SJ Chrósćicy
– Póst Germania Budyšin 4:1 (1:0)
Zestawa domjacych: Teschner – Dehn, Schulze, Pohling, Teichmann, Zahrodnik, Bětnar, Runt, Hawš, Žur, Šafář
Po dobrych wukonach w druhej połseriji su Chróšćanscy koparjo tež swoju poslednju hru sezony 2014/2015 dobyli. Wuslědk sam wšak ničo wo jasnej přewaze njewupraja. Šansow, hišće wyše dobyć, bě dosć a nadosć. Wot wšeho spočatka duela tłóčeše hosćićel Budyšanow do defensiwy. Wosebje Zahrodnik a Dehn přez křidle strašnje nadběhowaštaj. Štwórć hodźiny pak traješe, prjedy hač prěni króć we wrotach přećiwnika zaklinka. Feliks Zahrodnik přeběža w srjedźnym polu, z rjanej fintu posłuži Petra Šafářa, kiž njeměješe žane problemy, bul wušiknje wyše wrotarja k 1:0 do saka zběhnyć. Najebać dalšu přewahu a składnosće nochcychu pak změrowace druhe wrota padnyć. Po prěnim strašnym nadběhu hosći we 38. min. smokny Tittel bul do hornjeho třiróžka, ale wrotar Marco Teschner jón fantastisce wotpjasćowa.