Něhdźe 200 nowych infekcijow
Budyšin/Zhorjelc. Hornjołužiskej wo-krjesaj wostanjetej mjez tuchwilu najmjenje wot pandemije potrjechenymi regionami Němskeje. Budyski wokrjes informuje wo 99 dalšich natyknjenych z koronu a wo wosom zemrětych. Incidenca po RKI je 184,1. W Zhorjelskim wokrjesu zličichu 107 nowoinfekcijow. Incidenca tam wučinja 191,6.
Mužakow z inspiraciju był
Ralsko. Jako přewodźerjow w kónčinje „Narodny geopark Ralsko“ w sewjernej Čěskej su 16 t. mj. „georangerow“ wukubłali. Tući chcedźa zajimcow na zanjesene a lědma znate městna přewodźeć a je tež wěcywustojnje předstajić. Z inspiraciju za tajke „geo-dyrdomdejstwa“ bě zhromadne dźěło z geoparkom Mužakowski zahork, hdźež hižo podobne wodźenja přewjeduja.
Znowa bjez wizuma
Hdyž čitam a słyšu tele dny z našich gmejnow jich lońše bilancy a lětuše předewzaća, so mi druhdy zda, zo je wuhlad do přichoda kaž hladanje do škleńčaneje kule, kotraž zamóže ći přichod wěšćić. Gmejny maja něštožkuli planowane, ale hač budu to zwoprawdźić móc, je wšo druhe hač wěste. Njewěstosće našeho časa su přewulke, hač móžeš z nimi solidnje planować.
Dobry přikład za to je gmejna Pančicy-Kukow. Tu chcychu hižo loni w decembru dalši twarski wotrězk wobšěrneho ponowjenja Šule Ćišinskeho wotzamknjeny měć. Tuchwilu pak maja twarscy dźěłaćerjo přeco hišće ruce połnej dźěła. Jim pobrachuje twarski material, a gmejnje pobrachuja pjenjezy, zo móhła wšo zapłaćić. Runja kóždemu priwatnemu čłowjekej dźě tež komuna pytnje, zo je wšitko dźeń a dróše. Wšelake dypki, kotrež njejsu na kóždy pad trěbne, su so hižo z woporom čerwjeneho pisaka stali. A kotra ličba na kóncu pod smužku zličbowanki steji, je dotal wulke hódančko. Nimo zahajenych projektow tuž lětsa w gmejnje ničo dale inwestować njebudu.
Drježdźany (SN/at). W statnym ministerstwje za wědomosć, kulturu a turizm pruwuja dale konkretne namjety Rady za serbske naležnosće Sakskeje, kotrež chcedźa do předdźěła za dwójny etat 2023/2024 swobodneho stata zapřijeć. Tak dźe wo zarunanje wudawkow čłonce a čłonam serbskeje rady, wo wěcne kóšty za dźěławosć gremija a wo wutworjenje jednaćelnje. To wobkrući nowinski rěčnik Jörg Förster na naprašowanje našeho wječornika po wčerawšej rozmołwje přisłušneje ministerki Barbary Klepsch (CDU) z předsydu Domowiny Dawidom Statnikom, na kotrejž wobdźěli so tohorunja nowa jednaćelka Domowiny Judit Šołćina. Rěčnik zdobom zdźěli, zo „při potrjebje wotpowědne prawniske zakłady wutworja“, na přikład z pomocu etat přewodźaceho zakonja.
Domjace lěkarki a lěkarjo dale pře koronu šćěpja, předewšěm ludźi staršeje generacije.
Budyšin/Njeswačidło/Mały Wjelkow (SN/MiR). Kónc zašłeho lěta bě so na domjacych lěkarjow wulka ličba pacientow z próstwu wo šćěpjenje wobroćiła. Wšako knježeše po cyłej Němskej deltawarianta korony. Nimo toho skedźbnješe Roberta Kochowy institut dźeń a bóle na přiwalacu so žołmu natyknjenja z wariantu omikron. „Njemějachmy pak stajnje šćěpiwa dosć, tež hdyž běchu nam to přilubili“, wuswětla Budyska lěkarka za powšitkownu medicinu Sabina Miklec, „tak dyrbjachmy pacientam terminy wotprajić a je přestorčić.“ Runje tak bě to w praksomaj dr. Jany Markoweje w Njeswačidle a dr. Anny Reiche w Małym Wjelkowje.
