Drježdźany (SN). Čłonojo a čłonki towarstwa „Stup dale“ wojuja tučasnje wo zachowanje Serbskeje dźěćaceje dnjoweje skupiny w Drježdźanach. Wo tym informuje čłon towarstwa Christoph Cyž. Krótkodobnje je nošer pěstowarnje wotskočił. Z pomocu crowdfundingoweje akcije hromadźi towarstwo „Stup dale“ pjenjezy, z kotrymiž měła so w přichodźe podruž pěstowarnje financować. „Wotmysł je, přichodnemu nošerjej dźěl pjenježnych winowatosćow wotewzać. Tak njewobsteji riziko, zo měł měsac wob měsac ze swójskeje móšnje pěstowarnju podpěrać, ale jeničce z pomocu financielnych srědkow města Drježdźany“, Christoph Cyž rozłoži.
Tučasnje wjedu rozmołwy z móžnym nošerjom, kiž chce přichodny tydźeń dalši wažny rozsud w tutym prašenju tworić. Tohodla chcedźa hač do kónca tydźenja najwjetši dźěl planowaneje sumy 10 000 eurow nazběrane měć. To měł jasny pozitiwny signal być, zo so w Drježdźanach něšto hiba a zo so „Stup dale“ prócuje, financnu situaciju pěstowarnje polěpšić a přichodneho nošerja z tym wolóžić. Štóž chce akciju towarstwa podpěrać, móže to přez slědowacy link činić: .
Chrósćicy. W Chrósćicach je mjeztym z tradiciju, zo wjesne towarstwo Domizna na předwječoru prěnjeho adwenta na nawsy ze zelenych hałužkow zwity adwentny wobłuk staji, kiž so z adwentnej hwězdu w přichodnych tydźenjach frinkoli. K tomu poskićuja jutře, sobotu, wot 17 hodź. na nawsy před putniskej hospodu praženu kołbasku a horce wino. Dźěći su na to w 17.30 hodź. do Chróšćanskeje putniskeje hospody prošene. Tam móža na serbsku bajku słuchać, kotruž ćeta Monika jim čita.
Pod hesłom „Potajne časy“ přednošuje potom w 19.45 hodź. wědomostna sobudźěłaćerka Serbskeho muzeja Andrea Pawlikowa w putniskej hospodźe. Wona zaběra so ze serbskimi nałožkami na kóncu lěta a předstaji znate nałožki w trochu hinašim swětle. Mjez druhim wotmołwi na prašeni što chowa so za postawu swj. Borbory a što je w dwanaće nocach dowolene a što nic?
Do awta so zadobyli
Kamjenc. Row swojich přiwuznych je předwčerawšim popołdnju žona na pohrjebnišću při Kinsporskej dróze w Kamjencu wopytała. W tym času zadobychu so njeznaći do jeje wosoboweho awta typa Peugeot a pokradnychu ručnu tobołku. W njej bě nimale 600 eurow. Nimo toho načinichu paduši něhdźe 500 eurow wěcneje škody.
Budyšin. Na adwentnych sobotach budźe Serbska kulturna informacija přidatnje wot 10 do 15 hodź. wotewrjena a skića kóždu sobotu wosebite zarjadowanja. Tak přewjedu tam jutře dźěłarničku debjenja hodownych kulow. Na dalšich sobotach zhotowjeja tykački, podadźa so na slědy Serbow w Budyšinje a zhotowjeja šćěpjelowe taflički z wosobinskimi motiwami. Přizjewjenja přijimuja pod telefonowym čisłom 03591 42105.
Wuhotuja adwentne wiki
Ćisk. Zhromadne adwentne wiki wuhotuja Ćišćanske towarstwa jutře, sobotu, wot 14 do 19 hodź. na tamnišej nawsy. Wohnjowi wobornicy staraja so wo lěhwowy woheń a dźěćace towarstwo organizuje pječenje chlěba na kiju. Młodźina poskićuje pražene kołbaski, kulturne towarstwo pak plincy, kofej a tykanc. Horce wino dóstanu wopytowarjo při stejnišću rejwanskeje skupiny. Na Ćišćanskim statoku předawaja plećene, drjewowe a keramiske wudźěłki kaž tež tajke z Rudnych horin. W 17.30 hodź. wočakuja rumpodicha, z kotrymž chcedźa sej zhromadnje zaspěwać.
