Z wudaća: wutora, 21 junija 2022

Stuttgart (dpa/SN). Badensko-Württembergska, Bayerska, Hessenska a Sewjerorynsko-Westfalska žadaja sej wot Zwjazka, hladajo na hrožacu žołmu koronainfekcijow w nazymje, spěšnje zakonske wuměnjenja za razniše škitne naprawy stworić. Ampla dyrbjała hišće do dowo­loweje přestawki změnu zakonja za škit před infekcijemi předpołožić, rěka w zhromadnej deklaraciji. Dokument chcedźa konferency strowotniskich ministrow předpołožić, kotraž wotměje so jutře w Magdeburgu. Naprawy su trěbne, zo móhli na přiběrace ličby infekcijow skutkownje reagować. K tomu słuša winowatostne wužiwanje nahubnikow w nutřkownych rumnosćach, prawidła 3G abo 2G, winowatosć testowanja, wobmjezowanje ličby wobdźělnikow na zarjadowanjach a wobmjezowanje kontaktow.

Kraje žadaja sej wot konferency ministrow, spěšnje wo tym rozsudźić, hač doporuča powšitkowne štwórte šćěpjenje přećiwo koronawirusej. Stajna šćěpjenska komisija doporuča tuchwilu jenož štwórte šćěpjenje za ludźi nad 70 lětami.

Wojowanja w Sjewjerodonjecku – Ruska zapadej nihdy wjace njedowěrja

Kijew (dpa/SN). Ukrainski prezident Wolodymyr Zelenskyj je potwjerdźił, zo słuša Ukraina po jeho měnjenju k Europje a zo je sej status kandidata za přistup k EU zasłužiła. Wot Ruskeje nadpadnjeny kraj dopokazuje wšědnje, zo je hižo nětko dźěl zjednoćenych europskich hódnotow, rjekny Zelenskyj minjenu nóc w swojim widejowym poselstwje. Prócowanja Ukrainy, do EU zastupić, Rusku znjeměrnja, wón měnješe.

Komisija EU bě minjeny pjatk doporučiła, Ukrainje a Moldawskej status kandidatow za přistup do Europskeje unije spožčić. Wo tym rozsudźić dyrbja statni a knježerstwowi šefojo 27 čłonskich ­krajow na swojim wjeršku zajutřišim, štwórtk, w Brüsselu.

Wo prašenju, hač maš rjenje wotsyčeny a čisty trawnik abo hač zelenišćo trochu dźiwiše wupada a tak insektam žiwjenski rum skići, móžeš bjezdwěla rozdźělneho měnjenja być. Ja tež swój trawnik hdys a hdys z trawusyčakom wotsyku, mam pak na zahrodźe městna za kerki a kwětki, hdźež pčołki, wosy a čmjeły dosć picy nadeńdu. Tohodla jara witam, zo chce gmejna Pančicy-Kukow na terenje bywšeho hosćenca dźěl ležownosće insektam přewostajić a trawu trochu wyše rosć dać. Mam pak hišće dalšu ideju, kotraž by zawěsće w tym nastupanju wunošna była. Přeco zaso so mjenujcy mjerzam, hdyž wuhladam před domčkami tak mjenowane kamjentne zahrody, kotrež su połne mjeńšich a wjetšich kamjenjow a wo­srjedź nich někajka eksotiska rostlina, kotraž so scyła do našeje kónčiny njehodźi. Hač so to čłowjekej lubi abo nic, ze zahrodu to ničo činić nima. Snano je tež to raz tema za gmejnsku radu, kak přirodźe wjace městna dać. Marian Wjeńka

Budyšin (CS/SN). Nawi přichoda kaž tež powołanske poradźowanske wiki, kotrež wotměwaja so kóždolětnje spočatk lěta w Budyskej powołanskej akademiji, su lětsa korony dla wupadnyli. Tohodla rozsudźichu so zamołwići kónc šulskeho lěta dźeń wotewrjenych duri zarjadować, wšako maja hač na předmjet elektrotechniku, kotryž je tak derje kaž połny, we wšěch druhich wukubłanskich wobłukach hišće swobodne městna. Młodźi ­ludźo maja potajkim wulki wuběr a měli so na kubłanišćo přiwabić. ­Docenća ­a mnozy studenća rozłožichu minjenu sobotu něhdźe 250 hosćom wukubłanske móžnosće na akademiji. We fokusu steješe při tym nowe laborowe twarjenje, kotrež skića wuběrne móžnosće nastupajo přewjedźenje eksperi­mentow. K tomu su hišće přednoški k wšelakim temam přewjedli. Za zajimcow wotwonka bě móžnosć, sej mustrowe bydlenje w Budyskej Strowotnej studni wobhladać. Powołanska akademija wotnaja tam wjacore bydlenja ze třomi rumnosćemi, kotrež steja stajnje dwěmaj studentomaj k dispoziciji.

