Z wudaća: štwórtk, 29 julija 2021

Do abo po nakupje so šćěpić dać

Budyšin/Wojerecy/Zhorjelc. W Budyskim centeru na Žitnych wikach móža so ludźo přichodnu wutoru a wutoru pozdźišo pře koronu šćěpić dać, we Wojerowskim Łužiskim centeru přichodnej dwaj štwórtkaj. Dohromady sydom nowych infekcijow je Budyski wokrjes zwěsćił, incidenca postupi tu po podaću RKI na 5,3. W Zhorjelskim wokrjesu wučinja incidenca dale 1,6.

Podpěruja wopory zapławjenjow

Kamjenc. Z dohromady 20 000 eurami chcetej město Kamjenc a jeho bydlenska towaršnosć SWG wopory wulkeje wody podpěrać. Pjenjezy chcedźa z měšćan­skeho kaž tež z etata SWG wzać. Za to su so měšćanscy radźićeljo a jednaćelstwo SWG wuprajili, kaž Lessingowe město informuje. Po naprašowanju SN města Budyšin, Wojerecy, Biskopicy a Běła Woda ničo podobne njeplanuja.

Spěšnoćahowa trasa njewěsta

Lětuše žne žita serbskich burow dotal njespokojeja

Zarěč/Koćina/Róžant (SN/JaW). Wunoški lětušich žitnych žnjow, rěpika a hrocha ratarjow w Hornjej Łužicy zdźěla njespo­kojeja. To wobkrućichu na naprašowanje našeho wječornika ratarjo ze Zarěča, Koćiny a Róžanta. Lětušeho trochu włóžnišeho wjedra dla dźě běchu sej wjac wočakowali.

Budyšin (SN/bn). Ze zazběhom lětnich prózdnin započa so dohromady 22 młodostnych z Budyšina a Jelenjeje Góry w starobje 14 do 18 lět pod nawodom cyłkownje pjeć fachowcow na prezentaciju „Muzyka sceniczna – Sceniska hudźba“ přihotować. Sobotu a njedźelu chcedźa produkciju w 19 resp. 15 hodź. na jewišću Budyskeho Kamjentneho domu předstajić. Prezentacija je zhromadny projekt towarstwa Kamjentny dom a Ludoweho nakładnistwa Domowina, spěchowany wot europskeho kooperaciskeho programa Interreg Pólska-Sakska.

Budyšin (SN/CoR). K aktualnej wosebitej wustajeńcy Muzeja Budyšin je němskorěčny katalog „Do swěta sunjene. Nowe twórby Almut-Sophije Zielonka. Molerstwo. Grafika. Skulptura“ jako pjaty zwjazk rjadu „KunstWerk“ wušoł. W nim předstaji Drježdźanska wuměłstwowa histo­rikarka dr. Jördis Lademann reprodukcije wšitkich w přehladce pokazanych twórbow z tekstom. Składnostnje 55. narodnin Almut-Sophije Zielonka zarjadowana wustajeńca je hač do 15. awgusta přistupna. Katalog płaći 15 eurow.

Tokio (kh/SN). Němscy dresurowi jěcharjo su dale klasa­ za sebje. Dźeń po dobyću złoteje medalje z mustwom stej so Jessica von Bredow-Werndl a Isa­bell Werth we wubědźowanju jednotliwčow wo dalšu hwězdnu hodźinu na olym­piadźe postarałoj. Bredow-Werndl doby swoju druhu złotu medalju na lětušich hrach před krajanku Werth. Třeća a tak na bronzowym městnje bě Char­lotte Dujar­din z Wulkeje Britaniskeje.

Prěnju němsku medalju w sportowej družinje judo zawěsći sej Eduard Trippel. Wón je drje finale přěhrał, ale so nad slěbrom­ njesměrnje wjeselił. Lasha Bekauri z Georgiskeje bě dobyćer. W rjedźe medaljow faluje na pjatym wubě­dźo­wanskim dnju jenož hišće bronzowa za Němsku. Wo nju postaraštaj so Patrick Hausding a Lars Rüdiger w synchronowym skakanju z třimeterskeje wěže. Za nošerja chorhoje Hausdinga běše to mjeztym třeća olympiska medalja. Tež płuwarka Sarah Köhler zahori z bronzu na 1 500 metrow w swobodnym stilu. Tak je Němskej prěnju olympisku medal­ju po 13 lětach zaručiła.

Budyšin (SN). We wuchodnej Sakskej je w juliju 17 620 bjezdźěłnych, 316 resp. 1,8 procentow mjenje hač w juniju. Kwota bjezdźěłnosće je na 6,4 procenty spadnyła. Přiwšěm je kwota wyša hač do koronapandemije. W juliju 2019 wučinješe wona 6,0 procentow, kaž Budyska wotnožka Zwjazkoweje agentury za dźěło dźensa informuje.