Spěwaja do adwenta
Lejno (SN/MWj). Swójsku wohnjowu woboru drje w Lejnje w gmejnje Pančicy-Kukow nimaja. A tola maja we wsy nětko nowu sirenu. Kaž Pančičansko-Kukowski wjesnjanosta Markus Kreuz (CDU) na wčerawšim posedźenju gmejnskeje rady w Lejnjanskim Kubicec hosćencu informowaše, njebudu ze sirenu wohnjowych wobornikow alarmować, ale wobydlerjow w katastrofowym padźe.
Natwarić móžachu ju dźakowano spěchowanskemu programej Zwjazka. Techniska připrawa płaći něhdźe 20 000 eurow. Z toho dyrbješe gmejna jeničce 3 000 eurow ze swójskeje kasy zapłaćić. Připrawjena je sirena na 16 metrow wysokim sćežoru. Hdyž wona zaruje, ma to tež w Zejicach a Časecach słyšeć być. Prěni raz wupruwować budu ju na cyłoněmskim warnowanskim dnju 8. decembra. Potom zasłyša wobydlerjo w 11 hodź. pjeć sekundow trajace sirenowe zwuki, přetorhnjene wot runje tak dołhich přestawkow. To ma jednu mjeńšinu trać. W 11.45 hodź. budźe trajny zwuk słyšeć, štož woznamjenja kónc warnowanja.
Wutrobne postrowy sćelechu serbskaj přećelej z Čěskeje Lukáš Novosad a Kryštof Peršin w minjenych dnjach přez socialne syće do Łužicy. Nic jenož za njeju běše sobotniši wječor wosebite dožiwjenje, tež serbski publikum běše wot moderacije čěskeje dwójki wot wšeho spočatka zahorjeny. Wočerstwjacy raz dósta moderacija přez lochki a humoristiski přistup moderatorow, předewšěm tež přez jeju zajimawy wonkowny wid na Serbow. W hač do poslednjeho kućika pjelnjenej Budyskej měšćanskej hali „Króna“ móžachu so přitomni tohorunja na přewšo wotměnjacy program wjeselić.
Rodźeny Wotrowčan Marek Buk dopomina so rady na čas swojeho dźěćatstwa w ródnej wsy, we Wotrowje. W pěstowarskim času w sydomdźesatych lětach bě mały Marek mjenujcy pola „Satlerec“, pola dźěda Jana Rjedy we Wotrowskej sedłarni, wotrostł. Tam mějachu hižo wot 1938 z tehdy 30lětnym Rjedźic Janom mištra za sedłarske rjemjesło. A dokelž běštaj Bukec staršej w sydomdźesatych lětach wobaj powołansce chětro zapřehnjenaj, bě Rjedźic dźěd za Bukec dźowce a syna w Rjedźic sedłarni wulka podpěra. Pěstowarski čas pola dźěda w dźěłarni bě za wnučka Mareka hižo sčasom wuwabk, so ze sedłarjom stać. Poměrnje zahe, hižo w 5. lětniku w šulskim času, wuwi so powołanski són do dźědowych stopow stupać a so ze sedłarjom stać. Wučerce, kotraž chcyše Wotrowčana na gymnazij pósłać, šuler Marek Buk tehdy praji, zo za wukubłanje maturu njetrjeba, a zo wostanje na šuli w Pančicach-Kukowje.
Wukubłanje w času přewróta
Hdyž wot Cyhelskeho nasypa přez hłowny zachod na Budyski Tuchor zastupiš a při ćěłowni nalěwo wotbočiš, přińdźeš po něhdźe sto dalšich metrach podłu sewjerneje murje pohrjebnišća k rownišću z němsko-serbskim napisom. Jedna so wo mjeńši swójbny row, wobdaty ze zornowcowymi prohami, na kotrychž bě něhdy železny płót připrawjeny. Rownišćo je z wulkej kamjentnej platu bjez napisa wodźěte. Před kěrchowskej murju steji ze syenita dźěłany pomnik z wulkim křižom. Do čorneho kamjenja je wudypany napis, kiž bě, kaž barbne zbytki wobswědčeja, něhdy pozłoćany.
„Ewiger Friede!“ steji jako přeće na prěčnej hrjedźe křiža. Pomnik samón pomjenuje tu pochowaneju: „Hier ruhen in Gott / Marie Hoppe, geb. Vogel, geb. d. 13. März 1822, gest. d. 8. April 1898. / Carl Hoppe, Bürger u. Hausbesitzer allhier, geb. d. 20. April 1817, gest. d. 14. Dec. 1901.“ Pod tym je čitać serbska štučka we łaćonskich pismikach a w starym prawopisu:
„Njetk, sprozni ruzy, wotpocżtej
A lejżtej w Bożim meni,
Wy wocżi sso też sandżeltej,
Spi moje cżjeło renje,
Porucż sso Jesussej,