Z wudaća: štwórtk, 04 awgusta 2022

Budestecy (CS/SN). Wšitke busy, kotrež Budyšin z Hornim krajom zwjazuja, dyrbja přez Budestecy. Dohromady je jich šěsć čarow. Za čas šule zastanje cyłkownje 155 busow, w prózdninach je jich wotydźenja přeco hišće 127. W minjenymaj lětomaj na tym dźěłachu, wuměnjenja za sobujěducych a busowych šoferow polěpšić. Město dweju zastanišćow na woběmaj bokomaj zwjazkoweje dróhi B 96 maja nětko prawe busowe zastanišćo z dwěmaj přidatnymaj nastupnišćomaj. Hižo wobstejacej zastanišći su tak přetwarili, zo hodźitej so bjez zadźěwkow wužiwać. Předwčerawšim su nowe busowe naměsto přepodali. Sobujěducy, kotřiž chcedźa w Budestecach přelězć, trjebaja nětko lědma hišće dróhu přeprěčić. To je wosebje za šulerjow wažne, podšmórny wjesnjanosta Markus Michauk.

Ze serbskim swjedźenjom barjery na wjacorych runinach wotstronić

Dźakne słowa su do wulkeho zarjadowanja a/abo po nim z wašnjom. Zrědka pak wopřijima wotpowědna lisćina telko mjenow kaž wona, z kotrejž so Lucian Kaulfürst minjeny pjatk składnostnje „1. serbskeho lětnjeho swjedźenja“ w Přiwćicach pomocnikam, podpěra­ćelam a sponsoram dźakowaše. Tak mjenowaše wón na přikład zastupjerjow lokalneje politiki runje tak kaž wjacorych Domowinskich ko­legow, dowožowaceju pjekarja a rěznika – samozrozumliwje wobaj z wokoliny –, Radworski młodźinski klub, gmejnu, wohnjowu woboru kaž tež wosadu Malešecy a serbske medije. Dohromady naliči Kaulfürst 19 jednotliwcow resp. cyłkow, kotrež – telko smě so na tym městnje hižo rjec – wuspěšnej premjerje na najwšelakoriše wašnje přinošowachu.

W Hórkach změja Lejnjanscy dumpersportowcy sobotu a njedźelu na něhdyšim twjerdym hrajnišću Hórčanskich koparjow swój lětuši běh wo Němske dumperowe mišterstwa. Njebudźe to finalne-pjate wurisanje kaž loni, za to pak raz třeće wot dohromady pjeć. Dotal wubědźowachu so piloća w lěće 2022 w Adelsdorfje (08.05.) a w Baćonju pola Donatec (10.07.). Na woběmaj běhomaj bě dohromady 33 motorsportowcow startowało. Najkonstantnišo po puću pak staj lětsa amtěrowacy němski dumperowy mišter Filip Kral z Róžanta (Dumperowy klub Lejno) a youngster Pawl Domš (Wubědźowanski team Adelsdorf/Quersa) ze Zejic. Wobeju dźělitaj w cyłkownym hódnoćenju jenož dwaj dypkaj.