Nětko je najlěpši čas sej truskalcy našćipać a z nich słódny tykanc napjec, sej je nacokorowane słodźeć dać abo je hinak wužiwać. To wě tež Stefanie Jannasch z Porchowa, kotruž zetkachmy tele dny w Kašecach při šćipanju. Tam maja wjacore družiny, kotrež w rozdźělnych časach zrawja. A komuž so nochce sam šćipać, móže sej čerstwje našćipany korbik kupić. Foto: SN/Hanka Šěnec

Zo w nalěću trawa při wotpowědnym wjedrje runjewon šusknje, kóždy zahrodkar wě. Potom je čas za trawusyčaki. Na někotrych městnach pak to cyle tak jednore njeje.

Pančicy-Kukow (SN/MWj). Jako bě bywši hosćenc wosrjedź Pančic-Kukowa wottorhany a teren zrunany, ze skłoninami wuhotowany a rjany zornowcowy schód natwarjeny, bě wjele chwalobnych słowow słyšeć. Nětko jewja so tež kritiske hłosy, měnjace, zo gmejna tam za prawym njehlada, dokelž je trawa chětro wysoko narostła. Z tym su so nětko tež gmejnscy radźićeljo Pančic-Kukowa na swojim zašłym posedźenju zaběrali.

Radźićeljo so aktualnym prašenjam wobydlerjow wěnowali

Rakecy (JK/SN). We wobłuku wobydlerskich naležnosćow, kruteho wobstatka kóždeho dnjoweho porjada Rakečanskeje gmejnskeje rady, narěznychu na mi­njenym posedźenju dwě zajimawej prašeni. Na Kobličanskej dróze w Stróži ­maja w poslednim času znowa problemy ze spěšnosću busow, kotrež tam jězdźa. Nachwilne wobmjezowanje spěšnosće na 30 km/h hižo aktualnje njewobsteji, a tak wobydlerjo časćišo busy wobkedźbuja, kotrež su tam spěšnišo po puću.

Wandalojo w zwěrjencu zachadźeli

Biskopicy. Škodu něhdźe tysac eurow načinichu njeznaći, kotřiž běchu so w nocy na njedźelu do Biskopičanskeho zwěrjenca zadobyli a tam bjez rozuma kóncowali. Tak rozbichu štyri škleńčane kašćiki za wšelake družiny myšow. Najskerje wužiwachu za to wjetše kwětkace sudobjo, kotrež pozdźišo do hata ćisnychu. Dale zadobychu so do tak mjeno­waneje zeleneje rjadowniskeje rumnosće w zadnim dźělu zwěrjenca a rozbichu tam škleńcu dweju witrinow. Hač su skućićel­jo něšto pokradnyli njeje znate. Policija pyta nětko za swědkami, kotřiž su snano něšto wobkedźbowali.

Budyšin (SN). Šulske lěto 2021/2022 so nachila a lětnje prózdniny so bliža. Za wšěch tych, kiž nochcedźa jenož doma abo w dowolu lěnjeho pasć, ale sej tež tón abo tamny fenk zasłužić, maja Ludowe nakładnistwo Domowina a Serbske Nowiny wosebity prózdninski poskitk. Horiće so za nowe a socialne medije a za žurnalistiku abo prosće pisanje? To požadajće so w LND a w SN wo prózdninske dźěło abo praktikum. Nimo digitalizacije fotow a žurnalistiskeho skutkowanja, za čož sposrědkujemy trěbnu wědu, móžeće so tohorunja w socialnych medijach wuspytać. Přizjewće so tuž prawje bórze z e-mailku na abo .

Budyšin. Rěčny centrum WITAJ přeprošuje kubłarki a kubłarjow na dalekubłanje k temje „Spěwaj z Witkom – nowe serbske dźěćace spěwy“. W minjenych lětach su w časopisu „Lutki“ tójšto nowych serbskich dźěćacych spěwow za předšulsku starobu wozjewjeli. Wuběr z nich chcedźa na zhromadnym popołdnju pod nawodom Leńki Thomasoweje nazwučować. K tomu poskića wotpowědne playbacki, nahrawane a wobdźěłane wot Symana Hejduški. Dalekubłanje wotměje so póndźelu, 4. julija, wot 15 do 16.30 hodź. w sydarni RCW w Budyšinje. Zajimče a zajimcy njech so hač do 24. junija pod telefonowym čisłom 03591 550400 abo z e-mejlku pod přizjewja. Wobdźělenje płaći na wosobu dźesać eurow, popłatk na městnje zběraja.

Dopominaja na Kocora

Łaz. Komponist, koncertny organizator a reformowy pedagoga Korla Awgust Kocor (1822– 1904) steji w srjedźišću přednoška pjatk, 24. junija, we 18 hodź. we Łazowskim Domje Zejlerja a Smo­lerja. Spěchowanske towarstwo domu na wječork přeprošuje. Referent budźe Sieghard Kozel ze Stróže. Zastup płaći tři eura na wosobu.

Postaja historiski měznik