Z wudaća: srjeda, 12 januara 2022

Waršawa (dpa/SN). Zastupowacy ministerski prezident Pólskeje Jarosław Ka­czyński wotpokazuje rozprawy, po kotrychž je jeho knježerstwo israelsku wuskušowansku software Pegasus přećiwo opoziciji zasadźiło. By špatne było, njeby-li pólska tajna słužba tajki srědk wusku­šowanja měła, rjekny Kaczyński w rozmołwje z nowinarjemi. „Móžu pak jenož potwjerdźić: Powědanja opozicije, zo smy Pegasus za politiske zaměry za­sadźili, su dospołny njezmysł.“

Brüssel (dpa/SN). Zastupnicy 30 čłonskich statow NATO a Ruskeje su dźensa w Brüsselu konflikt na Ukrainje a dalše temy rozjimali. Nadźije na konkretne wuslědki su skerje snadne. Přiwšěm maja hižo za pozitiwne, zo je scyła ke konferency dóšło. Wšako je to prěni króć po juliju 2019, zo wobě stronje rozmołwy w tym formaće wjedźetej. USA kritizowachu, zo so Moskwa w krizy Ukrainy dla wo wotputanje njeprócuje. Powšitkownje ličachu z tym, zo sej Ruska w rozmołwach znowa wěstotne garantije ze stron NATO žada. W tym zwisku měła so NATO zawjazać, zo so dale na wuchod njerozšěri a wosebje, zo Ukrainu jako čłona njepřiwozmje. USA su tajke přilubjenje wo­spjet wotpokazali, pokazujo na „politiku wotewrjenych duri“, kotraž kóždemu krajej zmóžnja so z čłonom NATO stać. Zapadny wojerski zwjazk sej žada, zo Ruska přestanje dalše jednotki njedaloko ukrainskeje mjezy zaměstnjeć. Němsku zastupuje w Brüsselu statny sekretar Andreas Michaelis, kaž wonkowne ministerstwo zdźěli.

Marek Krawc rozprawja wo aktualnje rozjimanych temach w Čěskej

Praha. W Čěskej je incidencna hódnota ze 7 336 dalšimi natyknjenjemi na 420 woteběrała, to je 2 000 pozitiwnych padow mjenje hač tydźeń do toho. Wjace hač połojca nowoinfekcijow pak zwisuje z wariantu koronawirusa omikron. Fachowcy liča tuž w přichodnych tydźenjach z nowej žołmu wšědnje hač do 50 000 natyknjenjow.

Pod wuměnjenjemi pandemije na přikład posedźenja župneho předsydstwa online přewjedować je akteram druhdy njesměrne wužadanje. Wo tym njewě jeno županka župy „Jakub Lorenc-Zalěski“ powědać. Połoženje w Budyskej župje zda so podobne być. Štóž wšědnje z nowymi pućemi komunikacije wobchadźeć njetrjeba, tomu je ćežko headset z wotpowědnymi programami wužiwać. Wězo so z kóždym dalšim wužiwanjom wěsćiši čuješ. Bjez tak mjenowaneho prěnjeho razu pak so ći žadyn zastup njeradźi. Ale próh je mnohim přewysoki. Wšako njesměli aktiwity wolenych čłonkow a čłonow župneho předsydstwa na móžnej techniskej njewobdarjenosći zwrěšćić. Z Budyskeje župy wěmy, zo su telefonowe konferency jeje předsydstwa zwučene schadźowanja loni jeno dźělnje narunali. A zawěsće wopisany zjaw jeničce někotre předsydstwa Domowinskich župow njepotrjechi, ale wjele wjace towarstwow. Tuž je načasu pandemiju skónčnje přewinyć. Axel Arlt

Berlin (dpa/SN). Twarske hospodarstwo móže so po posudku Němskeho instituta za hospodarske slědźenje najebać pobrachowacy material dobrych wobrotow nadźijeć. Institut z tym liči, zo problem falowaceho materiala tež přichodny čas wostanje. Kóšty za twar domow drje tuž dale rozrostu. To ma swoje wuskutki tež za twarske plany noweho zwjazkoweho knježerstwa. Amplowa koalicija chce kóžde lěto 400 000 nowych bydlenjow twarić. Tež w hospodarskim wobłuku wočakuja twarske zawody dalše inwesticije, kotrež su předewzaća koronakrizy dla loni wróćo stajili.

