Z wudaća: pjatk, 08 oktobera 2021

Fota: Feliks HazaBur Ronny ma starosće, kak kulki domoj dóstanje. Tuž je do Wotrowskeje pěstowarnje zazwonił a na běrnyzběranje přeprosył. My dźěći rady pomhamy a tuž na polo chwatamy. Na wozyčk smy sej nakładli łónco měškow a kobjelki. Dale hišće trjebamy napoje a k jědźi tójšto zeleniny. Huj, wětřik wokoło wuši nam wěje, ale běhamy spěšnje, a to nas hrěje. Po puću spěw sej spěwamy a po šćežkach so honimy. Nó hladaj, tam su Kanecy, hdźež Ronny čaka njesćerpny. Traktor hižo tukota, a do pódy, hdźež neple drěmaja, zaryje so moderna motyka. Na městno, hotowe a start! Tule běrna, kulka abo nepl, jedyn wulki kaž melona, druhi małki kaž pepl. Wšitke my je zběramy a do kobjelki kładźemy. Juhu! Na kóncu smy! Tam něchtó woła: „Snědamy!“ Bur Ronny nima hižo žane starosće a ma swoje neple zrum’wane. My běžimy do Wotrowa, hdźež na nas čaka běrnjaca poliwka. Milenka Rječcyna

Foće: Bernadett LanzynaWorklečanscy hor­towi šulerjo su njedawno wulke wjeselo měli. Wšitcy běchu mjenujcy do spor­toweje hale přeprošeni. Ze za­stup­nym lisćikom w for­mje kołka smědźachu dźěći zastupić, zo móhli sej kreatiwne cir­kusowe předstajenje wobhladać. Pod na­wodom 4. lětnika běchu swójski program z klaw­nom, kuzłarjom a rejowarkami zestajeli. Samo lawy běchu sej na jewišćo skuzłali. Wutrobny dźak kreatiwnym hłójčkam za poradźene předstajenje. Kubłarki Worklečanskeho horta „K wódnemu mužej“

Foto: Sophia Budarjec

Lube dźěći, što činiće wy w nocy w jednej? Zawěsće kruće ­spin­­kaće, abo? Knjez Maik Šołta so w tym času z ćopłeho borleška drapa a so do dźěła da – do słódneho dźěła. Róžeń­čan je mje­nujcy pjekar! Z chlěbom wón rano najprjedy zapo­čina, tak zo maće stajnje čerstwe pomazki. Po tym slěduja całty, pampuchi, małe pječwa, tykancy a poprjancy.

Jeli cyle dokładnje hladaće, widźiće, dokal je sej Lotka dźensa zalězła. Sedźi we wulkim, z muku pjelnjenym sudobju. A nětko mam hišće pjekarske hódančko za was. Trochujće raz!

1. Kelko muki knjez Šołta na dźeń pře­trjebuje?

• něhdźe 100 kilo-

gramow

• něhdźe 150 kilo-

gramow abo

• něhdźe 200 kilogramow

2. Knjez Šołta wužiwa za swoje słódne tykancy wšědnje ...

• 7 kilogramow butry

• 12 kilogramow butry abo

• 20 kilogramow butry.

3. A kelko cokora wón wob dźeń za pječenje trjeba?

• 7 do 10 kilo-­ gramow

• 15 do 20 kilo- gramow abo

• 25 do 30 kilo- gramow