Z wudaća: póndźela, 28 nowembera 2022

póndźela, 28 nowembera 2022 13:00

„Němska derje přihotowana“

Na krajnym zjězdźe SPD w Choćebuzu k zmužitosći namołwjeli

Choćebuz (dpa/SN). Braniborska SPD wobydlerjam kraja do zymy w zwisku z energijowej krizu zmužitosć přirěčuje. Zwjazkowy kancler Olaf Scholz a ministerski prezident Dietmar Woidke (wobaj SPD) běštaj zawčerawšim nadźijepołnaj, zo hodźi so kriza z alternatiwnymi energijowymi srědkami a financnymi po­mocami Zwjazka a kraja zmištrować. „Z rozsudami, kotrež smy tworili, móžemy nětko rjec, zo budźemy drje krizu zhromadnje přetrać“, wuzběhny Scholz na krajnym stronskim zjězdźe SPD Braniborskeje w Choćebuzu.

Wjace hač 20 wuhlowych milinarnjow mjeztym zaso dźěła, tři eksistowace atomowe milinarnje hišće přez zymu dale milinu dodawaja. Płunowe składy su mjeztym derje pjelnjene. Na sewjeroněmskich pobrjohach su nowe stejnišća za běžity płun nastali, kotrež so zhromadnje z importami z Norwegskeje a Nižozemskeje wo to postaraja, zo je Němska derje na zymu přihotowana.

wozjewjene w: Kraj a swět
póndźela, 28 nowembera 2022 13:00

Přewšo trěbna změna

Čłowjek ze swojimi skutkami rosće, tak husto słyšiš. We wěstym nastupanju to zdobom za serbskich čłonow rady Załožby za serbski lud přitrjechi. Wuslědk jich wulkeje angažowanosće a wosobinskeho zasadźenja pak je runje tak proste dopó­znaće: Tuchwilna struktura załožbowych gremijow njeje do přichoda kmana. Změna je nuznje trěbna – do jasneho dźělenja wobsahoweho skutkowanja a kontrole toho. Załožbowa rada, w kotrejž su serbscy zastupjerjo w mjeńšinje, je lědma wuraz kulturneje awtonomije našeho ludu. Namjet, pjatk wot Bjarnata Cyža na posedźenju Zwjazkoweho předsydstwa Domowiny wuprajeny, nawjazuje na přemyslowanja z lěta 2010 a je dale jara aktualny: Serbscy a komunalni zastupjerjo w radźe wobsahowje dźěłaja, to pjenjezydawarjo w dohladowanskej radźe kontroluja. Škoda, zo dyrbješe hakle ćišć z wulkoprojektom při Lawskim arealu a spěchowanjom w strukturnej změnje tajki wulki być, zo so dobra mysl wožiwi. Axel Arlt

wozjewjene w: Towarstwa
póndźela, 28 nowembera 2022 13:00

Prěnje wrota w stawiznach Kanady

Runje Alphonso Davies, kotryž bě w zašłej partiji hišće jědnatku přetřělił, docpě w druhej skupinskej hrě přećiwo Chorwatskej prěnje wrota za Kanadu w stawiznach swětowych koparskich mišterstwow. Za dobyće pak tute na kóncu ­njedosahachu. Marko Livaja, Lovro Majer a dwójce Andrej Kramarić hru hišće zwjertnychu. Poslednja skupinska hra přećiwo Belgiskej budźe za Chorwatow hižo mały finale wo zaćah do wosmi­finala.

Poražki přećiwo Marokkej dla je Belgiska tučasnje z třomi dypkami jenož třeća za Chorwatskej a Marokkom, a tak winowata dobyć. Rozsudźiła bě so hra hakle w kónčnej štwórć hodźinje. Na lěwym boku dósta Marokko wólny kop, nimale při zakładnej liniji. W belgiskich wrotach steješe Thibaut Courtois centralnje a něšto kročelow před wrotowej liniju. Tuž zapali Abdelhamid Sabiri bul wótrje ­na krótki róžk a překwapi z tym Courtoisa (73.). W přidatnym hrajnym času docpě Zakaria Abouklal po přihrawce Hakima Ziyecha samo hišće 2:0 za Marokko (90. + 2).

wozjewjene w: Sport
Zhromadnje su minjenu sobotu w Chrósćicach adwentny čas witali. Wjesnjenjo zetkachu so nawječor na nawsy, hdźež zaswěćichu adwentnu girlandu. K tomu zahra skupina dujerskich hercow adwentne pěsnje a kěrluše. Při tym sej wobydlerjo pražene kołbaski a horce wino słodźeć dachu. Foto: Feliks Haza

wozjewjene w: Łužica
póndźela, 28 nowembera 2022 13:00

Lipa z hosćimi koncertowała

Pančicy-Kukow (FK/SN). Tójšto wěriwych wuži sobotu wječor składnosć, na předwječoru prěnjeho adwenta w derje pjelnjenej klóšterskej cyrkwi w Pančicach-Kukowje z duchownym impulsom čas přihota na hody zahajić. Chór Lipa bě hromadźe z Markleebergskimi wokalistami na wosebity hudźbny nyšpor přeprosył.