Dr. Jana Markowa zwěsća, zo „jenož jednotliwcy přichadźeja, zo bychu so prěni króć šćěpić dali, dalši wospjet přińdu, wosebje wulka pak je ličba tych, kotřiž móžnosć boosterowanja wužiwaja.“ Dźěći pod dwanaće lětami wona nješćěpi. „To měli dźěćacy lěkarjo činić. Dźěći a młodostnych nad dwanaće lětami mamy tu jenož w małej ličbje, zo bychu so před koronu škitać dali.“
Zhorjelc (SN/BŠe). Po wjele lětach přihotow su nětko 14 čłonow wopřijacy mjezu přesahowacy zwjazk Němsko-pólski geopark Mužakowski zahórk załožili. Jeho zaměr je koordinować, spěchować a wolóžić zhromadne dźěło na dobro naslědneho wuwića geoparka. Na konstituowacym posedźenju minjenu póndźelu su sobustawojo z Pólskeje, Braniborskeje a Sakskeje wažne zakłady kooperacije wobzamknyli, tak zo móže zwjazk bórze dźěłać započeć. Čestnohamtski prezident je Tadeusz Jędrzejczak. Hłowne sydło zarjaduja w Małym Kólsku (Klein Kölzig), kaž nowinska rěčnica Zhorjelskeho wokrjesa Franziska Glaubitz wčera informowaše. Dale su sobustawojo rozsudźili hłownohamtskeho direktora přistajić.
Ze stron Sakskeje je Zhorjelski krajny rada Bernd Lange (CDU) w zwjazku zastupjeny. Dalše sobustawske komuny su Brody, Łęknica, Przewóz, Trzebiel, Tuplice, Żary, ale tež wojewódstwo Lubuskie w Pólskej. Braniborsku zastupuja gmejny Dolina Nysy a Małksy, Feliksowy jězor a wokrjes Sprjewja-Nysa. Dalšej sakskej čłonaj stej město Běła Woda a gmejna Jabłońc (Gablenz) w Zhorjelskim wokrjesu.
Berlin (dpa/SN). K zakónčenju tři dny trajaceje debaty zwjazkoweho sejma předewzaća noweje amploweje koalicije SPD, Zelenych a FDP nastupajo je zwjazkowy financny minister Christian Lindner (FDP) dźensa swoje plany předstajił. Znowa su kontrowersnje wo dodatnym etaće 2021 diskutowali. Z nim chce Lindner za přewinjenje koronakrizy předwidźane, ale njewužiwane srědki za klimu škitace naprawy wužiwać. Opozicija ma to za wustawu ranjace.
Imunitu Hilsy zběhnyli
Berlin (dpa/SN). Dobre lěto po swojim wobdźělenju na demonstraciji tak mjenowanych prěkimyslerjow hroža Budyskemu zapósłancej AfD w zwjazkowym sejmje Karstenej Hilsy juristiske konsekwency. Přećiwo hłosam AfD je parlament wčera wječor wobzamknył, imunitu zapósłanca zběhnyć a chłostanske jednanje přećiwo njemu zmóžnić. Hilse bě so na kromje demonstracije přećiwo statnym naprawam policiji spjećował.
Wukaz Bidena zběhnjeny
Wopity šofer je swoje awto w porynsko-pfalcskim Bernkastelu-Kuesu před policajskej staciju parkował a je sej za wodźidłom wusnył. Zastojnikam wóz napadny, dokelž motor wšón čas běžeše. Zastojnicy zwěsćichu pola 26lětneho šofera 1,72 promilow alkohola a su jeho wopiłstwa w nadróžnym wobchadźe dla hnydom přizjewili.
Z horcotu nad 50 stopnjemi bědźa so tuchwilu wobydlerjo zapadnych kónčin Awstralskeje. W pobrjóžnym sydlišću Onslow bě to wčera z 50,7 stopnjemi lětdźesatki stary rekord a najwyša hdy w zwjazkowym staće Western Australia měrjena temperatura. Samsnu hódnotu běchu 1960 w pusćinowym sydlišću Oodnadatta na juhu kraja naměrili. Tež w druhich městach su podobne temperatury zwěsćili. Z městnami su klimatiske naprawy přežadane a hižo njedźěłaja.
Berlin (dpa/SN). Zwjazkowa rada je dźensa na wurjadnym posedźenju nowe naprawy w zwisku z koronawirusom schwaliła. Hłownje dźe wo rjadowanja nastupajo karantenu, na kotrež běchu so Zwjazk a zwjazkowe kraje dojednali. Postajenje, kotrež bě zwjazkowy sejm wčera wječor wobzamknył, mjez druhim předwidźi, zo njetrjebaja třeći króć šćěpjeni wjace do karanteny, su-li kontakt k natyknjenej wosobje měli. Tež doba karanteny bu přikrótšena.
W běhu dnja chcychu so zwjazkowy minister za strowotnistwo Karl Lauterbach (SPD), prezident Roberta Kochoweho instituta Lothar Wieler a Berlinski wirologa Christian Drosten na zwjazkowej nowinarskej konferency k aktualnemu połoženju w koronakrizy wuprajić.