Dietze zastojnstwo złožiła
Berlin. Nawodnica wobwoda dźěłarnistwa IG metal za Braniborsku, Saksku a Berlin Birgit Dietze je swoje zastojnistwo k 1. julijej złožiła. Hakle 1. oktobra 2020 je wona nadawki přewzała. Přičina za wupowědźenje su wšelake wosobinske naležnosće a druha powołanska perspektiwa. Koordinaciju wobwoda je nětko Stephan Vetter přewzał.
Z wyšim měšćanostu rěčeli
Wojerecy. Prezenca serbskeje rěče w šulach města, spěchowanje motiwacije za wuknjacych přez přiličenje za maturu (2. cuza rěč) kaž tež lěpšiny a móžnosće za wutworjenje samopostajowaceje korporacije serbskeho ludu stejachu minjeny pjatk w srjedźišću rozmołwy Wojerowskeho wyšeho měšćanosta Torstena Rubana-Zeha (SPD) z čłonami Serbskeho sejma Anetu Zahrodnikowej, Hagenom Domašku a Měrćinom Krawcom.
Šćěpiwa efektiwne
Celovcec (SN/JaW). Muske mustwo Južneho Tirola je 4. koparsku europeadu w Awstriskej pola Korutanskich Słowjencow dobyło. Z tym zdobychu sej trofeju wurisanja europskich narodnych mjeńšin 4. króć za sobu. Južnotirolčenjo přewinychu minjenu sobotu domjace mustwo Korutanskich Słowjencow w sportowym parku Welzenegg w Celovcu (Klagenfurt) z 1:0. Z tym zdoby sej domjace mustwo Koroški slěbornu medalju. Serbske mustwo dźěli sej lětsa třeće městno z Němcami z Pólskeje. Wobě mustwje běštej w połfinalu w Sele (Zell) swojim přećiwnikam – Němcy z Pólskeje Južnotirolčanam z 1:2 a Serbja Korutanskim Słowjencam z 0:1 (wjace wo tejle hrě čitaće na 3. stronje) podležałoj.
We wokrjesomaj Budyšin a Zhorjelc, w Rudnohórskim, Vogtlandskim a Zwickauskim wokrjesu je CDU zastojnstwo krajneho rady we wčerawšich rozsudnych wólbach zakitowała. We wokrjesu srjedźna Sakska je kandidat-jednotliwc Dirk Neubauer dominancu sakskich křesćanskich demokratow přełamał a najlěpši wuslědk docpěł.
Budyšin/Kamjenc/Zhorjelc (SN/at). Napjatosć knježeše na wólbnej party CDU w Budyskim hosćencu Residence, doniž njebě w 20.30 hodź. wolóžene wyskanje wudyriło. Jich kandidat, dotalny 1. přirjadnik Udo Wićaz je druhi wólbny přechod z 43,5 proc. hišće jasniši hač před dwěmaj njedźelomaj dobył. Najebać słabe wólbne wobdźělenje jenož 36,7 proc. je wón jako jenički wot štyrjoch požadarjow procentualnje hłosy přidobył. Kandidat CDU je w 55 ze 57 komunow wólby dobył.
Smochćicy (SN/bn). Pod hesłom „Čěske nocy“ stej Serbski ludowy ansambl a kubłanišćo swj. Bena po dwulětnej přestawce znowa „Smochčanski hudźbny swjedźeń“ wuhotowałoj. Cyłkownje je minjenej pjatk a sobotu něhdźe 850 hosći zarjadowani pod hołym njebjom na dworje kubłanišća wopytało.
Intendant SLA Tomas Kreibich-Nawka witaše publikum, wjeselo so, zo „móžemy skónčnje zaso program we wulkim formaće ze wšěmi spartami našeho domu a wulkotnymi hosćemi prezentować“. Nawoda kubłanišća Sebastian Kieslich wuzběhny, zo „je hudźba kmana, kultury ze sobu zwjazać a dobremu susodstwu polěkować“. Swjedźeń je jemu zdobom „škrička nadźije, zo přichodnje tež susodźa, kotřiž tuchwilu ze sobu wojuja, zaso měr a swobodu dožiwjeja“.
Kopenhagen (dpa/SN). Po amokowym běhu wčera wječor w Kopenhagenje je policija pola podhladneho třělbu a nóž namakała. Nimo toho měješe 22lětny Dana tež přistup k pistoli, tamniša policija dźensa zdźěli. Podhladny je w nakupowanskim centrumje danskeje stolicy tři wosoby zatřělił a štyri dalše zranił, při čimž su woni w kritiskim strowotnym stawje. K motiwej dotal hišće žane pokazki njepředleža.