Serbske ćěleso pod nawodom Jadwigi Kaulfürstoweje zahaji jón z kěrlušom „Přińdź, wšitkich ludow Zbóžniko“, na čož farar Tomaš Dawidowski přitomnych wutrobnje dwurěčnje powita. Sćěhowachu dalše spěwane modlitwy, kotrež Lipa před wołtarjom swjatnicy zanošowaše. Mjez druhim znošowaše so antifona „Rosujće njebjesa na zemju dele“ po sakralnym rumje, přisłušne wjerše zaspěwaštej sotře Diana Měrćinkowa a Sofija Nukowa. Wosrjedź tutoho bloka wozjewi duchowny tež ewangelij, kotryž bě tójšto připosłucharjam jasny spočatk adwentneho časa. Pod tutym zaćišćom spěwachu wšitcy zhromadnje z Wosadnika „Přihotuj so, luba duša“.

wozjewjene w: Łužica
póndźela, 28 nowembera 2022 13:00

Pěšcy maja rozdźělne zajimy

Budyšin (CS/SN). Přirada za měšćanske wuwiće Budyskeje měšćanskeje rady so na swojim zašłym posedźenju na zhromadne stejišćo k strategiji pěškoweho wobchada w měsće dojednać njemóžeše. Tuž dyrbja so na přichodnym posedźenju znowa z tym zaběrać.

Zakład diskusije bě naćisk wobchadneje strategije za pěškow, kiž bě René Pessier z Drježdźanskeho předewzaća Mobilitätswerk předstajił. W naćisku wón zwěsći, zo maja wobydlerjo nutřkowneho města, trochu zdalenišich štwórćow a wsow wokoło města rozdźělne naroki na wobchad pěškow. W nutřkownym měsće steji skerje kwalita chódnikow w srjedźišću, mjeztym zo dźe na wsach wo prašenje, hač tam scyła chódnik maja.

Naprašowanje je wunjesło, zo je 60 procentow wobydlerjow ze situaciju ­pěškow spokojom. Přiwšěm maja woni tójšto žadanjow, što měło so polěpšić. Tak měł so podźěl pěškow zwyšić a runočasnje jich začuće wěstoty polěpšić. We wjesnej kónčinje přeja sej porno tomu chódniki na woběmaj bokomaj puća.

wozjewjene w: Łužica
póndźela, 28 nowembera 2022 13:00

Poručeja prawidłowne šćěpjenje

„Posłuchaj lěkarja, prjed hač jeho trjebaš!“, serbske přisłowo namołwja.

Tak wěnuje so student mediciny Pětr Dźisławk w nowej seriji znatym a mjenje znatym chorosćam, zo by je ­čitarjam trochu bliže rozłožował (3).

wozjewjene w: Socialne
póndźela, 28 nowembera 2022 13:00

Powabliwe, ale z prašenjemi

Mišnjanska firma chce pola Šunowa fotowoltaikowu připrawu natwarić

Róžant (JK/SN). Městna k sedźenju w Róžeńčanskej sydarni na minjenym posedźenju gmejnskeje rady Ralbicy-Róžant runje tak dosahachu. Připowědźene bě předstajenje planow Mišnjanskeje firmy UKA, kotraž ma wotpohlad, na arealu mjez Smjerdźacej a Šunowom na 70 hektarach natwarić fotowoltaikowu připrawu. Ta ma nastać hač do lěta 2025 a potom lětnje produkować 60 do 70 megawattowych hodźin miliny za zjawnu syć. Firma UKA so wo planowanje, natwar a wobhospodarjenje stara a wšitko tež zapłaći. Gmejna trjeba jeničce předewzaću přizwolić a by za to hač do 30 lět kóžde ­lěto 120 000 do 140 000 eurow dóstała.

wozjewjene w: Łužica
póndźela, 28 nowembera 2022 13:00

Dwurěčny program wuhotowali

Tak kaž na mnohich druhich městnach su sobotu tež w Malešecach małe, ale jara přijomne adwentne wiki wuhotowali. Po dwěmaj lětomaj nanuzowaneje přestawki móžachu je při cyrkwi zaso wotměć. Wo hudźbne wobrubjenje starachu so holcy a hólcy Malešanskeje Witaj-pěstowarnje a tamnišeho horta. Dźěći zanjesechu z přewodom Borbory Kraloweje mjez druhim serbskej adwentnej pěsni. Malešanske wiki běchu sobotu jara derje wopytane. Tak poskićichu na přikład adwentne wěncy a mějachu samo bajkowy stan natwarjeny. Foto: Carmen Schumann

wozjewjene w: Łužica
póndźela, 28 nowembera 2022 13:00

Policija (28.11.22)

Po njezbožu do jastwa

Budyšin. Z tym drje pólski wodźer wosoboweho awta typa Ford předwčerawšim rano ličił njeje, zo budźe wječor samsneho dnja w jastwje. Na awtodróze A 4 blisko wotbóčki Budyšin-wuchod bě wón sobotu popołdnju prědnje lěwe koleso swojeho jězdźidła zhubił a na kromje jězdnje stejo wostał. Přez koleso zajědźe za nim jěduce awto, kotrež so při tym wobškodźi. Při wobdźěłanju njezboža policisća zwěsćichu, zo 29lětny zawi­nowar scyła žanu jězbnu dowolnosć ­njewobsedźeše. Nimo toho jeho justica z přikazom zajeća pytaše. Policisća zahajichu tuž jednanje jězdźenja bjez jězbneje dowolnosće dla a dowjezechu pólskeho staćana na to do Budyskeho jastwa.

wozjewjene w: Policija

Serbska debata

nowostki LND