Z wudaća: póndźela, 11 oktobera 2021

Wulku škodu zawostajili

Malešecy. Nimale 20 000 eurow škody načinichu njeznaći w nocy na minjeny pjatk w Malešecach, jako so do lakěrowanskeje firmy zadobychu. Z njeje su skowanskej nastrojej kaž tež wjacore ­wobruče nakładneho awta w hódnoće 10 000 eurow sobu wzali. Wěcna škoda wučinja wjace hač 8 000 eurow.

Bóšicy (SN/MiR). Aktualnej, na zhromadnosć wusměrjenej projektaj we Wětrowje žnějetej dobry wothłós. To wuzběhny ­Bóščanski wjesnjanosta Stanij Ryćer (Bóšćanske rjemjesło) na zašłym posedźenju gmejnskeje rady. We Wětrowskej bibliotece wotmě so prěnje čitanje. Zajim za dalše, kotrež chcedźa 28. oktobra přewjesć, je tak wulki, zo dyrbja zarjadowanje na žurli zetkawanišća wotměć. Tež jězbu jónu wob tydźeń z Wětrowa do Njeswači­dła k nakupowanju a trěbne wobstaranja starši wjesnjenjo mjeztym dosć derje wužiwaja. „Tuchwilu je pjeć zajimcow, ­kotřiž kóždy pjatk rano na transport ­čakaja“, wotmołwi Ryćer na prašenje SN. „A su dalši, kotřiž chcedźa so přidružić.“

Dale zaběrachu so Bóščanscy radźi­ćeljo z přepodaćom nadawka za kónc­lětne wotličenje 2013, za čož ma gmejna 4 046 eurow nałožić. Přichodnje chce sej poskitk wjacorych, po móžnosći třoch předewzaćow, kotrež smědźa hospo­darski plan pruwować, wobstarać – a to hnydom na wjacore lěta. Po słowach wjesnjanosty dyrbja pruwowanje na kóždy pad přewjesć. „Bjez pruwowanja njeje móžno stajić próstwu na zjawne spě­chowanske srědki.“

Swój třeći dźěl stawiznow wolejbula na serbskich šulach započinam dźensa z wurězkami přinoškow nowiny Sächsische Zeitung. W decembru 1970 tam pisachu, zo wuhotowa rada wokrjesa Budyšin, wotdźěl ludowe kubłanje, za B-šulerjow (5. a 6. lětnik) wolejbulowy turněr šulow. Dobyła je Serbska PWŠ Budyšin z hrajerjemi M. Kowar, D. Nawka a M. Korjeńk, a to wot wosom startowacych šulow. W januarje 1971 wuhrachu druhi raz pokal Domowiny za samsnu starobnu skupinu w Budyšinje. Bjez poražki přesadźichu so wolejbulisća Dynama Mišno, tehdyšeho mištra NDR. Wurjadne 4. městno mjez wosom cyłkami zawěsćichu sej serbscy hólcy (hlej horjeka), kotřiž trenowachu a hrajachu za SWW Budyšin. A šěsć lět pozdźišo tworjachu woni zhromadnje z Borisom Dobrowolskim a Tomašom Fasku žro mustwa Jednoty Budyšin na NDR-mišterstwach młodźiny A w Ueckermündźe. Mišter sta so znowa Dynamo Mišno, a mjez wosom finalistami docpěchmy my Budyšenjo 7. městno.

27. Budyski měšćanski běh pod korona-poměrami bjezporočnje přewjedźeny

Wjacesportowe zjednoćenstwo (MSV) Budyšin je hižo wjele lět hłowny orga­nizator jara woblubowaneho a mjeztym hižo 27. Budyskeho měšćanskeho běha. Loni dyrbješe wurisanje korony dla wupadnyć.

Lětsa nětko, po tróšku wolóženju tu­teje cyłkowneje situacije, je so zarjadowar, na čole ze swojim agilnym jedna­ćelom a předsydu Steffenom Waldmannom, rozsudźił w někajkej formje tele 27. wurisanje realizować. A to je so tež wulkotnje poradźiło, byrnjež jenož móžne było z cyłkownje tysac starterami, štož je něhdźe połojca dotalnych. Tak su cy­łu wěc wuwzaćnje na sportowy areal Budyskeje Młynkec łuki přepoło­žili. W měsće samym bychu cyły dźeń wjacore dróhi a puće kaž tež Póstowe namě­sto zašlahać dyrbjeli atd. A žadany a trěbny wěstotny kaž hygienowy koncept korony dla hodźeše so na Młynkec łuce wo wjele lóšo dodźeržeć.

Mannheim (B/SN). Kak su katolscy a ewan­gelscy wěriwi Němskeje zwjazkowy sejm wolili, je wosebita slědźerska skupina zwěsćiła. Tak je so zwjazanosć křesćanow k CDU/CSU dale pomjeńšiła, na tamnej stronje je jich SPD bóle k sebi wjazać zamó­hła. Katolikojo su z 35 procentami swój křižik pola CDU/CSU stajili (2017: 44 proc.), protestanća ze 24 procentami (2017: 33 proc.). Za SPD rozsudźi so 23 procentow katolikow (2017: 18 proc.) a 30 procentow protestantow (2017: 24 proc.). Ličby bazuja na 41 373 woprašanych wolerkow a wolerjow. Mjez katolikami su Zelenych 13 procentow, FDP 11 proc., AfD 8 proc. a Lěwicu tři procenty wolili. Mjez ewangelskimi wolerjemi běchu za Zelenych 15 proc., za FDP 11 proc., za AfD 9 proc. a za Lěwicu štyri procenty.

Po synodalnej zhromadźiznje