Z wudaća: srjeda, 15 měrca 2023

Budyšin. Pod hesłom „Bjez hranicow“ swjeći Budyska měšćanska biblioteka pjatk, 17. měrca, swoju „Dołhu nóc bibliotekow“ a přeprošuje do hłowneje biblioteki, na hrodowej čo. 12. Zazběh je w 19.30 hodź. Kaśka Bryla čita ze swojeho romana „Die Eistaucher“. W 21 hodź. pokazuja film „Straight Outta Crostwitz“, wo młodej Serbowce Hance a jeje nutřkownym konflikće jako młoda Serbowka. Zastup je darmotny. Měšćanska biblioteka prosy wo telefoniske přizjewjenje: 03591 534827. Dalše informacije namakaće pod: .

Kemše za rjemjeslnikow

Slepo. Pod hesłom „Wjele rukow, spěšny kónc!“ přeproša ewangelske wosady Běłowodźanskeho regiona wšitkich ­rjemjeslnikow a přemysłownikow na zhromadne kemše přichodnu njedźelu w 9.30 hodź. do ewangelskeje cyrkwje w Slepom.

Wokrjes Zhorjelc w Hamorje znowa požadarjow wo azyl zaměstni

Krynhelecy (AK/SN). Zhorjelski wokrjes budźe w bywšim powołanskošulskim centrumje w Hamorje znowa dom za požadarjow azyla zarjadować a to hač do 22. apryla. Maksimalna kapacita domu je 150 městnow. Wokrjes pyta tuchwilu kmaneho, nazhoniteho wobhospodarjerja. Zhromadnje z nim chcetej Hamorska gmejna a energijowy koncern LEAG cyłkowny wěstotny koncept za nutřka a wonka wudźěłać. Tole rozprawješe přirjadnik krajneho rady, Thomas Gampe, póndźelu na posedźenju Hamorskeje gmejnskeje rady.

Wot Zwjazka připokazani azyl pytacy – přewažnje mužojo mjez 18 a 25 lětami – pochadźeja ze Syriskeje, Afghanistana, Irana, Iraka, Indiskeje a Pakistana. „Hižo w lětomaj 2015 a 2016 je objekt tu w Hamorje jako dom za požadarjow azyla słužił. Chcemy jón reaktiwizować“, podšmórny Thomas Gampe. „Je mi wědome, zo ­tutón rozsud mjez wšitkimi 900 woby­dlerjemi Hamora přihłosowanje žnjeć njebudźe“, wón doda.

Z wotmachom hotuja so Serbja na jutry. Křižerjo sami najlěpje wědźa, što maja hišće wobstarać. Mnohich wšak tele dny zaběra, hač drje swojeho konja zaso dóstanu, abo wobsedźerjo tola hišće wotpraja. Wosebje napjeći su bjezdwěla tam, hdźež maja křižerja-nowačka. W tajkim padźe trjebaja přidatnu suknju, dalši cylinder, krawatu abo muchu, rukajcy, škórnje atd. Něštožkuli hodźi so w přiwuznistwje wobstarać a mjez znatymi a susodami wupožčić. Ale tež nowe sekle, šabraki, cholowy a wjele dalšeho su trěbne. Za tajke pady maš wobchody, hdźež će nazhonići krawcojo, šwalče, konjace fachowcy a dalši předawarjo poradźuja. Někotre wobchody so tule poručeja.

Choćebuz (WeM/SN). Wyši měšćanosta města Choćebuza Tobias Schick (SPD) je na wuradźowanju dźěłoweje skupiny „Serbske pomniki města Choćebuz“ (AG „Sorbische/Wendische Denkmale der Stadt Cottbus/Chóśebuz“) wosom wosobow do tutoho gremija powołał. Jich dźěłowa doba saha hač do lěta 2026. K powołanym słušeja zastupjerjo Serbskeho muzeja, Serbskeho instituta, župy Delnja Łužica, delnjeho pomnikoweho zarjada, fachoweho wobłuka za měšćanske wuwiće, muzejowych zběrkow města Choćebuza a wjednica 19 Choćebuskich pohrjebnišćow. Skupinu Serbske pomniki města Choćebuza nawjeduje zamołwita za serbske naležnosće města Ana Kosacojc-Kozelowa.

Z přepodaćom wopisma powołanja a z wobdźělenjom na wuradźowanju je wyši měšćanosta Tobias Schick (SPD) wysoke hódnoćenje dźěławosće serbskich pomnikoškitarjow potwjerdźił.

Dźěćaca dnjowa přebywarnja Syjk ze serbšćinu jako zetkawanskej rěču

Dźěćaca dnjowa přebywarnja w Syjku (Graustein) pola Grodka je loni na 80lětne wobstaće zhladowała. W nowinskej informaciji k tomu rěkaše mjez druhim, zo chcedźa w kiće tež projekt Witaj zwoprawdźić. Direktny zwisk mjez Syjkom a serbskorěčnym kubłanjom znaty njeje. Tohodla chcychmy so w naležnosći dokładnišo wobhonić.

Alberta Schweitzerowy skutk za swójby Braniborska je nošer dźěćaceho přebywanišća w Syjku. Fakt je, zo tam ofertu wokrjesa Sprjewja-Nysa (SPN) wo spěchowanju poskitkow za serbsku rěč wužiwaja. Dźěłaja ze serbšćinu jako zetkawanskej rěču. Wokrjesna społnomócnjena za serbske naležnosće, Kerstin Kosakowa, a koordinatorka za socialne planowanje wokrjesa Sprjewja-Nysa, Kerstin Schulz, stej fachowu koordinaciju na projekće wobdźělenych zarjadnišćow přewzałoj a je přewodźatej. Hromadźe z nawodnicu kity, Mandy Noack, a kubłarku Steffi Nowakowej stej wonej přede­wzaće w Sylku rozłožiłoj.

Najwažniši zaměr Worklečanskich wolejbulistow na jich poslednim domjacym hrajnym dnju sezony bě, znajmjeńša tři dypki přećiwo zestupej dobyć. Zo je so to runje přećiwo technisce wersěrowanemu faworitej z Drježdźan poradźiło, njebě pak wotwidźeć. Poprawom bychu dypki přećiwo tabulkowemu susodej z Koblic hišće drohotniše byli.

ST Viktoria Worklecy –

Póst Drježdźany II 3:1

(25:20, 20:25, 25:19, 25:21)