Tež Němcaj pod znjezboženymi
Rom/Bozen (dpa/SN). Po zesunjenju wulkich dźělow lodowca w horinach Dolomitow na sewjeru Italskeje wuchadźa zwjazkowe wonkowne ministerstwo z toho, zo su tež Němcy mjez znjezboženymi. Kaž rěčnica ministerstwa dźensa zdźěli, jedna so wo dwě wosobje. Honorarny konsul w Bozenje a němske pósłanstwo w Romje so z italskimi zarjadami wuměnja. Wčera dóńdźe na horje Marmolata k njezbožu, při čimž su so dźěle lodowca, sněh a kamjenje zesunyli a krosnjerjow zasypali. Tuchwilu je něhdźe 20 wosobow zhubjenych.
Inflacija w Turkowskej wysoka
Dokelž chcyše pjećlětny minjeny pjatk rano w Drježdźanach na kóždy pad na hrajkanišćo, je z bydlenja staršich twochnył a so ze swojim kolesom na puć podał. Kedźbliwi pasanća su jeho šěsć kilometrow zdaleny při brjohu Łobja wuhladali. Tež mać je hižo za hólčecom pytała a policiju informowała. Mjez druhim su namołwu w socialnych syćach zahajili.
Wutřělow na kwasu dla měješe policija w Duisburgu minjeny štwórtk wulki wuspěch. Hósć na kwasu bě wjacore razy wulkeho zboža dla do powětra třělił, na čož wjacore awta policije přichwatachu. Jako sobujěducych luksusoweho kwasneho awta kontrolowachu, lepichu skónčnje 25lětneho nawoženju, za kotrehož přikaz jatby předležeše. Swój swjedźeń pak wón wopušćić njetrjebaše. Po tym zo je chłostanski pjenjez zapłaćił, móžeše so wón k swojim hosćom nawróćić.
Drježdźany (SN). Cyłkownje 1 018 młodych žonow a mužow je hižo nětko swoje wukubłanske zrěčenje podpisało a so za karjeru w rjemjesle na wuchodźe Sakskeje rozsudźiło. Hladajo na lěto do toho pokazuje so pozitiwny trend. W lěće 2021 bě samsny dźeń, 30. junija, hakle 937 młodostnych wukubłanske zrěčenje z rjemjeslniskim zawodom we wokrjesach Mišno, Budyšin, Zhorjelc, Sakska Šwica-wuchodne Rudne horiny abo w krajnej stolicy Drježdźany wotzamknyło. Lětsa je to tuž wo něhdźe 8,6 procentow wjace.
„Mjezybilanca pokazuje, zo je rjemjesło z wjace hač 130 wukubłanskimi powołanjemi za šulskich wotchadnikow jara atraktiwne“, wuzběhny hłowny jednaćel Drježdźanskeje rjemjeslniskeje komory Andreas Brzezinski. „Potrjeba fachowcow w rjemjesle je tak wulka kaž nihdy do toho. Tuž pyta tež dale wjele předewzaćow za kmanymi požadarjemi za wukubłanje. Šulscy wotchadnicy maja přeco hišće móžnosć, so hodźace powołanje w rjemjesle namakać. Tež praktikum w přichodnych lětnich prózdninach skići často składnosć rjemjesło zeznać“, Brzezinski wujasni.
Berlin (dpa/SN). Zwjazkowy kancler Olaf Scholz (SPD) starosća so stupacych płaćiznow energije dla, wón wčera w interviewje ARD wuswětli. „Jelizo naraz tepjenska zličbowanka wo něšto stow eurow stupa, potom je to suma, kotruž mnozy zmištrować njemóža. To je socialna rozbuchlina.“ Kancler prócuje so wo změrowanje a chce so dźensa ze zastupjerjemi hospodarstwa zetkać a wo wosebitej akciji rěčeć. Wobkedźbowarjo wočakuja, zo rozsudne naprawy tak mjenowaneje „koncertowaneje akcije“ hakle po lětnjej přestawce sćěhuja, hdyž budźe rozměr energijoweje a płaćiznoweje krizy jasniši. Mjeztym pak ze wšelakich směrow konkretne namjety předleža. Tak předstaji Zwjazk němskich dźěłarnistwow płaćiznowu garantiju za milinu a płun.
Najnuzniši problem su tuchwilu płaćizny płuna. Zwjazkowy hospodarski minister Robert Habeck (Zeleni) warnowaše před eksploziju płaćiznow pola měšćanskich zawodow, jelizo Ruska honač zawjertnje a zastaraćeljo dosć płuna k dispoziciji stajić njemóža.