Z wudaća: srjeda, 12 januara 2022

Chrósćicy. „Na slědach wjelka – łužiska přiroda a wjelk“ rěka hesło prěnjeho ­wječora noweje kulturneje zymy w Chróšćanskej putniskej hospodźe sobotu, 15. januara w 19.45 hodź. (zastup wot 19 hodź. zapisanja kontaktnych datow dla). Za tónle wječor je sej hosćićelka ­Monika Gerdesowa přeprosyła fachowca na tym polu. Přednošować budźe ­młody serbski wědomostnik Paul Lipič, pochadźacy z Jawory, kiž w Zhorjelskim Sen­ckenbergskim muzeju za přirodowědu na wjelčim projekće slědźi. Wězo budźe referent tež na prašenja publikuma ­wotmołwjeć. Koronowych postajenjow dla dyrbjachu dotal planowane prěnje štyri ­zarjadowanja bohužel wupadnyć. Nětko smě je putniska mać přewjesć, ale pod prawidłom 2G. Přistup maja wotchorjeni a šćěpjeni.

Paduši w bydlenju byli

Budyšin. Do bydlenja na Budyskej Karla Marxowej běchu so njeznaći předwčerawšim w běhu dnja zadobyli. Skućićeljo přepytachu wšitke rumnosće a wočinichu kamory a pisanske blida. Pokradnyli su laptopaj a kameru. Hódnotu rubizny trochuje wobsedźer na 4 000 eurow. Wěcna škoda na bydlenskich durjach wučinja něhdźe 400 eurow.

Droby (ES/SN). Chětro křiwy a samlutki steji kamjentny křiž při puću mjez Drobami a pućom wot Łomska do Minakała. Nichtó njewě, čehodla běchu jón něhdy stajili. A tak sta so křiž w běhu lětstotkow z pomnikom a wobstatkom krajiny.

W Radworskim lěsnym parku je Bronjanski ornitologa Handrij Baumgärtel njedawno zymsku lačawku (Wintergoldhähnchen) na foće zwěčnił. To wšak měješe wulke zbožo, přetož dźewjeć centimetrow wulki ptačk waži runje pjeć do šěsć gramow a je hišće mjeńši hač kralik (Zaunkönig). Wón mjez hałzami šmrěkow a jědlow bjez přestawki tam a sem skaka. Před dobrym lětom bě naš awtor zymsku lačawku prěni raz wuhladał a ju loni w měrcu znowa wobkedźbował. Wot nowembra so wón zaměrnje prócowaše ornitologisku drohoćinku fotografować, štož je so jemu nětko poradźiło. Foto: Handrij Baumgärtel

Jennifer Janiska

Na proze do noweho lěta je zwjazko­wy wolejbulowy ligist Drježdźanski SC na swojich internetnych stronach tři krótke inter­viewy z hrajerkami Sinu Stöck­mann, Maju Storck a Jennifer Janiska wozjewił. Za sportowe strony Serbskich Nowin je David Matik někotre zajimawe wotmołwy trójki hromadu zestajał.

Nadběhowarka Sina Stöckmann je rodźena Drježdźanjanka a započa loni pola profijow hrać. Wona je sej tři prašenja wupytała, na kotrež tule wotmołwja.

Kotry film w hodownym času hladaće?

S. Stöckmann: To je pola nas wězo, znajmjeńša jónu „Tři worješki za popjelawku“. To je mjenujcy film, kotryž su w Moritzburgu wjerćeli. Wón dyrbi­ přeco w tym času być.

Kotre nazhonjenja sće w lěće 2021 zběrała?

S. Stöckmann: Mějach prěni raz zranjenje, kotrehož dla sym woprawdźe dlěši čas wupadnyła. Nawuknych sćerpliwa ze sobu być abo lěpje prajene na kóždy pad sćerpliwišo ze sobu wobchadźeć (so směje), sej chwile brać a so nad tym zwjeselić, štož hižo zaso dźe.

Kotry wulět je na Was najbóle skutkował?