho z wulkich hotelow na kupje Ibiza Alicia Reina liči z ćežkimi časami za turistisku branšu, dokelž je Němska Španisku jako kónčinu wysokeje incidency zastopnjowała. „By-li so to stało, njeby to žana dobra powěsć była“, rjekny minjeny tydźeń hišće prezidentka zwjazka hotelowych direktorow na Balearach powěsćerni dpa. Turizm nadźija so dale wuspěšneje kampanje šćěpjenja. „Daty so nadźijomnje bórze polěpša. Wšako Španiska z wotmachom na tym dźěła trěbne naprawy zwoprawdźić, zo bychu ličby infekcijow zaso woteběrali. „Dyrbimy nawuknyć, z wirusom žiwi być a při tym stajnje połoženje w chorownjach a tam na intensiwnych stacijach wobkedźbować.“

Z „hotowej katastrofu“ liči němska spěwarka Isabel Buder-Gülck, kotraž na kupje Mallorca jako Isi Glück na jewišću při partyjowej mili „Ballermann“ wu­stupuje. „Běchmy po dobrym puću, ale nětko drje mnozy zaso storněruja“, rjekny wona dpa. „To je hruby dyr hotelownikam a hosćencarjam, kotřiž poprawom ničo za to njemóža.“

Poprawom chcyše so jednotka za katastrofowy škit z južneje Braniborskeje wokoło Sörena Pielenza na zapad Němskeje nastajić, zo by tam potrjechenym wulkich zapławjenjow pomhała. Tola pjatk popołdnju bu zasadźenje wosrjedź přihotow najprjedy raz wotprajene. Zamołwići wužiwachu je tuž jako zwučowanje, zo bychu w nuznym padźe spěšnje zasadźenjakmani byli. Přiwšěm woni dale z toho wuchadźeja, zo budźe pomoc w potrjechenych kónčinach hišće trěbna. Planowane bě, zo so něhdźe 100 žonow a muži katastrofoweho škita ze 27 jězdźidłami na puć do za­pada poda. Foto: Michael Helbig

Dźensniša stacija lětušeje bičwolejbuloweje tury Radija Satkula, kotraž je wobdźělnikam kaž tež přihladowarjam wulki magnet, je dźensa we Worklecach. Zašły tydźeń (hlej wobraz) zličichu w Kulowskej lěsnej kupjeli dwaceći mustwow a něhdźe dwěsćě mło­dostnych. Cyłki zetkaja so wječor napoł šesćich, wot šesćich so potom wubědźuja. Dalše terminy: 02.08. Radwor / 09.08. ­Róžant / 16.08. Konjecy / 23.08. Budyšin / 30.08. Miłoćicy Foto: Konstantin Hrjehor

Kubšicy (CS/SN). Wobydlerjo wjacorych wjesnych dźělow Kubšiskeje gmejny běchu tele dny na posedźenje gmejnskeje rady přišli, zo bychu swoje njezrozumjenje wo planach krajneje direkcije zwuraznili. Při tym dźe wo přihoty elektrifikacije železniskeje čary Drježdźany– Zhorjelc. Konkretnje postorkuja so wobydlerjo na planach, za trěbnu milinu nowy 110 kilovoltow sylny milinowód pod hołym njebjom wjesć, při čimž stej sewjerna a južna warianta namjetowanej. Wobydlerjo pak wobě wotpokazuja, dokelž ma milinowód zdźěla nad wobydlenej kónčinu respektiwnje nad přirodoškitnym pasmom wjesć. Tež přemysłownicy so taj­kemu milinowodej wobaraja, dokelž potom hižo wěste dźěła wukonjeć nje­smědźa.

Wopytowarjo Baćońskeje cyrkwje Jězusoweje wutroby dožiwichu njedawno njewšědny wječor. Na wšěch 80 zajimcow ze wsy a wokoliny kaž tež z Budyšina, Drježdźan a Pirny, je pišćelowy koncert z Klausom-Dieterom Untchom přiwabił. Organist a pedagoga ze Sedmihródskeje w Rumunskej bě na přeprošenje wosadneho fararja Gerata Wornarja přijěł. Na Baćońskich pišćelach hrać bě nazhonitemu cyrkwinskemu hudźbnikej wužadanje, wšako dyrbja je nuznje wobnowić. Hósć hudźeše bjez honorara, koncert měješe beneficny raz. Tak chcedźa wšitke darjene pjenjezy za wobnowjenje pišćelow wužiwać.

Klaus-Dieter Untch bě hižo před dźesać lětami w Baćońskej cyrkwi na swójbnym swjedźenju na pišćelach hudźił. Tak zahaji wón swój nětčiši koncert w spomnjeću na prěnje zetkanje ze Serbami z improwizaciju na serbski kěrluš po słowach a hłosu Michała Wałdy „Knježe, tu smy zhromadźeni“. Druhi barokny kruch „Ciacona“ komponista Josephusa Fazakasa Krisbaciensisa wjedźeše připosłucharjow do sedmihródskeje domizny hudźbnika.

Milina muža moriła

Běła Woda. Mjeztym zo je so w druhich hornjołužiskich regionach wčera wječor měrnje dešćowało, je wokoło Běłeje Wody njewjedro zachadźało. Tak naměrichu w Trjebinje 43 litrow dešća na kwadratny meter. W Běłej Wodźe samej běchu wohnjowi wobornicy 30 króć zasadźeni. Zwjetša dyrbjachu z pincow wodu klumpać. Tež jedne zahrodnišćo bě přepławjene. Muž chcyše tam swój bungalow před wodu škitać, při čimž pak je wón milinowy dyr poćerpjeł. Najebać lěkarsku pomoc wón na městnje njezboža wudycha.

Hudźbnej cyłkaj před kulisu stareho města wjele ludźi zabawjałoj

Budyšin (SN/MWj). Lětnja bara Sundowner na wobydlerskej zahrodźe Serbskeho ludoweho ansambla w Budyšinje je minjeny pjatk wjele wopytowarjam njewšědnje rjany wječor wobradźiła. Organizator Beno Brězan bě sej spěwnu škupinu PoŠtyrjoch a dujersku kapału Tutn & Blasn přeprosył. A tale kombinacija postara so wo wulkotnu zabawu, kotraž hosćom z Radworja, Lejna, Zejic a z mnohich dalšich kónčin drje dołho w pomjatku wostanje.

Hnydom prěni spěw skupiny PoŠtyrjoch z Marekom Rjelku, Benom Hojerom a Rjedźic bratromaj Janom a Kry­stofom bě mały hit. Na melodiju „Adeste, fideles“ zanjesechu woni mjenujcy móhłrjec sławu na Sundowner. W dwěmaj dźělomaj zaklinča na to wjele pěsnjow, kotrež publikum zwjetša hižo ze zašłych wustupow spěwneho kwarteta znaješe. Někotre dalše pak tón abo tamny připosłuchar dotal hišće słyšał njebě. Tak běchu spěwne runje tak kaž moderaciske poskićenja skupiny přewšo zabawneho razu.