Budyšin (CS/SN). Što ma přestrjenc z Bayeuxa zhromadneho z Hornjej Łužicu? Na prěni pohlad ničo. Budyscy archeologojo bychu wjeseli byli, bychu-li tajki časowy swědk zažneho srjedźowěka měli. Přestrjenc pokazuje dokładnje podawki mjez Jendźelskej a Francoskej w 11. lětstotku. Nimo bitwy pola Hastingsa w lěće 1066 předstaja wón tež wšelake podawki wšědneho dnja. Muzej Budyšin je hordy, směć we wobłuku wustajeńcy „Twjerdźizny, črjopy, spanjowe rynki – regionalna archeologija srjedźowěka“ fotokopiju přestrjenca pokazać.
Sobotu wotewrjena přehladka je hač do 21. februara 2016 přistupna. Při zahajenju zrodźi so myslička, zarjadować składnostnje wróćenja fotokopije kubłansku jězbu zajimowanych Hornjołužičanow do Normandije. Budyski wyši měšćanosta Alexander Ahrens – wón perfektnje francosce rěči a je zdobom dobry znajer stawiznow – přednošowaše k pozadkam přestrjenca z Bayeuxa, kotryž su prawdźepodobnje žony po wopisowanjach mužow wušiwali.