Z wudaća: štwórtk, 13 januara 2022

štwórtk, 13 januara 2022 13:00

Krótkopowěsće (13.01.22)

Incidenca na snadnym niwowje

Budyšin/Zhorjelc. Incidency we wo­krjesomaj Budyšin a Zhorjelc stagněrujetej na snadnym niwowje w němskim přerězku. Po Roberta Kochowym instituće wučinjatej hódnoće tu 199,3 resp. 189,6. Budyski krajnoradny zarjad informuje wo 146 nowych natyknjenjach z koronawirusom, 14 schorjenych je zemrěło. W Zhorjelskim wokrjesu zličichu 130 dalšich infekcijow a šěsć smjertnych padow.

Pokazaja ptačokwasny program

Budyšin. Serbski ludowy ansambl pokaza po přiměrjenju strowotniskich předpisow nětko tola wječorny ptačokwasny program „Njewěsta njewjesta“. SLA planuje inscenaciju dohromady trójce předstajić, a to 21., 22. a 23. januara w Chróšćanskej wjacezaměrowej hali „Jednota“. Wo wuměnjenjach za wopyt kaž tež móžnosćach, zastupne lisćiki sej kupić, chce SLA krótkodobnje informować.

Wotměja wuměłsku wuměnu

wozjewjene w: Krótkopowěsće
štwórtk, 13 januara 2022 13:00

Prěnje změny hižo přewjedli

Budyski krajnoradny zarjad naprašowanja a skóržby pruwuje

Budyšin (SN/BŠe). Nowe busowe plany a čary w Budyskim wokrjesu, kotrež su zamołwići spočatk januara zawjedli, dyrbjachu lěpše a spěšniše zwiski sobujěducym zmóžnić. Přewažnje je so to tež poradźiło. Přiwšěm jewjachu so tu a tam njedostatki, na kotrež je Budyski krajnoradny zarjad w běhu krótkeho časa reagował. „Pruwujemy wšitke skóržby a naprašowanja, kotrež smy z mejlku, telefonom abo póštu dóstali“, informuje nowinska rěčnica Budyskeho krajnoradne- ho zarjada Frances Lein. Přiwšěm je přeco hišće něhdźe 100 naprašowanjow w póštowym kašćiku pod hesłom „busowa syć“ njewotmołwjenych. Starši dóstawaja wotpowědne wobkrućenje, zo su jich pokiwy, próstwy atd. dóšli. Nimo toho dawa zarjad potrjechenym hižo ewentualne namjety za alternatiwne wužiwanje busowych čarow a linijow.

wozjewjene w: Łužica
štwórtk, 13 januara 2022 13:00

Jeno „symbolowa politika“

Pod hesłom „Kulturny kraj Sakska za­wrjeny?“ su so Drježdźanska kulturna měšćanostka, intendanća a dalši nawodźa sakskich jewišćow w zjawnym lisće přećiwo sakskej koronapolitice wuprajili. Cordula Ratajczakowa je so z intendantom NSLDź a předsydu Sakskeho krajneho zwjazka w němskim jewišćowym towarstwje Lutzom Hillmannom rozmołwjała, kiž je list sobu jako prěni podpisał.

Poprawom móžeće so wjeselić, móžeće zaso hrać – čehodla nětko skoržiće?

wozjewjene w: Rozmołwa
štwórtk, 13 januara 2022 13:00

Dobry zakład

Budyšin (SN/bn). Na prěnim lětušim posedźenju prezidija Domowiny wčera w Budyskim Serbskim domje a online je gremij mjez druhim koaliciske zrěčenje noweho zwjazkoweho knježerstwa wuhódnoćił. Wuraznje sej w tym zwisku chwalachu, zo Serbow tam jako „serbski lud“ připó­znawaao“, kaž w nowinskej zdźělence Domowiny rěka. Dalše ćežišćo bě přihot podłožkow za wuradźowanje předsydstwa třěšneho zwjazka serbskich towarstwow, kotrež chcedźa kónc januara přewjesć. Nimo toho informowaše jedna­ćelka Domowiny Judit Šołćina wo „aktualnym dźěle Serbow w Mjeńšinowej radźe Němskeje, do kotrejež ma prezidij zaso třoch zastupjerjow delegować“. Předsyda Domowiny Dawid Statnik roz­jimaše „staw prócowanjow w Braniborskej, tež Sintow a Romow we wustawje kraja wobkedźbować“. Nawjazujo na wotpokazane spěchowanje filma Grit Lemke wo Serbach ze stron zwjazkoweho spěchowanja filmow zwurazni prezidij swoje njezrozumjenje, zo „je po rozprawach medijow mjez druhim wužiwanje zapřijeća ‚Volk‘ pozdatna přičina negatiwneho rozsuda.
wozjewjene w: Towarstwa

Zhotowjenje baterijowych materialow wuwiwa so dźakowano změnje k elektro-mobiliće na industriju přichoda. Runje łužiski brunicowy region w tymle wobłuku dźeń a wjetšu rólu hraje.

Čorna Pumpa (dpa/SN). Předewzaće Altech Industries Germany tzwr chce w Čornopumpskim industrijnišću na 14 hektarow wulkej płoninje produkciske stejnišćo za naworštowanje wysokowukonitych litiumowo-ionowych baterijow twarić. Plany za to je předstejićel Uwe Ahrens wčera w Čornej Pumpje rozłožił. Němska wotnožka awstralskeho koncerna Altech Chemical chce hač do 500 milionow eurow do projekta inwestować. Něhdźe 150 dźěłowych městnow ma nastać. Po słowach Uwy Ahrensa trjebaja procesowych technikarjow, logistikarjow a dalšich motiwowanych ludźi z regiona.

wozjewjene w: Hospodarstwo
štwórtk, 13 januara 2022 13:00

Kampanja ma onlineshop

Drježdźany (SN). Z nowym poskitkom započa so w lěće 2022 kampanja „So geht sächsisch“. W kooperaciji z medijowej skupinu DDV Lokal su sakskich wikowarjow, posłužbowarjow a regionalne manufaktury hromadu wjedli. Pod internetnej adresu www.so-geht-saechsisch.shop móža zajimcy z wjace hač 2 400 sakskich wudźěłkow wuzwolić a je kupić. Mjez nimi su „mnohe ekskluziwne a inowatiwne produkty a limitě­rowane edicije“, zdźěli sakska statna kenclija.

