Z wudaća: póndźela, 22 nowembera 2021

Amsterdam (dpa/SN). We wjacorych městach Nižozemskeje je tež minjenu nóc k njeměram a namócnym rozestajenjam dóšło. Skućićeljo zamiškrichu wohenje, zničichu busowe zastanišća a wužiwachu ćežke praskotaki, kaž nižozemska powěsćernja ANP rozprawja. Bě to mjeztym třeća nóc namócnosćow za sobu w Nižozemskej. Tak dóńdźe mjez druhim w měsće Enschede na wuchodźe kraja njedaloko němskeje mjezy a w Groningenje k namócnym rozestajenjam mjez demonstrantami a policiju. Dźesatki młodostnych běchu so w měsće zhromadźili, hdźež mjetachu kamjenje a praskotaki na zastojnikow. Woni wjacorych demonstrantow zajachu. Z městnami wužiwachu tež swoju bróń.

Jednotneje přičiny protestow njeje. W někotrych městach su drje protesty přećiwo wobmjezowanjam koronawirusa dla nastork namócnosćow. W socialnych syćach běchu wjacore skupiny k namócnosćam namołwjeli. Rozestajenja běchu so minjeny pjatk w Rotterdamje z raznymi wukročenjemi započeli.

Debatuja wo winowatostnym šćěpjenju přećiwo koronawirusej

Berlin (dpa/SN). Hladajo na dramatiske połoženje koronapandemije dla je diskusija wo powšitkownej winowatosći šćěpjenja přećiwo koronawirusej dale a aktualniša. Je načasu wo tym rozmyslować, žadaše sej strowotniski fachowc SPD Karl Lauterbach předwčerawšim, sobotu, w telewiziji. „Njebych to na žadyn pad wjace wuzamknył. Dyrbimy so tajkej winowatosći bližić.“ Lauterbach argumentuje, zo njeby bjez tajkeje winowatosće kwota šćěpjenja docpějomna była, kotraž by dosahacu imunizacije ludnosće za­ručiła.

Lětuša schadźowanka je so runje tak kaž hižo lońša w digitalnym formaće wotměła. Rozsudźiła bě to Załožba za serbski lud hakle minjeny tydźeń. Hač do poslednjeho wokomika sym so nadźijał, zo budźe swjatočnosć tónraz w prezency. Moje přeće drje so nažel njespjelniło, přiwšěm dožiwich sobotu rjany wječor. Zhromadnje ze syłu dalšich studentow a 12tkarjow smy so w Budyskej „Krónje“ zetkali, tam swój program předstajili a takrjec „schadźowanku-light“ woswjećili. Myslu sej, zo su zamołwići to najlěpše z aktualneje situacije činili. Po programje je so załožba wo słódnu wječer za wšěch sobuskutkowacych postarała. W měšćanskej hali smy sej blida zestajeli, zhromadnje wječerjeli a hišće dołho bjesadowali. Někotři studenća a šulerjo su sej samozrozumliwje tež swój instrument sobu přinjesli a zahudźili. Tak dožiwichmy spodobny wječor w kole přećelow. Tón wšak njeby móžny był, njebychmy-li wšitcy šćěpjeni a přidatnje testowani byli.  Pětr Dźisławk

Wojacy Zwjazkoweje wobory podpěruja Zhorjelski krajnoradny zarjad na přichodne tydźenje. Cyłkownje 25 wojakow je tamniši krajny rada Bernd Lange (CDU) minjeny štwórtk wosobinsce w Žitawje witał. Za to měješe mjez druhim kašćik ze strowymi, w regionje zhotowjenymi brěčkami sobu. „Ze Zwjazkowej woboru mějachmy w zašłosći hižo jara dobre nazhonjenja a smy za nuznje trěbnu pomoc na městnje dźakowni“, wón wuzběhny. Hladajo na přiběracu ličbu koronainfekcijow trjeba strowotniski ­zarjad wokrjesa podpěru. Hižo nětko přizjewjeja tam zastatk wobdźěłanjow. Wojacy předewšěm kontakty slěduja. Foto: Susanne Lehmann

Wien (dpa/SN). Lockdown za cyłu Awstrisku woznamjenja po słowach hoteloweje branše wulku škodu za image. Dokelž njeje tam koronakriza pod kontrolu, je to hańba za kraj, měni Susanne Kraus-Winkler z fachoweho zarjada za hoteleriju awstriskeje hospodarskeje komory. Hosćo wšak jenož rjaneje krajiny dla njepřijědu, ale tež začuća wěstoty dla. „Wěstota je nowa turistiska měna“, wona wuzběhnje.

