6. interkulturny tydźeń Budyskeho wokrjesa zahajeny

Budyšin (SN/CoR). Čiły zaćišć kulturneje pisanosće přichodneho wobydlerstwa Budyskeho wokrjesa skićeše hłowna žurla NSLDź wčera na zarjadowanju „Ćěkancy so dźakuja“, z kotrymž hódnoćeše wokrjes na spočatku Interkulturneho tydźenja angažement čestnohamtskich pomocnikow. Oficialnje zahajili běchu 6. interkulturny tydźeń wokrjesa pod hesłom „Wšelakorosć město jednorosće“ minjeny pjatk w Biskopicach, sobotu wotewrěchu w Muzeju Budyšin wosebje tudyšim migrantam z Kawkaza a Georgiskeje wěnowanu wustajeńcu Hendricha Božidara Wjele.