Z wudaća: srjeda, 22 septembera 2021

Zaso smjertny pad

Budyšin. W Budyskim wokrjesu rozprawjachu wčera wo 15 natyknjenjach z koronawirusom a wo jednym smjertnym padźe. Wot 229 schorjenych lěkuja sydom w chorowni. Incidenca tu po RKI je dźensa ze 40,9 třeći dźeń za sobu wyša hač 35. Za Zhorjelski wokrjes podawa RKI incidencu 20,4. Tež tam informowachu wčera wo 15 nowoinfekcijach.

Dźeń wotewrjenych duri njebudźe

Budyšin. Němsko-Serbske ludowe dźiwadło je lětuši dźeń wotewrjenych duri wotprajiło. Kaž w nowinskej zdźělence domu rěka, „tuchwilne połoženje tajke zarjadowanje njedowola. Wěstotne wotstawki njehodźa so za jewišćom, w magacinach a na chódbach dodźeržeć. Ćežkeje wutroby smy so tuž rozsudźili 3. oktobra planowane zarjadowanje wupadnyć dać.“

Doba zapodaća so kónči

Sakski nutřkowny minister Roland Wöller je w přitomnosći zapósłanca Marka Šimana (wobaj CDU, 1. a 2. wotprawa) dźensa Budyskej wobchadnej straži mobilnu jězbnu šulu za dźěći přepodał. Z tajkej móža sobudźěłaćerki a sobudźěłaćerjo straže dźěćom w pěstowarnjach a zakładnych šulach zadźerženje we wobchadźe hišće lěpje zbližić a praktiske wukubłanje jězdźenja z kolesom přewjesć. Na to so hižo dźěći Budyskeje pěstowarnje „Sebastian Kneipp“ wjesela. Foto: SN/Božena Šimanec

Dobrošecy (SN/BŠe). Dowolnicy w Sakskej su njedawno swoje najwoblubowaniše přebywanišća wuzwolili. W kategoriji prózdninske bydlenje dóstanje tež hornjołužiski hosćićel titul „Lubušk hosći“. Woblubowane bydlenje je w Dobrošecach (Doberschütz) pola Malešec hnydom na kromje biosferoweho rezerwata Hornjołužiska hola a haty. Na wulkim třistronskim statoku su dwě separatnej bydleni a dowolowy domčk zarjadowane. Z hódnoćenjom 99 wot 100 móžnych dypkow zdoby sej Dobroščanski statok najlěpši wuslědk nominowanych, kaž Marketingowa towaršnosć Hornja Łužica-Delnja Šleska informuje. Tak njeje jenož najlěpše prózdninske bydlenje tudyšeje kónčiny, ale cyłeje Sakskeje.

Mějićelej statoka Heike Schulz a Jens Richter staj jara zbožownaj: „W juliju 2018 smój podpěru spěchowanskeho programa Leader přebywanišćo z cyłkownje šěsć łožemi wotewrěłoj. Wulke naprašowanje naju zmuži poskitk rozšěrić, a smój hač do lětušeje meje dalše přenocowanske móžnosće wutworiłoj. Titul je namaj wulki dźak hosći, ale tež pohon, dale z dobrym hosćićelom być.“

Serbski čitanski rjad Radija Zett samo skeptikarjow přeswědča

Žitawa (SN/CoR). Wothłós na prěnjej ­wusyłani we wobłuku Serbskeho čitanskeho rjadu Žitawskeho internetneho rozhłosa Radio Zett bě přewšo dobry a je programoweho koordinatora Andreasa Herrmanna tróšku překwapił: „Samo tu w swójskich rjadach bě wothłós dobry, byrnjež spočatnje dwělowali, hač so ideja serbskeho čitanja wudani. Skepsa bě wulka, dokelž ma w našej Žitawskej kónčinje lědma něchtó něšto ze Serbami činić.“

Hromadźe z iniciatorom, režiserom a moderatorom rjadu Benediktom Dyrlichom staraše so Andreas Herrmann wo zwoprawdźenje. „Sym woprawdźe zahorjeny. Prěnje wusyłanje su sej ludźo 60 króć jako podcast naposkali – to je šwarna ličba za tajke małe radijo kaž nas. Samo ze Serbiskeje a Słowakskeje – z Čěskeje tak a tak – su zajimcy byli. A nětko je Radio Zett dźakowano Serbam samo hač do Serbiskeje znate“, so Herrmann wjeseli.

Budyšin (dpa/SN). Swoje wólbne plakaty „Hängt die Grünen“ dyrbi prawicarska strona Třeći puć wotstronić. To je Sakske wyše zarjadniske sudnistwo w Budyšinje (OVG) wčera w chwatnym jednanju rozsudźiło a tak wukaz města Zwickauwa přećiwo plakatam wobkrućiło.