Tež z Łužicy su we wirtuelnym wobchodźe produkty na předań, na přikład marmelada z 1. Budyskeje marmeladoweje manufaktury, žonop z Budyskeho Hamornika a pjelnjaki z Kumwałdskeje firmy Diplomat. Mjez pokiwami za zabawu namakaš tohorunja knihu fotografa Jürgena Maćija „Tief im Osten – Die Lausitz im Wandel 1976–2020“.

„Bě nam wažne wutworić platformu, kotraž mnohotnosć Sakskeje wotbłyšćuje a při tym wulku paletu produktow a poskitkow pod kwalitatiwnym znamješkom ‚Made in Saxony‘ zjednoća“, wu­zběhny rěčnik sakskeho knježerstwa Ralph Schreiber.

wozjewjene w: Kultura
štwórtk, 13 januara 2022 13:00

Nowy rekord infekcijow

Berlin (dpa/SN). Ličba w běhu dnja Roberta Kochowemu institutej posrědkowanych nowoinfekcijow z koronawirusom je znowa rekordny staw docpěła. Strowotniske zarjady Němskeje su institutej 81 417 dalšich padow přizjewili. Dźens tydźenja bě jich 64 340. Wčera bě ličba nowych natyknjenjow prěni króć po wudyrjenju pandemije hranicu 80 000 překročiła.

Lauterbach wostawa neutralny

Berlin (dpa/SN). Zwjazkowy minister za strowotnistwo Karl Lauterbach (SPD) nochce swójski namjet nastupajo po-wšitkownu winowatosć šćěpjenja přećiwo koronawirus předpołožić. Nowinarjam wón rjekny: „Sym so rozsudźił, zo žadyn swójski namjet njeprezentuju, ale zo neutralny wostanu.“ W diskusiji pak steji wón „kruće poboku“ zwjazkoweho kanclera Olafa Scholza (SPD), Lauterbach potwjerdźi. „Smy jasni zakitowarjo winowatostneho šćěpjenja.“

Přiwótřenja za nješćěpjenych

wozjewjene w: Kraj a swět
Čłonaj mórskeje straže staj dźensa rano w přistawje małeje italskeje kupny Giglio italsku chorhoj wupowěsnyłoj. Tam wopominachu z wjacorymi zarjadowanjemi 10. róčnicu katastrofy z 32 smjertnymi woporami, po tym zo bě so pasažěrska łódź Costa Concordia skały šmórnyła a so powróćiła. Nad zarjadom přistawa su mjena woporow zwěčnjene. Foto: pa/Andrew Medichini

wozjewjene w: Kraj a swět
štwórtk, 13 januara 2022 13:00

To a tamne (13.01.22)

Dźěćo w busu porodźiła je žona w brazilskej metropoli Rio de Janeiro. Při porodźe jej sobujěducy pomhachu. Do toho běchu woni šofera pohonjeli, spěšnišo jěć. We wideju brazilskeje telewizije je widźeć, kak sanitetar z nowonarodźenym na ruce bus wopušći, młoda mać za nim. Wona so pola pasažěrow hišće zamołwi, zo bě bus jeje dla zapozdźeny. Ludźom pak bě to po wšěm zdaću smorže. Woni jej gratulowachu a so z njej wjeselachu.

Do hajzla ćisnjene spěšnotesty korony dla zatykuja w francoskim Berre-les-Alpes pola Nizzy tamnišu rjedźernju wopłóčkow. Zaso raz běchu železne hrabje, kotrež krute wobstatki z wopłóčkow ćahaja, zatykane, wottam rěkaše. „Myslachmy sej, zo je logiske, zo słušeja trjebane spěšnotesty do wotpadkoweho sudobja.“ Komuna ludźi prosy ničo do nuznika njemjetać, štož do njeho njesłuša.

wozjewjene w: To a tamne
štwórtk, 13 januara 2022 13:00

Sakska wolóža wobmjezowanja

Drježdźany (dpa/SN). Sakska wolóža wot jutřišeho swoje krute škitne naprawy koronawirus nastupajo. Krajne knježerstwo je wčera mjez druhim wobzamknyło, zo smědźa kulturne institucije zaso wote­wrjene być. Na zhromadźiznach smě so zaso wjace wobdźělnikow zetkać. Ćěłu bliske posłužby kaž kosmetikowe salony smědźa šćěpjeni a wotchorjeni (2G) zaso wužiwać. To samsne płaći za muzeje a wustajeńcy. Za hosćency, dźiwadła, operowe domy a kina płaći prawidło 2Gplus. Tam žadaja sej přidatny aktualny koronatest. Tón njeje trěbny, hdyž móža po­trjecheni dopokazać, zo su třeći króć šćěpjeni abo je-li druhe šćěpjenje hišće poměrnje čerstwe.

Nowe rjadowanje płaći hač do 6. februara. Je-li pak hranica přećeženja chorownjow docpěta abo zwyši-li so incidenca we wokrjesach a bjezwokrjesnych městach nad 1 500, su wolóženja zaso zběhnjene, sakske knježerstwo informuje.

wozjewjene w: Kraj a swět

Serbska debata

nowostki LND