Smjerdźaca (SN). W zhromadnym dźěle z Wokrjesnym sportowym zwjazkom Budyšin poskići Serbske šulske towarstwo šulerjam wot 1. do 4. lětnika prózdninske dny. Tute přewjedu w Kubłanskim srjedźišću LIPA w Smjerdźacej a to wot 22. do 26. awgusta, stajnje wot 9 do 15 hodź. Prózdninski poskitk wjerći so dokoławokoło sporta. Wobdźělnicy změja móžnosć, so we wšelakich sportowych družinach wuspytać, nowe sportowe družiny a nastroje zeznać a so cyle jednorje zhromadnje pohibować!
Dale planuje Serbske šulske towarstwo w Smjerdźečanskim kubłanskim srjedźišću LIPA swójbne stanowanje. Te wotměje so wot 27. do 28. julija. Nimo zhromadneje wječerje skići so móžnosć, za bulom honić, wolejbul hrać, so wječor při wohenju rozmołwjeć a hry hrać. Rano po rańšim sporće přihotuja a přewjedu zhromadnu snědań, z kotrejž přenocowanje zdobom zakónča. Popłatk na dorosćeneho wučinja wosom eurow, na dźěćo dwaj euraj.
Přizjewjenja za poskitkaj přijimuja hač do 15. julija e-mailnje pod abo pod telefonowym čisłom: 0172/78 119 59.
Z awtorom krucha Danielom Rattheijom je so po premjernym předstajenju „Pink Guerilla“ w Budyskim dźiwadle na hrodźe Cordula Ratajczakowa rozmołwjała. Před lětomaj bě činohrajne studijo při NSLDź hižo jeho kruch „Greta“ předstajiło.
Što prajiće k inscenaciji?
D. Ratthei: Sym dospołnje zahorjeny, to dyrbju woprawdźe tak rjec. Předewšěm je dźiwadźelenje elewki Saryh Cyžec wulki zaćišć we mni zawostajiło. Jako elewka je wona hižo nětko tajka kmana, zo móhł někotryžkuli dźiwadźelnik abo dźiwadźelnica něšto wot njeje nawuknyć. Telko wjesela při hraću, telko rozuma, tež, kaž je wona přeco přešaltowała a tak łamki a změny w teksće zwoprawdźiła, to wšo bě přeswědčace. A dokelž wona tak derje hraje, dóstanje to, štož wona praji, naraz cyle nowu, njepřijomnu dimensiju. Dale a zawjedliwiše jeje słowa skutkuja – a štož wona praji, je dźě woprawdźe zlě. Wona tak derje hraje, zo našu wotstawk dźeržacu membranu přełama a ju nutř pušćimy ze jeje poselstwom, a to je zawjedowace a strašne. Dyrbiš započeć sam rozmyslować: Što tu runje powědaja? Tónle efekt, kiž je dźensa tu nastał, je wulkotny.
16lětna holca bu na dompuću wot diskoteki nimale wumocowana. Njemdrje wona widejo přesćěhańcy do interneta staji a tam wo, ze swojeho wida, strašnych wukrajnych mužach powěda. Wothłós – wosebje ze stron prawicarskeho miljeja – je přemóžacy, a tuž sta so Sunny z blogowarku, kotraž dźeń a bóle při zakitowanju swojeho měnjenja rasistiskim idejam podleži. Ani sobušulerki a sobušulerjo, ani staršej a na žadyn pad jako mainstream dominowaca politiska korektnosć jej njepomhaja, so z dynamiki wuswobodźić, kotraž ke katastrofje wjedźe.
Po premjernym předstajenju „Pink Guerilla“ w Budyskim dźiwadle na Hrodźe je so SN wobhoniła, kak je so publikumej kruch lubił.
Měrana Cušcyna z Budyšina: Sarah Cyžec je talentowana hrajerka. Bě pytnyć, zo je sej w běhu swojeho wukubłanja w dźiwadle tójšto přiswojiła. Wona je so do róle zanuriła a čućiwje z hłosom a ćěłom agěrowała. Tež pantomima jej wočiwidnje wjeselo čini. Scyła ma wona při hraću sylne wuprudźenje. A tute wuprudźenje smy dźensa dožiwili w koncentrowanym předstajenju róle 16 lětnjeje Sunny. Sama na jewišću stać słuša zawěsće k najwjetšim wužadanjam dźiwadźelnikow a Sarah Cyžec je wužadanje suwerenje zmištrowała. Přeswědčiwje je elewka z monologa dialog tworiła a tak tamne róle – sobušulerjow, wučerki, staršeju – zapletła. Ale tež wšelakorosć młodeje duše – jako pěkna dźowka, rebelowaca abo njewěsta – je zamóhła derje předstajić.
Serbske mustwo – Natwar Němske Pazlicy 1:3 (1:0)
Zestawa Serbskeho mustwa 1. połčas: Ben Boese – Denny Kral, Aleksander Wałda, Aleksander Lobeda, Feliks Šwjela, Patrik Woko, Dawid Šołta, Danny Kobelt, Michał Młynk, Florian Šuliš, Christian Rintza
Zestawa Serbskeho mustwa 2. połčas: Ben Boese – Pětr Domaška, Lucian Zahrodnik, Carl Dietrich, Feliks Hrjehor, Maksimilian Zahrodnik, Gabriel Zahrodnik, Domenik Krötel, Oskar Hawš, Jan Bogusz, Emanuel Brühl
„Nětko wěmoj, kak móhła zakładna formacija njedźelu w prěnjej hrě přećiwo Cymbram z Italskeje wupadać. To bě wažna hra za dalše dopóznaća“, rjekny trenar Serbskeho mustwa Frank Ričel wčera po prěnjej a zdobom jeničkej přihotowanskej hrě w Chrósćicach přećiwo wokrjesnemu wyšemu ligistej Natwar Němske Pazlicy.