Po třoch lětach nanuzowaneje přestawki su w Sarajewje srjedź septembra Narodny muzej Bosniskeje a Hercegowiny znowa wotewrěli. W oktobrje 2012 dyrbjachu sobudźěłaćerjo muzej zawrěć, dokelž njeběchu so Bosničenjo, Chorwaća a Južni Serbja – tři najwjetše etniske skupiny w balkanskim kraju – na zhromadne financowanje dojednać móhli. Po rozpadźe Juhosłowjanskeje a Bosniskeje jako multietniskeho kraja nimaja zamołwići politikarjo, wosebje serbiskeje a chorwatskeje strony, hižo zajim zhromadne institucije zachować.