Něhdźe 40 wopytowarjow dožiwi njedźelu zajimawy a poradźeny hudźbno-literarny wječor „Wobrazy nalěća“ w Budyskim Dźiwadle na hrodźe. Pianistka a komponistka Liana Bertók běše zarjadowanje z podpěru Załožby za serbski lud organizowała.
Budyšin (bn/SN). Nimo Budyšanki na křidle běchu renoměrowany cellist Christoph Uschner z Radebeula, z Budyšina pochadźacy a tuchwilu na Drježdźanskej wysokej šuli „Carl Maria von Weber“ studowacy bariton Johannes Hochrein a dźiwadźelnik Němsko-Serbskeho ludoweho dźiwadła Měrko Brankačk jako rěčnik a recitator słyšeć. Sabine Jordan z Drježdźan wobrubi program z wurazowej reju.