Z wudaća: póndźela, 28 nowembera 2022

FC Energija Choćebuz – ST Babelsberg 2:1 (0:1)

Zestawa Energije: Bethke – Hasse, Slamar, Hildebrandt, Borgmann, Kujović (66. Eisenhuth), Hofmann, Oesterhelweg (83. Juckel), Badu (66. Abu-Alfa), Hottmann, Wähling

slěd wrotow: 0:1 Axel Borgmann (5., samowrota), 1:1 a 2:1 Maximilian Oesterhelweg (53., 83.)

Stajnje dźesać króć smědźeštej so tuchwilu najlěpšej braniborskej koparskej mustwje hižo na přepodaće krajneho pokala prosyć dać. Za FC Energiju njesteji po wuspěchu 2:1 přećiwo hosćom z Babelsberga dalšemu pokalowemu dobyću najprjedy ničo na puću, dokelž drje je najwjetši konkurent po bojowniskej hrě najprjedy raz won z pokalneho koła.

Na swětowych koparskich mišterstwach: Španiska – Němska 1:1 (0:0)

Němska je sebi po stopnjowanju a sylnej hrě přećiwo Španiskej dale móžnosć zaćaha do wosmifinala swětowych koparskich mišterstwow wobchowała. Po poražce 1:2 přećiwo Japanskej w prěnjej skupinskej hrě je tójšto němskich přiwisnikow a ekspertow mustwo trenarja Hansija Flicka hižo wotpisało. Falowaca mentalita, njedostatki w škitnym pasmje, pobrachowaca koncentracija a indiwiduelne zmylki, wšitko to wumjetowachu němskim hrajerjam po zazběhu do turněra. Bohužel je nalada němskeho fana, přiwisnika, jara wot wuslědka wotwisna. We wokomiku dobyća abo triumfa so wšitcy raduja. Hdyž pak raz njeběži, so cyły kraj hórši a statusy w socialnych medijach so ze skřiwdźenjemi kopja. Škoda, haj samo zrudne je zdźěla tute wuwiće. Narodne mustwo pak wčera dopokaza, zo móže z faworitami kaž Španiskej hrajersce sobu dźeržeć. Přez dobyće 1:0 Costa-Ricačanow přećiwo Japanskej je w skupinje E dale wšitko wotewrjene.