Julian Nyča z Prěčec přispomnja slědowace ke komentarej „Mój wid“ w našim wječorniku ze 7. januara:

Zo su politiske komentary w Serbskich Nowinach nastupajo rusku wonkownu politiku do wulkeje měry jednostronske, na to sym so mjeztym zwučił. Wočiwidnje njeńdźe dawno hižo wo diferencowany wid na zapadne postupowanje abo na podawki w Ukrainje, ale ruskeho prezidenta mjeztym wotewrjenje chwalimy – a jeničce jeho. Njech je, kaž je, dyrbjeli pak při faktach wostać.

Dźěći Worklečanskeho horta su nowe lěto raz na hinaše wašnje zahajili. Někotre z nich běchu minjene dny jako hwězdni ­spěwarjo po puću. Kubłarki pokazachu jim tuž film, z kotrehož zhonichu, za kotre projekty budu nazběrane pjenjezy ­hwězdnych spěwarjow lětsa wužiwane. Na to podachu so po skupinkach do Worklečanskeje kapałki, zo bychu po kěrlušu a modlitwje wo třoch kralach a woznamje jich darow rěčeli. Foto: Chrystina Pašcyna

Zo maja w komunach měšćanske a gmejnske rady, je powšitkownje znate. Zo pak maja we Wojerecach dosć aktiwnu młodźinsku měšćansku radu, je wosebitosć nimale cyłeho wokrjesa.

Wojerecy (SN/MWj). Z młodźinskim angažementnym mytom su tele dny młodźinsku měšćansku radu města Wojerec wuznamjenili. Myto spožčiła je pjeć wosobow wopřijaca młodźinska jury, kotraž bě myto hromadźe ze syću za dźěćace a młodźinske dźěło do žiwjenja zwołała.

Loni móžachu so angažowane młodźinske skupiny a organizacije wo myto požadać, štož su z wida Christopha Sempera z mjenowaneje syće „derje wužiwali“. Ze 14 zapodatych próstwow wuzwoli młodźinska jury sydom dobyćerjow. Dźěło Wojerowskeje młodźinskeje měšćanskeje rady je jurorow najbóle přeswědčiło. Tónle gremij zastupuje młodych ludźi w měsće, žada sej prawo soburěčenja a zasadźa so za politiske zarjadowanja a akcije na dobro wobydlerjow.

Budyšin (SN/MWj). Nimale dwaj měsacaj dyrbjachu lubowarjo kinowych předstajenjow na tónle wokomik čakać. Tehdy stupaceje incidencneje hódnoty dla je sakske statne knježerstwo srjedź nowembra tak mjenowany kulturny lockdown wobzamknyło. Nětko smě tež Budyske kino wot zajutřišeho, 14. januara, zaso wočinić, na čož so sobudźěłaćerjo z połnej paru přihotuja.

„Njemóžemy wšitke skomdźene filmy w Budyšinje nachwatać. Přiwšěm je naš angažowany team wotměnjawy program zestajił“, zdźěli nawoda Budyskeho kina Andreas Schneider. K wjerškam prěnjeho tydźenja słušeja nimo produkcijow „Spider-Man – No Way Home“ a „The King’s Man: The Beginning“ tež swójbne, kaž „Encanto“ a „Lauras Stern“. Dołho wočakowane pokročowanje rjadu „Matrix“ steji z „Matrix Resurrections“ tohorunja na hrajnym planje. „Sing 2“ drje startuje 20. januara. Tónle pask pak pokazaja w Budyskim kinje jako předpremjeru hižo njedźelu, 16. januara, w 14.30 hodź. Je to perfektne předstajenje za cyłu swójbu. A to najlěpše je, zo dorosćeni, kotřiž dźěćo přewodźeja, tohorunja jeno dźěćacy zastupny lisćik zapłaća.

We wobłuku strukturneje změny chce gmejna Slepo sobu rěčeć

Slepo (AK/SN). W procesu strukturneje změny chce gmejna Slepo wažne słowčko sobu rěčeć a swoje zajimy zastupować. To podšmórny wjesnjanosta Jörg Funda (CDU) na wčerawšim posedźenju tamnišeje gmejnskeje rady. W lisće wón noweho społnomócnjeneho zwjazkoweho knježerstwa za wuchodne zwjazkowe kraje Carstena Schneidera (SPD) přeproša, wot hórnistwa potrjechene regiony Łužicy wopytać a sej swójski wobraz wo połoženju na městnje tworić.

Wjelelětny bywši gmejnski radźićel Bernd Juskowiak we wobłuku wobydlerskich naprašowanjow napo­minaše łužiskich zapósłancow zwjazkoweho sejma sylnišo sobu zapřijeć, zo by Slepjanski region w procesu strukturneje změny słyšeć był. „Puć pohórškow dyrbi wotdeleka horje skutkować“, Juskowiak zwurazni. „Dyrbimy zmužići wostać.“