Berlin (dpa/SN). Bywši zwjazkowy kancler Gerhard Schröder poruča hladajo na płunowu krizu zasadźenje pipeliny Nord Stream 2. „Wona je hotowa. Budźe-li woprawdźe wusko, njeby z woběmaj płunowodomaj žadyn zastaranski problem za němsku industriju a němske domjacnosće był“, rjekny čłon SPD nowinarjam. Schröder mjenowaše aktiwizowanje Nord Stream 2 hladajo na móžne płunowe njedostatki „najjednoriše rozrisanje“.
Zwjazkowe knježerstwo bě po zahajenju ruskeje wójny w Ukrainje do słužby stajenje Nord Stream 2 wuzamknyło.
Bad Schandau (dpa/SN). K wotwobaranju lěsnych wohenjow su po słowach sakskeho ministerskeho prezidenta Michaela Kretschmera dalše inwesticije do wohnjoškita trěbne. „Chcemy – a smy to hižo wupisali – tři helikoptery kupić, kotrež móža tež wodu transportować“, rjekny politikar CDU wčera Bayerskemu rozhłosej. Při alarmje lěsneho wohenja dla dyrbja „w běhu mjeńšin reagować“ móc. Tale diskusija měła so zhromadnje ze zwjazkowym knježerstwom wjesć, ale tež ze zamołwitymi za mjezami kraja.
Mjeztym njeje so połoženje při lěsnym wohenju w Sakskej Šwicy tež w druhim tydźenju hišće wotputało. Woheń přeco zaso wudyri, zdźěli wčera rěčnik krajnoradneho zarjada wokrjesa Sakska Šwica-Wuchodne Rudne horiny Thomas Kunz. Při stupacych temperaturach a suchoće nastawaja nowe płomjenja. „Za wotputanje połoženja trjebamy dešć.“ Wčera rano bě 300 wohnjowych wobornikow zasadźenych. W sewjernym dźělu rěki Kirnitzsch zasadźeja nimo toho wodomjetaki sakskeje a bayerskeje policije.
Berlin (dpa/SN). W debaće wo zwyšenje rentoweje staroby na 70 lět je prezident zwjazka předewzaćow metaloweje branše Stefan Wolf podpěru hospodarskich fachowcow dóstał. „Namjet je prawy a wažny: Přetož wón pomha přećiwo chudobje w starobje a wolóži zdobom rentowu kasu, kotraž steji před kolapsom“, rjekny ekonom Bernd Raffelhüschen z Freiburgskeje uniwersity nowinarjam. Tež hospodarska fachowča Monika Schnitzer je wyšej starobje zastupa do renty napřećo wotewrjena.
Wolf bě so w rozmołwje z nowinarjemi za dlěši žiwjenski dźěłowy čas wuprajił, a to mjez druhim z dźeń a staršej towaršnosću wopodstatnił. Hladajo na demografiske wuwiće a na poćeženja socialnych a rentowych kasow su rezerwy přetrjebane. „Po schodźenkach budźemy dyrbjeć rentnarsku starobu na 70 lět zwyšić, dokelž žiwjenska staroba přiběra“, wujasni Wolf. Hewak njebudźe system srjedźodobnje hižo financujomny.
Praha (dpa/SN). Čěska chce priwatnym domjacnosćam hladajo na kóšty energije pod pažu přimnyć. Prezident Miloš Zeman je póndźelu wotpowědny zakoń – z nim chcedźa energijowe płaćizny za priwatnikow znižić – podpisał, kotryž běštej wobě komorje parlamenta schwaliłoj. Tak mjenowany potuńšeny tarif ma najprjedy raz za čas bližaceje so tepjenskeje sezony wot spočatka oktobra 2022 hač do kónca měrca 2023 płaćić. Nadrobnosće chce knježerstwo hač do kónca měsaca z postajenjom rjadować. Liča z tym, zo kabinet w prěnim kroku wjace hač miliardu eurow přewostaji, zo bychu zličbowanki za milinu, płun a tepjenje wo krutu sumu znižili. Chcedźa fleksibelnje reagować, rjekny minister za industriju a wikowanje Jozef Síkela.
Energijowe kóšty su wot spočatka ruskeje wójny přećiwo Ukrainje drastisce rozrostli. We w meji wozjewjenym woprašowanju slědźerskeje agentury Stem/Mark skoržeše 73 procentow woprašanych, zo knježerstwo w Praze wobydlerjam hladajo na podróšenje energije dosć njepomha. Na naprašowanju wobdźěli so wjace hač 700 ludźi.
Njeswačidło (ML/SN). Křćeńca je prěni wažny podawk w žiwjenju młodeho přiwisnika nabožinskeho zjednoćenstwa, kotryž pak sam wědomje njedožiwja. Wuwzaća su, jeli da so křćenc hakle jako młodostny abo dorosćeny wukřćić. Křesćanskej konfesiji baptistow a mennonitow wšak swojich młodych přiwisnikow hakle wokoło dwanaće lět we wodźe wukřćija, podobny nałožk z hinašim woznamom je tež w hinduizmje z wašnjom.
„Dopomnjeće na křćeńcu“ rěka nowa 47. wosebita wustajeńca w Njeswačanskim domizniskim muzeju, kotraž pokazuje wot minjeneho kónca tydźenja eksponaty zběraćela Falka Lorenza ze Zemic-Tumic a dalšich dodawarjow. Oficialne wotewrjenje přewšo zajimaweje pokazki je pak hakle njedźelu, 7. awgusta, popołdnju w třoch w Njeswačidle.
Rowno (JoS/SN). Tradicionalny lěćny swjedźeń su minjenu sobotu na Rownjanskim Njepilic statoku swjećili. Spočatnje bě to dźakne zarjadowanje za wšitkich pilnych pomocnikow při najwšelakorišich zarjadowanjach w běhu lěta. Mjeztym je to zjawny podawk za zajimcow z cyłeje wokoliny. To zwurazni tež předsyda spěchowanskeho towarstwa Njepilic dwór Manfred Nikel. „Z tymle swjedźenjom so wšitkim dźakujemy, tež hdyž su dźensa mnozy w dowolu. Wosebje dźakujemy so Čamarjec pjekarni, kotraž je w drjewjanej pjecy Njepilic chlěb napjekła, a wězo tež Grodkowskim muzikantam.“
Wosrjedź lěća póstnicy swjećić? W Lipsku je tež to móžno. Minjeny pjatk swjećachu studenća lěćne póstnicy, kotrež mjenuja SoFa (Sommer Fasching) we „Werk2“. Běchu to mjeztym dźesate lěćne póstnicy, kotrež Lipšćanske studentske rady jědnaćoch hromadźe wuhotowachu. K tymle radam słušeja fyzikarjo, chemikarjo, biologojo, sportowcy, medicinarjo, weterinarni medicinarjo, hospodarscy wědomostnicy a wězo tež Sorabija. Korony dla dyrbješe swjedźeń 2020 a 2021 wupadnyć. Ćim wjetše běštej wjeselo a angažement, zo móžeše so lětsa zaso wotměć.