„Wjele zda so njemóžne ...“, spěwaše Józef Brězan na serbskej pop-operje, kotraž měješe zašły pjatk swoju premjeru w Chróšćanskej „Jednoće“. Tak pesimistiske, kaž tele linki na prěni pohlad tež klinča – pohladam-li do Serbow –, sym přeco zaso zadźiwany, što wšitko je pola nas móžno! A to nic jenož na polu sporta, mnohe wěcy samo paralelnje. Chróšćan Józef Donat na přikład je wčera tohorunja na pop-operje wustupił. Do toho pak je hišće za SJ Chrósćicy II přećiwo Wojerecam kopački šnórował a tam, kaž so za nadběhowarja słuša, tež wrota třělił. Chróšćenjo dobychu hru ze 4:0. Palc horje!
Koparsku sezonu njejsu jenož profijojo zahajili, ale nětko tež amaterojo. Napjate prašenje do hrajneje doby stajnje rěka, štó je mustwo wopušćił a štó so přidružił. Jurij Bjeńš podawa tule mały přehlad hladajo na naše serbske koparske mustwa.
Sportowa jednotka Njebjelčicy njeje dotal žanoho noweho koparja witała. William Plaettner pak je mustwo wopušćił a do Němskich Pazlic šoł.
Prěnje mustwo Chróšćanskeje SJ so wjeseli, zo je so Michał Młynk zaso wróćił. Wón hraješe naposledk w Rakecach. Tež trójka z Biskopic je so Chróšćanam přizamknyła. Franciskus Wornar a Ludwig Wiedemann z młodźiny A a Alwin Mützner z druheho mustwa. Ze swójskeje młodźiny A dóstanjetaj Florian Kreuz a Paul Krawc šansu, so do teama muži zarjadować. Clemens Handrik je so z Radworja nawróćił, hraje pak najprjedy raz pola młodźiny A.
Vatikan (B/SN). Nazymu zahaji so swětowa synoda katolskeje cyrkwje, we wobłuku kotrejež maja biskopja a lajkojo dwě lěće wuradźować. Za to su minjeny tydźeń na nowinarskej konferency přihotowanski dokument čłonam synody přepodali, zwurazni nawoda vatikanskeho sekretariata synody kurijowy kardinal Mario Grech. W oktobrje so wuradźowanja synodalneje zhromadźizny oficialnje zahaja, potom klětu w lěću bu- dźe druha kontinentalna faza. Zakónčaca synodalna zhromadźizna biskopow a lajkow ma so w oktobrje 2023 wotměć. Na synodalnym procesu chcedźa po cyłym swěće samozrozumjenje katolskeje cyrkwje sylnić a regionalnje kaž tež mjezy- narodnje wažne temy přichoda zdźěłać.
Rozprawa swětoweje cyrkwje