Wot 9. do 12. julija wotměje so w Budyšinje, Hochozy a Chrósćicach 11. mjezynarodny folklorny festiwal „Łužica 2015“. Smjerdźečanska rejwanska skupina, sobuwuhotowarka swjedźenja, so na njón intensiwnje přihotuje. Alfons Wićaz je so z nawodu Gabrielom Krawcom rozmołwjał.
Njesłušeće hižo k najmłódšim, ale nawjedujeće ze Smjerdźečanskej rejwanskej skupinu hižo wjele lět młodych ludźi. Što Was k tomu pohnuwa?
G. Krawc: Wukonjam tule čestnohamtsku funkciju hižo 38 lět. Započach ze 14 lětami jako młody rejwar, ze 16 přewzach nawod skupiny. Tehdy njebě to tajka wulka skupina. Běchmy šěsć, sydom porikow, ale tež z dorostom. Dźensa ma naš ansambl něhdźe 90 čłonow. Wosebje dźěło z młodostnymi mje zahorja. Wšako tak sam młody wostanješ. Za mnje njeje to dźěło, ale priwileg, z młodymi ludźimi dźěłać směć. Wězo při tym tójšto swobodneho časa wopruju, štož pak rady činju.
Chce-li tajki ansambl wobstać a publikum zawjeselić, trjeba wón stajnje nowe ideje. Kak jako nawoda k tomu přinošujeće?