Nowonakupjene twórby tworjaceho wuměłstwa nětko wustajeja
Hdyž Budyski Serbski muzej na wustajeńcu twórbow našočasnych serbskich wuměłcow přeproša, potom dyrbiš podawk wězo wotpowědnje zahajić – a što so dźensa lěpje za to hodźi hač tak mjenowana performance? Maja Nagelowa a Matthias Jackisch, tworićel skulptury Budyskeho prěnjeho wyšeho měšćanosty Johannesa Kaeublera, staj mjeztym wupruwowane duwo na tymle polu, a wonaj njejstaj tež minjenu njedźelu přesłapiłoj. Z kapkami wody ze swojeje kamjentneje flety nastorči Jackisch sćinohru pod hesłom „Zmij/plon“, w kotrejž je Maja Nagelowa z pomocu pjenjez, mloka a twaroha kaž w swojich filmach wuwiwace so struktury a mustry tworiła. Hra z pjenjezami njeskići přeco apetitny napohlad, a přihladowarjo su sej hladajo na dźensniši swět zawěsće swoje mysle činili. Haj, haj, zmija dyrbiš picować, zo by ći pjenjezy dawał. Zo to přeco derje njewuńdźe, wučachu nas hižo stare serbske powěsće.