Z wudaća: srjeda, 23 nowembera 2022

Chrósćicy. Za adwentnu kubłansku jězbu župy „Michał Hórnik“ sobotu, 26. nowembra, do Błótow su krótkodobnje hišće swobodne městna. Wotjězd je planowany w 10 hodź. při Chróšćanskej Jednoće. Wobdźělnicy wopytaja mjez druhim hodowne wiki w Lubnjowje a podadźa so wottam z čołmom na Lědy. Wotjězd w Lubnjowje budźe w 17 hodź., wječer we 18.30 hodź. w Klóšterskej Nowej Wsy. Bus nawróći so w 21 hodź do Chrósćic. Jězba płaći na wosobu 15 eurow. Swoje zastaranje płaći kóždy wobdźělnik sam. Zajimcy njech přizjewja so e-mailnje pod abo pod telefonowym čisłom 0174 301 02 00.

Radźićeljo wuradźuja

Lejno. Zdźěłanje twarskeho plana za wjacore ležownosće w Časecach budu jedna z temow přichodneho posedźenja gmejnskeje rady Pančicy-Kukow jutře, štwórtk, w 19 hodź. w Lejnjanskim hosćencu. Dale porěča radźićeljo wo nakupje zamkoweje připrawy za serbsku zakładnu Šulu Ćišinskeho. Wobydlerjo su wutrobnje přeprošeni.

Hruby twar prěnjeje hale w Choćebuzu je nimale dokónčeny. Němska železnica tam wosebje klimje přichilenu twaršćiznu wužiwa. Na tym je Budyska firma Hentschke Bau wobdźělena.

Choćebuz (SN). Němska železnica (DB) je při twarje noweje wuporjedźernje za ćahi ICE 4 w Choćebuzu dale w časowym planje. Wo tym je předewzaće wčera informowało, po tym zo staj sej społnomócnjeny koncerna za Berlin, Braniborsku a Mecklenburgsko-Předpomorsku Alexander Kaczmarek a statny sekretar w braniborskim hospodarskim ministerstwje Hendrik Fischer wobraz wo twarskim postupje tworiłoj.

Za twar wužiwa DB prěni raz klimje přichilenje zhotowjeny a tuž „zeleny“ beton, kaž předewzaće piše. Jeho produkcija 30 procentow mjenje emisijow CO2 zawinuje. Zdobom woteběra přetrjeba energije wo nimale 30 procentow. Wony beton zasadźeja za wažne hotowe dźěle, na přikład zepěry a dźěle třěšneje konstrukcije. Tež druhu halu chcedźa z tajkim betonom twarić.

Po lětach njewěstoty wotewrja so za tradicionalny zawod při dróze B96 nowe perspektiwy. Přewróty na wikach, ale tež swójske ideje to zmóžnichu. A maja noweho šefa.

Słónco so swěći nad wotkrytej jamu kaolinownje w Kamjenej w gmejnje Rakecy. Hoberske bagry zarywaja so do běło zybolaceje kamjeniny, transportuja ju na běžacy pas, z kotrehož dóstanje so drohotna surowizna k dalšemu předźěłanju. Wobraz, kotryž je so w poslednich lětdźesatkach lědma změnił – a tola je so spočatk měsaca nowa doba započała. Helmut Stuchtrup, kotryž je w poslednich wosom lětach wotežki tradicionelneho zawoda w rukomaj měł, zakónči kónc lěta swoje aktiwne powołanske žiwjenje. Jeho naslědnik Thomas Scholze bě hižo 1. nowem­bra poziciju nawody zawoda přewzał, kotruž wón nětko hač do 31. decembra zhromadnje z Helmutom Stuchtrupom wukonja.

SJ Chrósćicy – TSV Cossebaude 0:2 (0:1)

Zestawa domjacych: Králíček – Janca, F. Cyž, Runt, Rätze, L. Zahrodnik (51. Wornar), Hawš, M. Zahrodnik (58. Mark), Młynk (51. Wencel), Bogusz, Krawc