Lockdown sam je bjez alternatiwy. „Dyrbimy jón znjesć“, Kraus-Winkler praji. Klasiski dowol k hodam prawdźepo­dobnje njebudźe. Turistikarjo liča jenož hišće z hosćimi, kotřiž prawidłownje ­přichadźeja. Branša nadźija so nětko druheje połojcy sezony wotsrjedź januara. W bywšich lockdownach móžachu w hotelach jenož wobchodnicy abo ludźo wažnych přičin dla přenocować.

Hižo njedawne warnowanje Němskeje, do Awstriskeje jěć, je wulku žołmu wotprajenjow wuskutkowało. Zo wjele hotelow přichodnje na přeco swoje durje zawrje, z tym fachowča njeliči. Knježerstwo dźě chce jim wupad dochodow zdźěla zarunać. Přiwšěm je prašenje, hdy budźe skónčnje zaso pozitiwnych powěsćow za turizm.

W Chróšćanskej cyrkwi wotmě so wčera na swjedźenju Chrysta Krala młodźinski nyšpor. Na nim předstaji z Jaseńcy pochadźaca fotografowka Kerstin Kaczmar swój wobrazowy projekt „Družka“, w kotrymž so ze swjedźenskej drastu katolskich holcow zaběra. Nyšpor wobrubi ­projektna band dekanatneho dušepastyrstwa. Po nutrnosći poskićachu čłonojo dekanatneho kružka ­přitomnym na farskim dworje horce napoje. Foto: Darius Budar

Na kěrchowje Smječkečanskeje ewangelskeje wosady njejsu jenož pólscy a juhosłowjanscy wojacy Druheje swětoweje wójny pochowani, ale tež němscy. Jich zhromadny row je nětko znowa wuhotowany a nimo toho stawiznisce přeslědźeny.

Smječkecy (SN/MWj). Mjenje kemšerjow hač hewak smjertnu njedźelu bě wčera pandemije dla dopołdnja w Smječkečanskej cyrkwi. Woni pak nětko wědźa, čehodla direktnje před hłownym zachodom do Božeho domu křiž steji. Tón běchu hižo loni ponowili. Nowa pak je zornowcowa taflička, na kotrejž je napisane, zo su na tymle městnje w lěće 1952 němskich padłych wojakow Druheje swětoweje wójny pochowali.

Wohnjowa wobora z pomocu gmejny wuhibki do přichoda stajiła

Chrósćicy (JK/SN). Budyski wokrjes lětsa wohnjowe wobory wokrjesa nastupajo wuhotowanje z drastu a nastrojemi ­njespěchuje. Komuny maja tuž jenož wobmjezowany budget k dispoziciji, zo bychu jich wobory dale derje wuhoto­wane byli.

Budyšin. Awto wobstajnje přepruwować dać je za wěstu jězbu trěbne. Za to pak njetrjeba mějićel z nim stajnje do zamkarnje. Mobilna techniska słužba sakskeho ADAC tuchwilu darmotne přepruwowanja wosobowych awtow poskića. Fachowcy wobhladaja sej bateriju, chłódźenski srědk a trějaki. Je-li wšitko w porjadku, dóstanje jězdźidło pruwowansku plaketu „Zymski ček 2021“. W Budyšinje poskića tajke přepruwowanja jutře a srjedu wot 10 hodź. při tankowni Agip na Lubijskej dróze.

Pokradnjeny moped zaso namakali

Wojerecy. Socialne medije su předwčerawšim pomhali, zo móžachu we Wojerecach pokradnjeny moped zaso namakać. Kaž policija rozprawja, bu dopołdnja na Łužiskim naměsće čerwjena Łastojčka w hódnoće 1 500 eurow pokradnjena. Mjeztym zo policija za jězdźidłom slědźeše, je wobsedźer paralelnje na Facebooku wo pomoc prosył. Hižo po krótkim času přizjewi so prěni swědk, kiž bě Łastojčku w měsće wuhladał. Zastojnicy móžachu moped zawěsćichu a jón zbožownemu wobsedźerjej wróćichu. Informacije wo skućićelu žane njepředleža.