Budyšin (SN/at). Tak kaž je na přikład Berlinskim Serbam Serbske blido prawi­dłowne zetkanišćo, so tež w Budyšinje a we wokolinje bydlacy Polacy měsačnje zetkawaja. Woni su swój kruh samo na zajimowanych Němcow rozšěrili a njewobmjezuja so při tym jenož na němsko-pólsku wzajomosć.

Hnydom štyrirěčny wječork dožiwichu wobdźělnicy wčerawšeho zarjadowanja Budyskeho němsko-pólskeho stajneho blida w Kamjentnym domje. Społnomócnjena za wukrajnikow wokrjesa Budyšin Anna Piętak-Malinowska a jeje mandźelski Artur, hudźbnik w Serbskim ludowym ansamblu, běštaj wšitko swěru spřihotowałoj. Pólsce, němsce, serbsce a arabsce zaklinča hodowna pěseń „Ćicha nóc“. Wotpowědnym narodnosćam wopytowarjo tež přisłušachu. Na to jimaše so sobudźěłaćerka Serbskeho muzeja Andrea Pawlikowa słowa, zo by serbske zymske nałožki wot adwentneho časa hač k ptačemu kwasej předstajiła. Sobu přinjesła bě knižce „Serbske hody“ a „Ptači kwas“, kotrejž sposrědkowaštej wobdźělnikam zdobom wizuelny zaćišć wo zymskich nałožkach w Serbach.