Plakaty wohroža zjawnu wěstotu, kaž OVG wopodstatni. Strony drje smědźa kritiku tež w polemiskej formje zwuraznić, dokelž škita Zakładny zakoń swobodu měnjenja. Hranica pak je překročena, jedna-li so wo móžny chłostajomny delikt. Motiw plakata wotpowěduje „objektiwnym faktam našćuwanja ludu“ a so za to hodźi, zjawny měr přez hidypołne ­našćuwanje kaž tež přez nadpad na čłowjesku dostojnosć sobustawow Zelenych mylić, kaž ze stron sudnistwa rěka.

Za njedźelne wólby zwjazkoweho sejma we łužiskich městach dźeń a wjace wólbokmanych listowe wólby preferuje. To je naprašowanje našeho wječornika w Běłej Wodźe, Budyšinje, Kamjencu a we Wojerecach wunjesło.

Budyšin (SN/at). Něhdźe štwórćina wólbokmanych w Běłej Wodźe je sej dotal podłožki za listowe wólby wuprosyła, zdźěli Wulf Stiebenz, nowinski rěčnik měšćanskeho zarjadnistwa. Předwčera­wšim bě jich 2 950. „Při zańdźenych wólbach mějachmy jenož wosom do dźewjeć procentow listowych wolerjow.“

Choćebuz (SN). „Spreewaldbahnen – Geschichten aus einer Zeit, in der der Spreewald Anschluss an die Welt bekam“ rěka nowa kniha Petera Beckera, kotraž je nětko w nakładnistwje Regia wušła. Na 220 stronach wěnuje so awtor kolijowemu wobchadej w Błótach wot lěta 1898 hač do 1970. Wažnišo hač techniske detaile bě Beckerej wliw železnicy na hospodarske wuwiće regiona a kotre slědy je wona we wutrobach a pomjatku Błótowčanow zawostajiła. Kniha, mjeztym hižo jědnata z pjera Beckera, budźe mjez druhim w Budyskej Smolerjec kniharni na předań, hodźi pak so tež online skazać.

Berlin (dpa/SN). Zwjazkowy minister za strowotnistwo Jens Spahn (CDU) planowany kónc wupłaćenja mzdy za nješćěpjenych w karantenje zakituje. „Tu njeń­dźe wo ćišć, ale wo fairnosć šćěpjenym napřećo“, rjekny Spahn dźensa w rańšim magacinje ZDF. Strowotniscy ministrojo Zwjazka a zwjazkowych krajow chcychu dźensa wo jednotnym postupowanju wuradźować. Pječa ma nowe rjadowanje wot 11. oktobra płaćić.

Pruwuja aktiwity skućićela

Idar-Oberstein (dpa/SN). Po smjertnym wutřělu na sobudźěłaćerja tankownje w zwadźe wužiwanja nahubnika w Idar-Obersteinje dla pruwuje policija aktiwity třělca w socialnych medijach. Wotpowědne pokiwy su dóšli, rěčnik policajskeho prezidija potwjerdźi. 49lětny bě minjenu sobotu 20lětnemu předawarjej do hłowy třělił a jeho morił. Po zajeću wón rjekny, zo naprawy koronawirusa dla wotpokazuje. Pječa je w interneće wospjet z namócnymi fantazijemi napadnył

Talibanojo chcedźa k UNO

Třeći dźeń za sobu su w awstralskej metropoli Melbournje přećiwo winowatostnemu šćěpjenju sobudźěłaćerjow twarskeje branše pře koronawirus protestowali. Policija demonstrantow wobstupi a wjacorych zaja. Sobudźěłaćerjo twarskich ­zawodow maja hač do 5. oktobra chwile so šćěpić dać. Tak dołho wostanu zawody zawrjene. Foto: pa/Sydney Low

Negatiwny test korony na pozitiwny změnił je muž we Vietnamje a dyrbi nětko pokutu 280 eurow zapłaćić. Zaměr njewšědneje akcije 41lětneho bě, zo njechaše so jemu dźěłać. Přistajeny telekomunikaciskeje firmy bě so testować dał a je wuslědk změnił. Manipulowany certifikat pósła dźěłodawarjej a přiwuznym. Jako strowotniski zarjad wo tym zhoni, pósła sobudźěłaćerja k mužej na dalši test. Při tym so jebanstwo wukopa.

Erich Honecker kandiduje k wólbam zwjazkoweho sejma, znajmjeńša w Lipsku. Na jednym ze sćežorow wisa wobraz 1994 zemrěteho bywšeho předsydy statneje rady NDR a generalneho sekretara centralneho komiteja SED. Po słowach měšćanskeho zarjadnistwa pak „Honni“ tam ničo pytać nima, po wustawkach města njeje plakat na sćežoru dowoleny a ma so zaso wotstronić. Hdy, pak njebu postajene.