„Powólnjenje  koronaprawidłow a přiběraca potrjeba dźěłowych mocow stej k tomu wjedłoj, zo je bjezdźěłnosć w ju­liju dale woteběrała. Štóž bě hižo do započatka koronapandemije bjezdźěłny abo jenož mało kwalifikowany, tomu je tež­ dale ćežko so na dźěłowe wiki dóstać. Prěnjorjadnje pytaja fachowcow. Toho­dla su kwalifikacije, kotrež wjedu k wotzamknjenju powołanja, wosebje wažne, zo bychu nowe dźěłowe šansy nastali“, piše předsydka jednaćelstwa Bu­dyskeje agentury Kathrin Groschwald.

W juliju je serwis za dźěłodawarjow 1 024 nowych městnow, dwěsćě (plus 24,3 procenty) wjace hač w juliju 2020 kaž tež 90 dźěłowych městnow wjace (plus 9,6 procentow) hač w juliju 2019 aktiwěrował.

Lipsk (dpa/SN). Lipšćanske myto za swobodu medijow spožča lětsa běłoruskimaj telewizijnymaj žurnalistkomaj Katerinje Bachwalowej (27) und Dariji Čulcowej (24). Wobě žonje stej tuchwilu w swojej domiznje zajatej, kaž zdźěli dźensa Medijowa załožba lutowarnje Lipsk. Žurnalistce dźěłatej za sćelak Belsat TV, kotryž z Pólskeje wusyła. Bachwalowu a kameražonu Čulcowu počesća za to, zo dyrbitej nětko za swoje swobodne rozprawnistwo w awtokratiskim systemje pod represijemi režima ćerpjeć.

Přewostaja ekordnu sumu

Berlin (dpa/SN). Zwjazk přewostaja pjenjezy w rekordnym wobjimje za klimje tyjace saněrowanje twarjenjow. W prěnim połlěće su po informacijach hospodarskeho ministerstwa wjace hač 2,7 miliardow eurow spěchowanskich pjenjez přizwolili. 610 milionow eurow z toho su lětsa hač do kónca junija hižo wupłaćili, to je wjace hač loni.

Změrowanje po protestach

Ludźo w japanskej stolicy Tokiju wužiwaja na hasach škitny nahubnik, zo bychu so před znowa sylnje rozpřestrěwacym so ­koronawirusom škitali. Předwčerawšim su tamniši zamołwići wo najwjetšej ličbje nowonatyknjenjow w běhu jednoho dnja rozprawjeli. To bě jenož něšto dnjow po zahajenju olympiskich hrow. Foto: pa/AP/Koji Sasahara

Dźewjeć awtodróhowych wotpočnišćow w New Jerseyju chcedźa po swětoznatych wuměłcach pomjenować. Wone maja potom mjez druhim James Gandolfini, Whitney Houston, Jon Bon Jovi abo Frank Sinatra rěkać. Z mjeńšimi wustajeńcami chcedźa tam na žiwjenje a tworjenje „starow“ skedźbnjeć. Z akciju hódnoća wusahowacy talent z New Jerseyja pochadźacych wuměłcow, kaž guwerner Phil Murphy zdźěli. Spěwar Bruce Springsteen tajke počesćenje wotpokazuje.

Dokelž je wažnu zdźělenku w ćahu přesłyšał, je 49lětny muž po puću z Hamburga do schleswigsko-holsteinskeho Neumünstera wulězć skomdźił. Hakle jako ćah na wotstajenskich kolijach stejo wosta, jemu to napadny. Dokelž njeje sej sam won zwěrił, zawoła policiju, kotraž jeho skónčnje „wěsće z ćaha přewodźeše“.

Praha (dpa/SN). W susodnej Čěskej planuja pře koronu šćěpjenych wosebje mytować. Wšitkim přistajenym stata, kotřiž su injekciju dóstali, chcedźa přidatnej zapłaćenej dnjej dowola dać. To je ministerski prezident Andrej Babiš na Twitteru připowědźił. „Je dźě wěrno, zo su někotři šćěpjeni sylnišu reakciju po injekciji měli“, přizna załožer populistiskeje strony ANO.

Knježerstwo w Praze chce hišće wjace ludźi motiwować, zo bychu so šćěpić ­dali, 66lětny multimiliardar Babiš doda. W Čěskej ze swojimi přibližnje 10,7 milionami wobydlerjow płaći dotal 4,6 milionow ludźi jako dospołnje šćěpjenych. Kabinet ma hižo jutře, pjatk, wo naležnosći rozsudźić.

Pozadk akcije móhli wólby čěskeho parlamenta w septembrje być.