Incidenca přiběraca
Budyšin. Dale přiběrała je incidenca w hornjołužiskimaj wokrjesomaj. Roberta Kochowy institut je dźensa za Budyski wokrjes 115,4 a za Zhorjelski 117,7 podał. Minjeny pjatk su we wokrjesu Budyšin wo 33 a we wokrjesu Zhorjelc wo 43 natyknjenjach z koronawirusom rozprawjeli. Wo kónctydźenskich ličbach strowotniskej zarjadej dźensa informujetej.
Lyrika zhudźbnjena
Lipsk/Drježdźany. Loni stej Róža Domašcyna a Axel Helbig antologiju sakskeje lyriki „Weltbetrachter“ wudałoj. Sakska literarna rada je zhromadnje z towarstwom MusikProjektSachsen komponistow přeprosyła někotre basnje ze zběrki zhudźbnić. Mjez druhim je baseń Lenki (Christiany Piniekoweje) komponist Christian FP Kram zhudźbnił. Pod hesłom „Falls die Winde uns günstig sind“ předstaja projekt 5. a 6. nowembra w Lipsku a Drježdźanach.
Dźiwjencow krućišo chłostać
Budyšin (SN/JaW). Z rukow předsydy Domowiny Dawida Statnika je minjeny pjatk w Budyšinje jědnaće Serbow Myto Domowiny, Myto Domowiny za dorost a Čestne znamješko Domowiny 2021 přijimało.
Lawreataj myta třěšneho zwjazka Beno Budar z Hornjeho Hajnka a znamješka Domowiny Günter Zeleńk z Janšojc (Jänschwalde) njemóžeštaj počesćenje chorosće dla přijimać. Spisowaćel a publicist Budar dósta Myto Domowiny za swój žiwjenski skutk. Wón je „sam čas žiwjenja pisał – za wšitke generacije“, rěka we wobkrućenju počesćenja. „Maćeršćina našich dźěći, přichod našeje rěče jemu na wutrobje ležeše a leži“, wuzběhny lawdatorka Zala Cyžowa. Günterej Zeleńkej spožčichu Čestne znamješko Domowiny za zasłužby jako čłon Janšojskeje Domowinskeje skupiny. „Wot 1969 bě wón 44 lět jeje předsyda. W swojim najlěpšim času rozrosće ličba čłonow skupiny na 297“, wuzběhny Heike Apeltowa. Woběmaj zastupnik třěšneho zwjazka myto domoj dowjeze a přepoda.
Choćebuz (SN/bn). Choćebuski filmowy festiwal (CFF), organizowany wot agentury Pool Productions, wuhotuja lětsa jako tak mjenowane hybridne zarjadowanje. Wot 2. do 7. nowembra pokazaja dohromady něhdźe 170 lokalnych, regionalnych a mjezynarodnych filmow na cyłkownje sydom hrajnišćach. Hač do 16. nowembra poskića nimo toho „digitalne kino“. Na zakładźe lońšich nazhonjenjow, jako pandemija festiwal z publikumom njedowoleše, chcedźa streamy we wjacorych formatach a zdźěla live internetnje prezentować.
Radšo zarjadowanje přestorčić a pozdźišo přewjesć, hač je cyle wupadnyć dać. To prajištej sej Serbske ewangelske towarstwo a hosćićelska Rakečanska Bjesada a přeprosyštej sobotu na lětušu dźěłarničku.
Rakecy (GH/SN). Na swoju dźěłarničku je Serbske ewangelske towarstwo serbske Bjesady sobotu do Rakec přeprosyło. Tele zarjadowanje ewangelskich Bjesadow wotměwaja prawidłownje jónu wob lěto, zwjetša hižo w prěnim kwartalu. Koronapandemije dla pak stej towarstwo a Rakečanska Bjesada jako hosćićelka lětsa nowy, njezwučeny nazymski termin woliłoj. A tež na wonym terminje płaćeše, zo su hosćo šćěpjeni, wustrowjeni abo testowani. Najebać to je něhdźe 20 wobdźělnicow a wobdźělnikow z Bukec, Hodźija, Budyšina a Rakec do tamnišeje farskeje bróžnje přichwatało.
Přijomne słónčne wjedro bohudźak dowoli, zo njetrjebachu Bjesadnicy cyły čas nutřka wostać. Tak wotmě so zarjadowanje zdźěla wonka pod hołym njebjom.
Berlin (dpa/SN). Nawodnistwo CDU ze swojim šefom Arminom Laschetom je dźensa w Berlinje wo konsekwencach wólbneje poražki wuradźowało. Sakski minister prezident Michael Kretschmer (CDU) žadaše sej do zahajenja posedźenja, hišće lětsa stronski zjězd přewjesć, hdźež njeměło jenož wo zastojnstwo šefa hić, ale wo cyłozwjazkowe nawodnistwo. „Njetrjebamy jeno předsydu, ale cyły team, kotryž nadawki z wjeselom wukonja“, wón wuzběhny. Na tym měła so tež baza strony wobdźělić.
