Budyšin (CS/SN). Z wulkim wjeselom prezentowaštej wčera nawodnica Budyskeho archiwoweho zwjazka Grit Richter-Laugwitz a měšćanska archiwarka Silke Kosbab runje ponowjenu měšćansku chroniku, kotraž mjenuje so chronika Platza. Wona wopřijima 28 zwjazkow. Ličba stron w jednotliwych knihach je rozdźělna. Najtołše zwjazki maja hač do 700 stron. Cyłkownje wopřijima chronika něhdźe 42 000 stron, kaž wopytowarjo zhonichu. Spisał bě ju Budyski prawiznik a měšćanosta Christian Gottlieb Platz w lětach 1690 do 1720. Chronisća pozdźišich lět, kaž Techel, zapiski Platza zdźěla wužiwachu. Te započinaja so lěta 958. Chronika zwobraznja nazornje Budyske měšćanske stawizny kaž tež hornjołužiske stawizny scyła. Nimo toho zhonja zajimcy tójšto wo zwjazku šesćiměstow kaž tež wo tehdyšich wosobinach a jich dóńtach. Tak je na přikład w 10. zwjazku rěč wo „serbskim dudaku“, kotrehož běchu lěta 1627 nješwarneho zadźerženja na Božej słužbje dla w Serbskej wěži do kłódy tyknyli. Namakaja pak so tež přispomnjenja na přikład wo serbskim přibohu Flincu.