Liči hišće lětsa z koaliciju
Berlin (dpa/SN). Wicešef SPD Kevin Kühnert liči hišće lětsa z koaliciju SPD, Zelenych a FDP. „Z toho kruće wuchadźam“, rjekny wón dźensa rano sćelakej ARD. „Rozmołwy su so derje a dowěrliwje započeli. Wotnutřka ničo njesłyšiš, štož je dobry zakład.“ Po jeho słowach je etatowa a financna politika najwjetše wužadanje rozmołwow, hdźež měli so zastupjerjo na kompromisy dojednać.
Zwjazk žada sej přiražki
Tež kompjuter móže so z popstarom stać. To dopokazachu wědomostnicy, kiž su program z informacijemi Beethovenskeje hudźby pjelnili, a tón je 10. sinfoniju skomponował. Ludwig van Beethoven dźě bě swój čas dźewjeć sinfonijow stworił. Wuslědk eksperimenta bě kónc tydźenja na Bonnskim Telekom-forumje słyšeć. Kompoziciju móža sej zajimcy tež na cejdejce z mjenom „Ludwig van Beethoven X – The Al Project“ naposkać.
„Horcy“ hudźbny widejo w katedrali města Toledo – tu porik jara erotisce rejuje – zbudźa w katolskej cyrkwi Španiskeje wulku kritiku. Mjeztym je samo rěč wo „wójnje“. Arcybiskop z Toleda Francisco Cerro Chaves prosy wo zamołwjenje. Dekan katedrale Juan Miguel Ferrer Grenesche pak ma twórbu za wuraz čłowjeskeje lubosće. Po wozjewjenju wideja je sej 3,7 milionow ludźi w běhu 48 hodźin twórbu wobhladało a pozitiwnje hódnoćiło.
Budyšin (SN). Wuhotowarjam krajinow w Budyskim wokrjesu po tarifje jasnje wjace pjenjez přisteji. W septembrje su jich mzdy wo 3,4 procenty přiběrali. Přichodne lěto slěduje dalši plus wo 3,3 procenty. To zdźěli dźěłarnistwo Twarstwo-agrar-wobswět (IG BAU), kotrež přistajenych zdobom namołwja swój mzdowy lisćik pruwować. „Ze septemberskim wotličenjom měli přidatne pjenjezy na konće być. Štóž je dóstał njeje, měł so na dźěłarnistwo wobroćić“, praji Peter Schubert, předsyda IG BAU we wuchodnej Sakskej. Po informacijach dźěłoweje agentury je we wokrjesu něhdźe 540 ludźi we wobłuku wuhotowanja zahrodow, krajin a sportnišćow přistajenych.
Wot klětušeho płaća prěni raz samsne mzdy na wuchodźe a zapadźe Němskeje. „Dlěje hač 30 lět po politiskim přewróće njeje w branši hižo žanoho rozdźěla. To je dawno načasu“, dźěłarnik wuzběhny. Nimo toho so wyša mzda pozitiwnje na atraktiwitu zelenych powołanjow wuskutkuje. Zdobom k tomu přinošuje, njedostatkej fachowcow znapřećiwić.
Wien (dpa/SN). Dwaj dnjej po tym zo je w Awstriskej zwjazkowy kancler Sebastian Kurz wotstupił, dóstanu tam noweho šefa knježerstwa. Zwjazkowy prezident Alexander Van der Bellen chcyše dźensa připołdnju 52lětneho Alexandera Schallenberga jako kanclera spřisahać. Schallenberg a wicekancler Werner Kogler mataj nětko wobstejacu koaliciju dale wjesć. Najebać krizu knježerstwa mataj za to kruty fundament, kaž wonaj přezjednje zwurazništaj. Zwjazkowy prezident pak wobeju k wěcownemu a konstruktiwnemu zhromadnemu dźěłu namołwja, a to na dobro Awstričanow.
Předwčerawšim wječor je Sebastian Kurz (ÖVP) po wozjewjenju podhlada korupcije dla wotstupił. To bě za Zelenych, kotřiž knježerstwo w kraju sobu nawjeduja, wuměnjenje, zo koalicija z ÖVP dale wobsteji. Schallenberg hižo dlěje w politice skutkuje a bě dotal we wonkownym ministerstwje aktiwny. Wjacerěčny, mjezynarodnje nazhonity diplomat zastupuje w migraciskim wobłuku runje tak kruty kurs kaž jeho předchadnik.